julbaz.mediamonitoring.am

«Ժողովուրդ» օրաթերթը գրում է. ««Ժողովուրդ» օրաթերթի լավատեղյակ աղբյուրները փոխանցում են, որ Ազգային ժողովի ընդդիմադիր «Ուժեղ Հայաստան» խմբակցությունում դեռևս շարունակվում են քննարկումները, թե խորհրդարանի որ երեք մշտական հանձնաժողովների ղեկավարումն են պատրաստվում ստանձնել։

Մեր աղբյուրների տեղեկացմամբ՝ այս պահին խմբակցության գլխավոր հարցը ԱԺ փոխնախագահի պաշտոնում իրենց առաջադրած թեկնածուի՝ Արամ Վարդևանյանի ընտրությունն է։ Նրա թեկնածությունը նախատեսվում է քննարկել այսօր, իսկ քվեարկությունը, ըստ նույն աղբյուրների, հնարավոր է՝ կազմակերպվի ուրբաթ օրը։

«Ժողովուրդ» օրաթերթը տեղեկացավ, որ իշխանական «Քաղաքացիական պայմանագիր» խմբակցությունը պատրաստվում է ապահովել անհրաժեշտ 54 ձայնը, որպեսզի Արամ Վարդևանյանն ընդդիմադիր խմբակցությունների ձայներով ընտրվի Ազգային ժողովի փոխնախագահ։

Հիշեցնենք, որ «Ուժեղ Հայաստան» խմբակցությունն ունի 29 պատգամավոր, իսկ մնացած 25 ձայները, ըստ մեր տեղեկությունների, պետք է ապահովվեն հենց ՔՊ խմբակցությունից։

«Ժողովուրդ» օրաթերթի աղբյուրները փոխանցում են, որ փոխնախագահի ընտրությունից հետո «Ուժեղ Հայաստան»-ը կանցնի հանձնաժողովների հարցի քննարկմանը։ Այս պահի դրությամբ խմբակցության ներսում որպես նախընտրելի տարբերակներ դիտարկվում են՝ ԱԺ Արտաքին հարաբերությունների, Ֆինանսավարկային և բյուջետային հարցերի, ինչպես նաև Տարածքային կառավարման, տեղական ինքնակառավարման, գյուղատնտեսության և ենթակառուցվածքների հարցերի մշտական հանձնաժողովները։

Ըստ մեր տեղեկությունների՝ խմբակցությունում կարծում են, որ իրենց շարքերում կան փորձառու տնտեսագետներ, որոնք կարող են ակտիվ դերակատարում ունենալ հատկապես ֆինանսատնտեսական ոլորտում։ Սակայն դեռևս հստակ չէ, թե արդյոք քաղաքական բանակցությունների արդյունքում կհաջողվի ստանալ հենց այդ հանձնաժողովները։

Այս պահին որևէ վերջնական որոշում չի կայացվել, սակայն, մեր աղբյուրների փոխանցմամբ, «Ուժեղ Հայաստան»-ի հիմնական նպատակը տնտեսական ուղղությամբ առավել ազդեցիկ դիրքեր զբաղեցնելն է»։

Առավել մանրամասն թերթի այսօրվա համարում

«Ժողովուրդ» օրաթերթը գրում է. ««Ժողովուրդ» օրաթերթի տեղեկություններով՝ Ազգային ժողովի «Ուժեղ Հայաստան» խմբակցության պատգամավոր Էդգար Ղազարյանի, իսկ ավելի ճիշտ՝ նրա հայտարարության շուրջ նոր սուր քննարկումներ են ծավալվել։

Խոսքը վերաբերում է դեռևս երկու տարի առաջ նրա արած աղմկահարույց հայտարարությանը, երբ նա ասել էր, որ «ցանկացած սակրավոր, որը կհայտնվի Կիրանցում, պետք է զոհվի»։

Արդեն մի քանի օր է՝ թե՛ խորհրդարանական մեծամասնության պատգամավորներն իրենց ելույթներում շարունակաբար շեշտում են, որ Էդգար Ղազարյանը պարտավոր է հրապարակային ներողություն խնդրել իր հնչեցրած խոսքերի համար։

