Category: Mamul.am

ԼՀԿ նախկին անդամ, նախկին պատգամավոր Անի Սամսոնյանը ֆեյսբուքյան իր էջում գրում է․ «Հրապարակային խոստովանություն կապիտուլյացիայի մասին, թե՞ ինչ…
     Աժ նախագահ Ալեն Սիմոնյանը հայտարարել է, որ ՀՀ անվտանգության երաշխավորը Ադրբեջանն է:
     Որ դեպքերում է ստեղծվում իրավիճակ, երբ երկու պետություն պատերազմում են, հետո պարտված կողմը հայտարարում է, որ հաղթած կողմը իր անվտանգության երաշխավորն է:
     Բավարար է պատմության մեջ հիշել այդպիսի մեկ օրինակ, երբ ԱՄՆ-ը 2-րդ համաշխարհային պատերազմից հետո
     1. Փոխել տվեց Ճապոնիայի Սահմանադրությունը
     2. Վերակազմավորեց քաղաքական համակարգը
     3. Քաղաքական որոշումների վրա ստացավ լիարժեք լծակներ
     4. կրճատեց ռազմական ուժերը և արգելեց ունենալ լիարժեք բանակ:
     Մեկ բառով ասած` կապիտուլացրեց Ճապոնիան և դարձավ անվտանգության երաշխավորը: Ուղղակի Ճապոնիայի բախտը բերեց նրանում, որ ԱՄՆ-ը 20-րդ դարում Ճապոնիան «Արևմտյան Ամերիկա» դարձնելու նպատակ չուներ:
     Հիմա Ադրբեջանը հասել է նրան, որ փոխել է տալիս մեր Սահմանադրությունը, որոշում է, թե ինչքան զենք կարող ենք գնել կամ ունենալ, միակողմանի սահմանազատում է մեր ինքնիշխան տարածքները, գործադիր, խորհրդարանական և քաղհասարակության մակարդակով կիրառում է ազդեցության լծակները Հայաստանում քաղաքական որոշումների վրա ազդելու:
     Սա բավարար ինքնավստահություն է տալիս իշխանությանը հայտարարելու, որ Ադրբեջանը Հայաստանի անվտանգության երաշխավորն է:
     Երևի իշխանության ինքնիշխան լեզուն չի՞ պտտվում արտասանելու «կապիտուլյացիա» բառը»:

Փաստաբան Արամ Վարդևանյանը ֆեյսբուքյան էջում տեսանյութ է հրապարակել՝ կից գրառմամբ․ «Տեղի ունեցող իրադարձությունների վերաբերյալ որոշ հանգամանքներ եմ ներկայացրել: Ընտրական օրենսգրքի փոփոխությունը չեն քննարկվել որևէ կողմի հետ, փոխվում է մեկ անձի, մեկ ուժի ցանկությամբ` ակնհայտ ապօրինի:
     Իրավունքը պետք է գերակայի…
     Աստված պահապան մեր ժողովրդին»:

Հայաստանում արդեն վաղուց, հատկապես վերջին շրջանում, շատ ավելի ակնհայտ է դարձել, որ սոցիոլոգիան ոչ թե հանրային տրամադրությունների ստուգման, այլ դրանց վրա ազդելու միջոց և գործիք է։ Այս մասին «Փաստինֆո»-ի հարցին ի պատասխան ասել է ՀՀ երկրորդ նախագահ Ռոբերտ Քոչարյանի գրասենյակի ղեկավար Բագրատ Միկոյանը։
     «Ես որևէ հարցման արդյունք չեմ մեկնաբանի, սակայն կարող եմ ասել, որ որոշ մարդիկ արդեն կորցրել են չափի զգացումը՝ նույնիսկ այդ խեղաթյուրված տվյալներն օգտագործելու տեսանկյունից։ Կարծում եմ՝ լավագույն սոցհարցումը հունիսի 7-ին է։ Մենք ունենք մեր հարցումները, որոնց արդյունքները մեզ ամբողջությամբ բավարարում են այս փուլում առաջ շարժվելու համար։ Մենք շարունակում ենք մեր գործը»,-ասել է Միկոյանը՝ հորդորելով վերջին հրապարակված հարցումների հավաստիությունը ստուգելու համար ուսումնասիրել Երևանի ավագանու ընտրություններից առաջ հրապարակված սոցիոլոգիական հարցումները։

Հիշեցնենք, որ այսօր «Gallup International Association»-ի հայաստանյան ներկայացուցչությունն հրապարակել էր վերջին հարցման տվյալները, համաձայն որոնց՝ եթե խորհրդարանական ընտրությունները տեղի ունենային հաջորդ կիրակի, ընտրողների միայն 5,5%-ն է պատրաստ ձայն տալ «Հայաստան» դաշինքին, ինչը ենթադրում է, որ այս ուժը չի հաղթահարելու խորհրդարան անցնելու համար անհրաժեշտ 8 %-ը։

Իրանագետ Վարդան Ոսկանյանի թելեգրամյան գրառումը․ «ԱՄՆ-ի նախագահ Թրամփը սպառնացել է, որ «մի ամբողջ քաղաքակրթություն կմեռնի այս գիշեր՝ այլևս երբեք չվերածնվելու համար»՝ նկատի ունենալով Իրանին հասցվելիք հարվածների մահաբերությունը։

Չափազանց հավակնոտ և անիրատեսական պնդում է, եթե հաշվի առնենք, որ հազարամյակների իրանական քաղաքակրթությունը ոչնչացնել են փորձել բազմաթիվ նվաճողներ և չեն հաջողել։

Աշխարհի պատմության մեջ ամենաընդարձակ ցամաքային կայսրությունը ստեղծած մոնղոլները ևս, հավանաբար, կարծում էին, թե կոչնչացնեն այս քաղաքակրթությունը, մինչդեռ, ի վերջո, հենց իրանական քաղաքակրթությունը ձուլեց և իրանականացրեց այն մոնղոլներին, որոնք հայտնվել էին Իրանի քաղաքակրթական տիրույթում»:

Քաղաքական վերլուծաբան Միհրան Հակոբյանը ֆեյսբուքյան էջում գրել է. «Քոչարյանի գրասենյակի ղեկավար, համատեղության կարգով Վիկտոր Սողոմոնյանի տեղակալ Բագրատ Միկոյանը հայտարարել է, թե ով հավաստում է, որ Քոչարյանի ռեյտինգը 5 տոկոս է, չափն անցնում է։
     Իսկ ո՞րն է չափը, կամ ո՞վ է սահմանել այդ չափը։ Անուն չունե՞ն էդ «չափն անցնողները»։ Կարո՞ղ է Բագրատն ու Վիկտորն են չափ սահմանողները։ Էդ ե՞րբ են հասցրել ու էդքան աճել:
     Երբ մեզ բռնում ու մեր վրա հարձակվում էին, մեկը գնում էր պարտքով վերցրած TV-ի սեփականատիրոջ վրա վայրահաչելու հենց էդ նույն TV-ի եթերից, մյուսն էլ Մոսկվայից դասավորում էր էդ եթերին գնալու հարցը։
     Իսկ կարո՞ղ է «կրելու ենք»-ով ժողովրդի ադեկվատ մասին խաբած ու Նիկոլի դատախազի առաջադրած մեղադրանքը ծով գնալու խաթր ընդունածների համեմատ ենք չափն ացնում։
     Պարզաբանենք, հասկանանք»։

Լրագրող Ոսկան Սարգսյանի ֆեյսբուքյան գրառումը. «3 բան, որ 5 տարում չարեց խորհրդարանական ընդդիմությունը
     Ազգային ժողովում ընգրկված ընդդիմությունն անցած 5 տարում առնվազն 3 բան պետք է աներ, որոնք այդպես էլ չարեց․
     1․ Չպատրաստեց և չհրապարակեց 44-օրյա պատերազում բոլոր զոհվածների անուն-ազգանունները՝ նրանց վերաբերյալ տվյալներով։
     2, Չպատրաստեց և չհրապարակեց Նիկոլ Փաշինյանի և ՔՊ-ի ստերի բազմահատորյակը։
     3․ Չպարզեց, թե ովքեր և ինչ նպատակով են 2018 թվականին ստացել Բաքվից Հայաստան բանկային փոխանցումով ուղարկված, Համաշխարհային բանկի կողմից արձանագրված 211 միլիոն դոլարը»:

Վարչապետ Նիկոլ Փաշինյան ֆեյսբուքյան էջում տեսանյութ է հրապարակել՝ այն վեռնագրելով. «3+1 փոքրիկ խմբակի մասին»: Տեսանյութում նա ասել է. «Կալուգացի Սամվելը մեզ ասում ա՝ փոքրիկ խմբակ: Լսե՛ք, դուք էսօրվա ձեր «հուժկու» ակցիան՝ ԱԺ-ի դիմաց, տեսե՞լ եք: Մենք ձեր փողերի ապօրինի շրջանառության համակարգը վերջնականորեն էսա փակենք, դուք 3 հոգով եք մնալու՝ Սամվելը, Նարեկը, Կարենը: Կներեք՝ 4 հոգով, որովհետև կարենից 2 հատ կա»:

«Ցիլոյո՛վ մարդ, մի՛ վախեցիր Կարապետյանից, ինքը քեզ վատ բան չի անելու․ ինքը դուրս գա, մի երկու բան ունի քեզ ասելու։ Մի՛ վախեցիր ընդհանրապես»,- այս մասին ֆեյսբուքյան ուղիղ եթերում նշել է «Ուժեղ Հայաստան՝ Սամվել Կարպետյանի հետ» դաշինքի խորհրդի անդամ Նարեկ Կարապետյանը՝ արձագանքելով վարչապետ Նիկոլ Փաշինյանի ֆեյսբուքյան ուղիղ եթերում հնչեցրած դիտրակումներին»։

Քաղաքագետ Հրանտ Մելիք-Շահնազարյանը ֆեյսբուքյան էջում տեսանյութ է հրապարակել՝ կից գրառմամբ․ «Իրանի քաղաքացիները կենդանի վահան են կազմում՝ պաշտպանելու երկրի կենսական նշանակության ենթակառուցվածքը՝ կամուրջները, էներգետիկ համակարգը և այլն:
     Արժանապատիվ ապրելու կամքն այսպես է լինում: Միայն այսպես և ուրիշ ոչ մի կերպ»:

«Հիդրոօդերևութաբանության և մոնիթորինգի կենտրոն» ՊՈԱԿ-ի տնօրեն Լևոն Ազիզյանը ֆեյսբուքյան էջում գրել է․ «ՇՄՆ «Հիդրոօդերևութաբանության և մոնիթորինգի կենտրոն» ՊՈԱԿ-ի կանխատեսումների համաձայն՝ ապրիլի 8-10-ին հանրապետության առանձին շրջաններում սպասվում է քամու ուժգնացում՝ 24-27 մ/վ արագությամբ։
     Ի՞նչ վտանգ կարող է ներկայացնել նման ուժգնության քամին։
     ՀՀ կառավարության 2012 թվականի սեպտեմբերի 13-ի N 1181-Ն որոշման համաձայն՝ նման արագության քամին կարող է զգալի վնասներ պատճառել, այդ թվում՝ կոտրել կամ արմատախիլ անել ծառեր։
     Ուժեղ քամու դեպքում խորհուրդ է տրվում՝
     խուսափել բաց տարածքներից, հատկապես այն վայրերից, որտեղ կան բարձր ծառեր,
     լինել զգոն շինությունների մոտ՝ չամրացված կամ թույլ ամրացված կառուցատարրերից,
     եթե գտնվում եք փողոցում կամ բաց տարածքում՝ հեռու մնալ էլեկտրասյուներից և լուսային սյուներից,
     զգուշանալ քամուց թռչող տարբեր առարկաներից։
     Եղե՛ք զգոն և հետևե՛ք պաշտոնական հաղորդագրություններին»։