Category: TopNews.am

NASA և Եվրոպական հարավային աստղադիտարանը (ESO) հաստատել են, որ SpaceX-ի Falcon 9 հրթիռի վերին աստիճանը ընկել է Լուսնի մակերևույթին։ «Օգոստոսի 5-ի վաղ առավոտյան Falcon 9 հրթիռի վերին աստիճանը չնախատեսված կերպով ընկել է Լուսնի մակերևույթին», – NASA-ի հրապարակած տեսանյութում հայտնել է գործակալության գիտաշխատող Քելսի Յանգը։

Հարվածի հետևանքները հաջողվել է գրանցել նաև ESO-ի աստղագետներին՝ Չիլիում գտնվող Պարանալ աստղադիտարանի աստղադիտակի միջոցով։ ESO-ից հայտնել են, որ աստղադիտակը ֆիքսել է նատրիումի և լիթիումի գոլորշիների սպեկտրային գծեր այն ամպում, որը ձևավորվել է հարվածից հետո և դիտվել է մոտ 5-10 րոպե։

ESO-ի հետազոտական խմբի ղեկավար Կարլ Շմիդտը նշել է, որ ամպում հայտնաբերված նատրիումը, ամենայն հավանականությամբ, առաջացել է Լուսնի հողից, իսկ լիթիումը, հավանաբար, դուրս է եկել հենց հրթիռի բաղադրիչներից և ունի երկրային ծագում։ Falcon 9 հրթիռի վերին աստիճանը 2025 թվականին Լուսնի ուղեծիր էր հասցրել Blue Ghost 1 վայրէջքի սարքը։ Մոտ մեկ տարի անց սիրողական աստղագետները նկատել էին, որ հրթիռի արագացուցիչ հատվածը կարող է բախվել Լուսնին, ինչը հետագայում հաստատել էին նաև NASA-ի մասնագետները։

Երևանի ամենահին գործող կինոթատրոններից մեկը՝ «Նաիրին», վերանորոգել է իր գլխավոր մուտքը։ Այս առիթով օգոստոսի 7-ին, ժամը 19:30-ին, կինոթատրոնում տեղի կունենա տոնական բացման արարողություն։ Միջոցառումը կսկսվի կարմիր գորգով և հանդիսավոր ընդունելությամբ, որին կմասնակցեն պետական կառույցների ներկայացուցիչներ, արվեստագետներ, դերասաններ, ռեժիսորներ, լրագրողներ և հանրային հայտնի դեմքեր։

Երեկոյի ընթացքում ներկաները կտեսնեն բացառիկ նկարներ «Նաիրիի» արխիվից, որոնք պատմում են կինոթատրոնի հարուստ անցյալի և մշակութային մեծ դերի մասին։ Իսկ արարողության խորհրդանշական ավարտը կլինի «Երկիր Նաիրի» ֆիլմի հատուկ ցուցադրությունը։ Ֆիլմի ընտրությունը պատահական չէ. այն գաղափարապես կապում է կինոթատրոնի անվանումը, մեր ազգային հիշողությունն ու «Նաիրիի» նոր մեկնարկը՝ ստեղծելով անցյալի ու ապագայի կապը։

Այս միջոցառման նպատակն է ոչ միայն ցույց տալ թարմացված մուտքը, այլև ևս մեկ անգամ ընդգծել «Նաիրիի» կարևորությունը՝ որպես մշակութային կյանքի և հանրային հանդիպումների սիրված հարթակ։ Կինոթատրոնը շարունակում է իր աշխատանքը՝ հանդիսատեսին առաջարկելով որակյալ ֆիլմեր, ժամանակակից տեխնիկական լուծումներ և նոր նախագծեր՝ միաժամանակ պահպանելով իր պատմական ու մշակութային ժառանգությունը։

«Մուլտի գրուպ» կոնցեռնի նախկին գլխավոր տնօրեն Սեդրակ Առուստամյանն ու տնօրեն Արթուր Դալլաքյանը ձերբակալվել էին՝  առանձնապես խոշոր չափերով՝ 8 մլրդ 126 մլն 946 հզր 460 ՀՀ դրամին համարժեք 21 մլն 72 հզր 827 ԱՄՆ դոլար արժողության գույքերը և դրամական միջոցները խաբեությամբ հափշտակելու և փողերի լվացում կատարելու առերևույթ դեպքերի առթիվ նախաձեռնված քրեական վարույթի շրջանակներում։