«Ժողովուրդ» օրաթերթի աղբյուրների փոխանցմամբ՝ «Ուժեղ Հայաստան» խմբակցության ներսում ևս Ղազարյանի այդ հայտարարությունը միանշանակ գնահատականի չի արժանացել։ Ավելին, խմբակցության ներկայացուցիչները փորձում են հնարավորինս արագ փակել թեման և նվազեցնել դրա քաղաքական հետևանքները։

«Ժողովուրդ» օրաթերթի տեղեկություններով՝ նույնիսկ քննարկվում է այն տարբերակը, որ Էդգար Ղազարյանը Ազգային ժողովի ամբիոնից հանդես գա հրապարակային պարզաբանմամբ, ապա՝ ներողությամբ։ Ղազարյանը գործընկերների հետ մասնավոր զրույցներում հայտնել է, որ պատրաստ է այս կամ այն ձևաչափով անդրադառնալ իր նախկին հայտարարությանը և ներողություն խնդրել։

Երեկ, երբ «Ուժեղ Հայաստան» խմբակցության անունից նա ելույթ էր ունենում Ազգային ժողովում, սահմանափակվեց միայն իշխանական խմբակցությանը կոչ անելով՝ ԱԺ փոխնախագահի թեկնածու Արամ Վարդևանյանի ընտրության քննարկման ընթացքում այդ թեմայով հարցեր չհնչեցնել։

Սակայն ՔՊ-ականները չեն պատրաստվում ընդունել այդ առաջարկը և մտադիր են շարունակել թեմայի քաղաքական շահարկումը։

Էդգար Ղազարյանն էլ ամբիոնից խոստացավ՝ բոլորը, ով ինչ ունի այդ թեմայով ասելու, ասի, վերջում ինքը կանդրադառնա այդ թեմային»։

Առավել մանրամասն թերթի այսօրվա համարում

«Փաստ» թերթը գրում է. «Կադաստրի կոմիտեն առաջարկում է փոփոխություններ և լրացումներ կատարել կառավարության 2022 թվականի հունվարի 5-ի թիվ 14-Ն որոշման մեջ։

Նախագծով կարգավորվում են ֆիզիկական կամ իրավաբանական անձանց սեփականության իրավունքով պատկանող հողամասերում առկա՝ ամբողջությամբ ինքնակամ հանդիսացող կառույցները Կադաստրի կոմիտեում հաշվառելու հետ կապված հարաբերությունները՝ օրենքով սահմանված պահանջներին համապատասխան։ Մասնավորապես, հստակեցվում են ինքնակամ կառույցի հաշվառման փաթեթը Կադաստրի կոմիտե ներկայացնելու, այն ուսումնասիրելու, հաշվառումը հաստատելու կամ մերժելու, ինչպես նաև ընդունված որոշման մասին պատվիրատուին տեղեկացնելու ընթացակարգերը։

Առաջարկվող կարգավորումները միտված են հաշվառման ընթացակարգի հստակեցմանը, իրավական որոշակիության ապահովմանը և Կադաստրի կոմիտեի կողմից միասնական վարչարարության իրականացմանը։

Նախագծի ընդունման արդյունքում կապահովի օրենքով նախատեսված ինքնակամ կառույցների հաշվառման կարգավորումների լիարժեք և միասնական կիրառումը։ Կստեղծվի անհրաժեշտ իրավական հիմք՝ ֆիզիկական կամ իրավաբանական անձանց սեփականության իրավունքով պատկանող հողամասերում առկա՝ ամբողջությամբ ինքնակամ հանդիսացող կառույցները Կադաստրի կոմիտեում հաշվառելու և դրանց հաշվառման հաստատումը հավաստող չափագրման ծածկագիր ստանալու համար։

Նախագծի ընդունմամբ կապահովվեն ինքնակամ կառույցների հաշվառման գործընթացի իրավական որոշակիությունը, Կադաստրի կոմիտեի իրականացրած վարչարարության միասնականությունը, ինչպես նաև պատվիրատուների պատշաճ իրազեկվածությունը հաշվառումը հաստատելու կամ մերժելու վերաբերյալ:

Առավել մանրամասն թերթի այսօրվա համարում

Իսլամաբադը մեծ նշանակություն է տալիս Մոսկվայի, Երևանի և Բաքվի հետ «կապերի» ամրապնդմանը։ Այս մասին ՏԱՍՍ-ին տված հարցազրույցում հայտարարել է Մոսկվայում Պակիստանի դեսպան Ֆայսալ Նիյազ Թիրմիզին։

Մեկնաբանելով Բաքվի և Երևանի միջև հակասությունների մեղմացման ֆոնին Պակիստանի և Հայաստանի միջև դիվանագիտական հարաբերությունների հաստատման թեման, ինչպես նաև Պակիստանում Հայաստանի պատմության մեջ առաջին դեսպանի նշանակումը, դիվանագետը շեշտել է, որ «Հայաստանը, Ադրբեջանը և Կովկասը շատ ընդհանրություններ ունեն Պակիստանի հետ»։

«Երկար տարիներ մենք դիվանագիտական հարաբերություններ չենք ունեցել Հայաստանի հետ, և ես շատ ուրախ եմ, որ վերջին իրադարձություններից հետո ձևավորվել է Հայաստանի հետ բնականոն կապեր հաստատելու անհրաժեշտության գիտակցումը, — նշել է Ֆայսալ Նիյազ Թիրմիզին։ — Եթե նայեք վերջին իրադարձություններին, ես շատ եմ ճանապարհորդել Դաղստանում, Չեչնիայում, Սոչիում, Կրասնոդարում, և ես եղել եմ Ադրբեջանում։ Պատմականորեն Կովկասյան տարածաշրջանի և Պակիստանի միջև հսկայական կապ կա։ Ես շատ հեռանկարներ եմ տեսնում Պակիստանի, Հայաստանի և ամբողջ Կովկասի տարածաշրջանի միջև։

Ես նաև եղել եմ Դուբայում։ Այնտեղ հայերի և պակիստանցիների միջև բազմաթիվ ամուսնություններ են կնքվել։ Սա նպաստում է մարդկանց միջև կապերի հաստատմանը, առևտրի և մշակույթի զարգացմանը։ Եվ ես կարծում եմ, որ Հայաստանը, Ադրբեջանը և Կովկասը շատ ընդհանրություններ ունեն Պակիստանի հետ», — նշել է դիվանագետը։

Ֆայսալ Նիյազ Թիրմիզին կիսվել է, որ դեռ մանկուց երազել է կարդալ Կովկասի պատմության մասին գրքեր։ «Ինձ բախտ է վիճակվել այցելել այս տարածաշրջանի բազմաթիվ երկրներ և վայրեր։ Այնպես որ, մենք Կովկասի հետ պատմական կապեր ունենք։ Եվ Հայաստանը դրանց շատ կարևոր բաղադրիչն է։ Ես տեսնում եմ, թե ինչպես են այժմ Հայաստանի և Պակիստանի միջև հաստատվում մարդկային շփումներն ու գործարար կապերը», — եզրափակել է նա։

«Հրապարակ» թերթը գրում է. «Իշխանությունն ակտիվ աշխատանքներ է տանում Մեղրիում, որտեղ հոկտեմբերի 25-ին ՏԻՄ ընտրություններ են նշանակված: Բանն այն է, որ, ԹՐԻՓՓ-ով պայմանավորված, Մեղրիի ընտրությունները ռազմավարական նշանակություն են ստացել, եւ Նիկոլ Փաշինյանն այն անձամբ իր վերահսկողության տակ է վերցրել: Ասել է, որ կենաց-մահու կռիվ պիտի տանք, որ համայնքապետը լինի իշխանության մարդը: ԹՐԻՓՓ-ի հետ կապված հողահատկացման եւ այլ հարցերը, դիցուք, եթե մի պրոռուսական անձ դառնա համայնքապետ, կարող են «պռավալ գնալ»: Թիվ մեկ խնդիրը բնակչության կողմից ընդունելի մարդ գտնելն է, որ ընտրությունների արդյունքներն անակնկալ չլինեն իրենց համար:

Արդեն քասթինգ է հայտարարվել թեկնածուի ընտրության համար, քանի որ տեղի ակտիվ ՔՊ-ականները Փաշինյանին ասել են, որ գործող համայնքապետ Խաչատուր Անդրեասյանը` Սամվել Բաբայանի երբեմնի կուսակիցը, որը ճամբար է փոխել, չի ձգում, չի վայելում լայն զանգվածների համակրանքը: Բացի այդ, նախկին համայնքապետը բազում հայցեր է ներկայացրել Անդրեասյանի չարաշահումների վերաբերյալ: Իսկ նախկին համայնքապետ, ավագանու «Հանրապետություն» խմբակցության ղեկավար Բագրատ Զաքարյանի եւ Խաչատուր Անդրեասյանի հարաբերությունները տեւական ժամանակ է՝ կոնֆլիկտային են։

Թեեւ 2021 թվականի ՏԻՄ ընտրություններից հետո, երբ որեւէ քաղաքական ուժ չէր ստացել ավագանու մեծամասնությունը, նրանք համագործակցության հուշագիր էին ստորագրել՝ համայնքը հաջորդաբար երկուսուկես տարի համատեղ ղեկավարելու պայմանավորվածությամբ, այսօր արդեն միմյանց հասցեին սուր մեղադրանքներ են հնչեցնում։

Բագրատ Զաքարյանը հաղորդումներ է ներկայացրել Հակակոռուպցիոն կոմիտե՝ խնդրելով ուսումնասիրել վերջին երկուսուկես տարում համայնքում իրականացված մի շարք ծրագրեր։ Զաքարյանը համայնքի ղեկավարի տեղակալն էր, սակայն Ազգային ժողովի հունիսի 7-ի ընտրություններից մոտ մեկ շաբաթ անց ազատվեց զբաղեցրած պաշտոնից։ Համայնքի ղեկավարի պաշտոնը նա զբաղեցրել է ուղիղ երկուսուկես տարի, ինչպես հուշագրով համաձայնության էին եկել՝ տեղը զիջելով մյուս թեկնածուին։

Այս հանգամանքները հաշվի առնելով, Նիկոլ Փաշինյանը հորդորել է նոր ուժեղ թեկնածու գտնել:

Ի դեպ, մեզ ասացին, որ այս պահին արդեն համայնքապետի յոթ թեկնածուի անուն է շրջանառվում: «Ուժեղ Հայաստանի» կողմից հնարավոր է առաջադրվի առողջապահության փորձագետ, Մեղրու հիվանդանոցի նախկին գլխավոր բժիշկ Ծաղիկ Վարդանյանը:

Առավել մանրամասն թերթի այսօրվա համարում

«Ժողովուրդ» օրաթերթը գրում է. «Թեև Ազգային ժողովի նախկին նախագահ Ալեն Սիմոնյանն այս օրերին Հայաստանում չէ իր նոր կնոջ հետ, սակայն, պարզվում է, նրա ընտանիքը մինչև վերջերս շարունակել է բնակվել կառավարական ամառանոցում։

Այդուհանդերձ, իրավիճակը, ըստ ամենայնի, փոխվել է։

«Ժողովուրդ» օրաթերթի աղբյուրների փոխանցմամբ՝ Ալեն Սիմոնյանի ընտանիքի անդամներին՝ մասնավորապես մայրիկին և երեխաներին, տեղեկացվել է, որ այլևս չեն կարող մուտք գործել կառավարական ամառանոցի տարածք։

Ըստ նույն աղբյուրների՝ նրանց հորդորվել է հավաքել անձնական իրերը և լքել վարչապետ Նիկոլ Փաշինյանի հարևանությամբ գտնվող ծառայողական առանձնատունը։

Հիշեցնենք, որ կառավարական ամառանոցների տարածքում ծառայողական առանձնատներ են տրամադրվում պետական բարձրաստիճան պաշտոնյաներին՝ նրանց պաշտոնավարման ընթացքում։ Իսկ ԱԺ նախագահ է ընտրվել Ռուբեն Ռուբինյանը, հետևաբար, նա պետք է ընտանյոք տեղափոխվի ամառանոց։

Իսկ Սիմոնյանը վստահաբար նոր բարձր պաշտոն չի ստանա, դրա համար էլ նրանց հրաժեշտի հրահանգ է եկել»։

Առավել մանրամասն թերթի այսօրվա համարում