Քննչական կոմիտեից 1lurer.am-ին հայտնել են, որ Սեդրակ Առուստամյանի նկատմամբ խափանման միջոց է ընտրվել կալանքը։ «Մուլտի գրուպ» կոնցեռնի նախկին գլխավոր տնօրենը կալանավորվել է 2 ամսով։

2026 թ․ սեպտեմբերին Հայաստանի մասնավոր և պետական բուհերը 10․958 նոր ուսանող կունենան։ Սա բուհ և մասնագիտություն հայտագրած շուրջ 15․800 դիմորդների 69, իսկ շրջանավարտների ընդհանուր թվի 49 %–ն է։ Ընդհանուր առմամբ հիմնական և լրացուցիչ փուլերի արդյունքներով համալրվել է բուհական տեղերի 86 %-ը։ Գնահատման և թեստավորման կենտրոնի ամփոփմամբ՝ վերջին հինգ տարիներին բուհեր ընդունվողների թիվը կայուն կերպով աճում է՝ 9․700-ից հասնելով 11․000-ի։

2026-2027 ուսումնական տարում ՀՀ պետական և ոչ պետական բուհերում կսովորի շուրջ 11 հազար առաջին կուրսեցի։ Գնահատման և թեստավորման կենտրոնի ամփոփմամբ՝ դիմորդների թվով առաջատարը Երևանի պետական համալսարանն է, ապա տնտեսագիտականն ու պոլիտեխնիկականը:

Անցյալ տարվա համեմատ անփոփոխ է մնացել ամենապահանջված մասնագիտությունների տասնյակը։ Բժշկականի «ստոմատոլոգիա», ԵՊՀ–ի «տնտեսագիտություն» և «իրավագիտություն» մասնագիտություններում 1 տեղի համար 3 դիմորդ է մրցել՝ «Ռադիոլուր»–ի հետ զրույցում ասում է Գնահատման և թեստավորման կենտրոնի մամուլի քարտուղար Խաչանուշ Գրիգորյանը․ «Ամենամեծ մրցույթը գրանցվել է Երևանի պետական բժշկական համալսարանում, որտեղ 3 դիմորդ պայքարել է 1 տեղի համար։ 7 անվճար և 100 վճարովի տեղի համար պայքարում էր 318 դիմորդ Հաջորդը ԵՊՀ իրավագիտության ֆակուլտետն է»։

Ընդունելության քննությունների հիմնական և լրացուցիչ փուլերից հետո չի համալրվել բուհական տեղերի շուրջ 14 %–ը։ Թափուր է մնացել շուրջ 3․000 տեղ, որոնցից 140-ը՝ անվճար։ Այս առումով առաջատարը դարձյալ Ագրարային համալսարանն է։ Բայց կան նաև ռազմավարական ու արդյունաբերական նշանակություն ունեցող ոլորտներ, որոնք դիմորդներ չեն ունեցել․  «Պետական 13 բուհում և մասնաճյուղում 37 մասնագիտությամբ երկու փուլերից հետո առաջին կուրսեցի չկա։ Օրինակ՝ Պոլիտեխնիկի Կապանի մասնաճյուղի մետալուրգիան, որտեղ արդյունաբերական հսկաներ կան, ուսանող չունի։ Իսկ 11 բուհերի 33 մասնագիտություններով ընդունվել է ընդամենը մեկական ուսանող»։

Դիմորդներն իրենց նախասիրություննե՞րը, թե՞ աշխատաշուկայի պահանջարկը հաշվի առնելով են մասնագիտություն և բուհ ընտրել․ 

«Ծրագրավորողը ունի ազատություն աշխատելու տարբեր երկրներից, և հիմա կա պահանջարկ հենց այդ մասնագիտությունների համար»։

«Ավարտել եմ 16 ավագ դպրոցը, ընդունվում եմ Ժողինստիտուտ՝ Տնտեսագիտական համալսարան, Զբոսաշրջության բաժին»։

«Դիմել եմ ԵՊՀ՝ ռոմանոգերմանական բաժին, անգլերեն և գրականություն։ Հունվարինը իմ ցանկացածից բավականին ցածր ստացվեց, այդ պատճառով լրացուցիչ փուլին մասնակցեցի»։

Վիճակագրությունն այդուհանդերձ փաստում է, որ աշխատաշուկայի պահանջների և դիմորդների նախասիրությունների միջև խզումը պահպանվում է. մինչ բժշկականն ու իրավագիտականը գերբեռնված են, ռազմավարական նշանակություն ունեցող ճարտարագիտական ու ագրարային ոլորտները շարունակում են կադրերի պակաս զգալ:

armradio

ՀՀ կառավարությունը խորհրդարան կներկայացնի «Կառավարության կառուցվածքի և գործունեության մասին» օրենքի նախագիծ՝ առաջարկելով փոփոխել երեք նախարարության անուն։ Մասնավորապես.

• Աշխատանքի և սոցիալական հարցերի նախարարությունը կկոչվի Աշխատանքի և բարեկեցության նախարարություն,
• Արտաքին գործերի նախարարությունը՝ Արտաքին գործերի և միջազգային առևտրի նախարարություն,
• Բարձր տեխնոլոգիական արդյունաբերության նախարարությունը՝ Բարձր տեխնոլոգիական արդյունաբերության և արհեստական բանականության նախարարություն։

Որոշման նախագիծն ընդունվել է կառավարության այսօրվա նիստում։

Մոտ 3 200 դիմորդ այս տարվա ընդունելության քննություններին ստացել է անբավարար գնահատական: Գնահատման և թեստավորման կենտրոնի տվյալներով՝ նախորդ տարի անբավարար գնահատական ստացածների թիվը շուրջ 2500 է եղել։ Կառավարության նիստում վարչապետ Նիկոլ Փաշինյանն անդրադարձել է այս վիճակագրությանը՝ այն համարելով ահազանգ։

«Մենք դանդաղում ենք մեր բարեփոխումների ճանապարհին, որովհետև անընդհատ գնում ենք կոմպրոմիսների, և արդյունքում տուժում են երեխաները։ Մենք պետք է առերեսվենք։ Ատեստավորման գործընթաց է, ինչքա՞ն կարելի է, չի հաղթահարում մարդը, պետք է ասենք՝ վերջ, էլ չպետք է աշխատի դպրոցում, որովհետև իր աշակերտն է, որ գնում, չի կարողանում ընդունելության քննությունը գոնե բավարար ստանա, չենք ասում՝ գերազանց, գոնե՝ բավարար։ 

Որոշումները կայացված են, պետք է շատ հստակ և հատու, վճռական իրականացնենք, և որևէ կասկած չկա, որ դա անում ենք երեխաների շահերից ելնելով»,- ասաց վարչապետը։

Վարչապետ Նիկոլ Փաշինյանը երկօրյա աշխատանքային այցով մեկնել է Ղրղզստանի Հանրապետություն: Այդ մասին տեղեկացնում է ՀՀ վարչապետի մամուլի քարտուղար Մելանյա Հարությունյանը:
 
Վարչապետը Չոլպոն-Ատայում կմասնակցի Եվրասիական միջկառավարական խորհրդի հերթական նիստին:

Մենք խնդիրը ձևակերպելու ենք հետևյալ կերպ. 2026-2031 թվականը 2 մլրդ դոլարի ապօրինի օտարված գույք պետք է վերադարձվի ՀՀ-ին կամ համայնքներին: Այդ մասին Կառավարության՝ օգոստոսի 6-ի նիստին ասաց վարչապետ Նիկոլ Փաշինյանը: 

«Սա շատ իրատեսական խնդիր է, առավել ևս այն պրոցեսները, որ մենք ընտրություններից հետո տեսնում ենք, նաև հանրության շատ հստակ պահանջ կա ձևակերպված: Ուզում եմ նաև հանրությանը շնորհակալություն հայտնել համբերատարության համար, չնայած ձգձգումները մեզ նույնքան նյարդայնացրել են, ինչքան հանրությանը, բայց, այնուամենայնիվ, մեխանիզմները գործարկված են: 2026-ից մինչև 2031 թվականը 2 մլրդ դոլարի գույք պետք է վերադարձվի պետությանը և համայնքներին բոլոր մեխանիզմների գործարկմամբ»,- եզրափակելով խոսքը՝ հայտարարեց Նիկոլ Փաշինյանը:

Վարչապետը կարևորեց նաև վերադարձված գույքերի հետագա ճակատագիրը՝ տեղեկացնելով, որ առավոտյան «տարօրինակ» նամակ է ստացել քաղաքացուց, ըստ որի՝ այն գույքը, որը վերադարձվել է համայնքին, հիմա համայնքը կրկին ուզում է վերադարձնել այն անձին, ումից վերադարձվել է համայնքին: