Category: News.am

Մեծ Բրիտանիայի 97-ամյա բնակչուհի Բեթթի Բրոմեյջը սահմանել է իր սեփական Գինեսի ռեկորդը՝ դառնալով ինքնաթիռի թևի վրա թռիչք կատարած ամենատարեց կինը, հայտնում է BBC News-ը։

Նա ռեկորդը թարմացրել է կաթվածից ապաքինվելուց ընդամենը մեկ տարի անց։

Չելթենհեմ քաղաքից Բրոմեյջը կատարել է իր վեցերորդ wing walk-ը՝ էքստրեմալ թռիչք, որի ընթացքում մարդը գտնվում է ինքնաթիռի թևի վրա տեղադրված հատուկ հարթակի վրա։ Համարը տեղի է ունեցել երեքշաբթի RFC Rendcomb աերոդրոմում՝ Սայրենսեսթեր քաղաքում, երբ կնոջը 97 տարեկան և 127 օրական էր։

Նախորդ ռեկորդը նա սահմանել էր 2022 թվականին՝ 93 տարեկան հասակում։

«Հակառակ դեպքում ինձ պարզապես ձանձրալի կլիներ ապրելը։ Ես չեմ կարող ավտոմեքենա վարել, վատ եմ տեսնում և երբեմն տխրում եմ։ Այդ պատճառով ուզում եմ անել այն, ինչ ինձ հասանելի է»,- Բրոմեյջը պատմել է BBC հեռուստաալիքին։

2025 թվականի օգոստոսին կինը կաթված էր տարել, որի հետևանքները մինչ օրս ազդում են նրա խոսքի վրա։ Իր նոր թռիչքը նա նվիրել է Cheltenham General Hospital-ի ինսուլտային բաժանմունքի համար միջոցների հավաքմանը, որտեղ բուժում էր ստացել։

«Նրանք այնքան լավ էին հոգ տանում իմ մասին։ Դա ազդել է իմ խոսքի վրա, բայց մնացած առումներով ես շատ լավ եմ»,- ասել է նա։

ԱՄՆ-ն ունի զինամթերքի գրեթե անսահմանափակ պաշարներ, թեև սպառազինության առանձին տեսակներ գտնվում են ավելի պակասուրդային վիճակում, հայտարարել է երկրի նախագահ Դոնալդ Թրամփը, փոխանցում է CNN-ը:

Նրա խոսքով՝ Իրանի հետ մի քանի ամիս տևած պատերազմից հետո որոշ տեսակի զինամթերքներ իսկապես դարձել են պակաս հասանելի, սակայն դա չի ազդում երկրի ընդհանուր մարտունակության վրա:

«Մենք ունենք գրեթե անսահմանափակ պաշարներ: Որոշ տեսակների գծով իրավիճակը փոքր-ինչ ավելի լարված է»,- ասել է Թրամփը՝ Սպիտակ տանը պատասխանելով սպառազինությունների գնումների համար լրացուցիչ ֆինանսավորում տրամադրելու վերաբերյալ Կոնգրեսին ուղղված վարչակազմի հարցման մասին հարցին:

Նախագահը նշել է, որ ԱՄՆ-ն ունի պակաս ժամանակակից զինամթերքի զգալի պաշարներ, մինչ պաշտպանական ձեռնարկություններն ավելացնում են Patriot զենիթային հրթիռների և Tomahawk թևավոր հրթիռների արտադրությունը:

«Մենք ունենք որոշակի տեսակի զինամթերքներ, որոնք, հնարավոր է, այնքան էլ ճշգրիտ չեն… այնքան էլ էլիտար չեն»,- հայտարարել է նա:

Ընդ որում, Թրամփն ընդգծել է, որ Վաշինգտոնն ուշադիր հետևում է առավել ժամանակակից սպառազինությունների պաշարներին:

«Բայց մենք ունենք նաև զինամթերքի այնպիսի տեսակներ, որոնք շատ հզոր են և շատ արդյունավետ, և դրանց պաշարները մեզ մոտ անսահմանափակ են: Այնպես որ, մենք շատ լավ վիճակում ենք»,- ասել է նախագահը:

Նրա խոսքով՝ ԱՄՆ-ն շարունակում է համալրել զինանոցները, քանի որ անհրաժեշտ է պատրաստ լինել հնարավոր նոր հակամարտություններին:

«Մեզ պետք է ավելին ունենալ: Կարող է ծագել ևս ինչ-որ բան, իսկ կարող է և չծագել: Հուսով եմ՝ ուրիշ ոչինչ տեղի չի ունենա: Բայց մենք իսկապես ունենք զինամթերքի հսկայական պաշարներ»,- հայտարարել է Թրամփը:

ԱՄՆ-ի աշխատող բնակիչների գրեթե կեսը մասնագիտական գործունեության մեջ օգտագործում է արհեստական բանականության գործիքներ, ցույց է տվել ոչ առևտրային հետազոտական Epoch AI կենտրոնի և Ipsos հետազոտական ընկերության համատեղ անցկացրած հարցումը, հայտնում է NBC News։

Ըստ հետազոտության՝ աշխատանքի ընթացքում արհեստական բանականություն օգտագործող աշխատակիցների ավելի քան 20%-ը նման գործիքներից օգտվում է ամեն օր։ Հարցվածներից յուրաքանչյուր հինգերորդը հայտարարել է, որ արհեստական բանականությանը հանձնարարում է առաջադրանքներ, որոնք նախկինում կատարում էին գործընկերները կամ կապալառուները։

Հետազոտողները նշում են, որ արհեստական բանականությունը հաճախ աշխատանքային գործընթացների մասէ դառնում՝ ծրագրային ապահովման մշակումից և փաստաթղթերի պատրաստումից մինչև տվյալների վերլուծություն, գների գնահատում և բիզնես հարցերի շուրջ խորհրդատվություն։

«Մարդիկ սովորում են աշխատանքը բաշխել իրենց և արհեստական բանականության միջև։ Առայժմ դա պարտադիր չէ, որ ամբողջական մասնագիտությունների ավտոմատացում նշանակի, սակայն այդ մասնագիտությունների ներսում առանձին առաջադրանքներ արդեն անցնում են արհեստական բանականությանը»,- հայտարարել է Epoch AI-ի հետազոտության ղեկավարներից մեկը՝ Ամրիտա Դասը։

Հարցման տվյալներով՝ մասնակիցների 23%-ը արհեստական բանականությունն օգտագործել է աշխատանքի համար անհրաժեշտ փաստաթղթեր կարդալու, իսկ 22%-ը՝ տվյալներ վերլուծելու կամ գնահատելու համար։

Հետազոտությունն անցկացվել է այն պայմաններում, երբ ամերիկյան ընկերությունները փորձում են որոշել աշխատանքային գործընթացներում արհեստական բանականության ներդրման օպտիմալ եղանակները։ Վերջին տարվա ընթացքում գեներատիվ մոդելներն զգալիորեն ընդլայնել են իրենց հնարավորությունները՝ հարցերին պատասխանելուց և տեղեկություններ մշակելուց մինչև բարդ տեխնիկական առաջադրանքների կատարում, ներառյալ ծրագրային կոդի ստեղծումը։

Աշխատող ամերիկացիների շրջանում ամենահայտնի գործիքը OpenAI ChatGPT-ն է՝ այն օգտագործում է հարցվածների մոտ 34%-ը։ Այնուհետև հաջորդում են Google Gemini-ն (24%) և Microsoft Copilot-ը (15%)։

Միաժամանակ փորձագետներն ընդգծում են, որ արհեստական բանականության ներկայիս տարածումն ավելի շուտ կապված է առանձին առաջադրանքների ավտոմատացման, այլ ոչ թե մասնագիտությունների լիարժեք փոխարինման հետ։

«Շատ եզրակացություններ ցույց են տալիս, որ մարդիկ արհեստական բանականությունն օգտագործում են իրենց աշխատանքի մի մասը կամ առանձին առաջադրանքներ կատարելու, այլ ոչ թե ամբողջ դերը լիովին փոխարինելու համար»,- նշել է AI Now Institute-ի ավագ գիտաշխատող Այյա Իբրահիմը։

Նրա գնահատմամբ՝ արհեստական բանականության զարգացումը ստիպում է նորովի քննարկել աշխատաշուկայի ապագան և փնտրել աշխատատեղեր ստեղծելու ուղիներ, որոնք կներառեն հմտությունների ավելի լայն շրջանակ, ոչ թե միայն առանձին առաջադրանքներ, որոնք կարելի է ավտոմատացնել։

ԱՄՆ նախագահ Դոնալդ Թրամփը հերքել է սպառազինության պաշարների հնարավոր խնդիրների և Պենտագոնի ղեկավար Փիթ Հեգսեթի աշխատանքի վերաբերյալ հաղորդումները՝ լրատվամիջոցներում տարածվող տեղեկությունները անվանելով «կեղծ և բոլորովին անհիմն լուրեր»։

«Կեղծ լուրերը, ինչպես միշտ, տարածում են կեղծ և բոլորովին անհիմն լուրեր։ Ես չափազանց գոհ եմ այն աշխատանքից, որ կատարում է Փիթ Հեգսեթը», — գրել է Թրամփը Truth Social սոցիալական ցանցում։

Ամերիկացի առաջնորդը հայտարարել է, որ ԱՄՆ-ն ունի «զինամթերքի հսկայական ծավալներ», և դրանց արտադրությունը շարունակվում է։ Նրա գնահատմամբ՝ սպառազինության պակասի մասին հաղորդումները հայտնվել են լրատվամիջոցների «կեղծ հրապարակումների» խորաապատկերին։

Թրամփը նաև բարձր է գնահատել Հեգսեթի աշխատանքը Պենտագոնի ղեկավարի պաշտոնում՝ հայտարարելով, որ նախարարը վայելում է զինվորականների հարգանքը և հասել է «հսկայական բարելավումների», ներառյալ DEI-ի (բազմազանություն, հավասարություն և ներառականություն) քաղաքականության չեղարկումը և զինծառայողների հավաքագրման աճը մինչև «պատմական մակարդակներ»։

Մեկնաբանելով Պաշտպանության նախարարության ղեկավարի շուրջ հնարավոր տարաձայնությունների մասին հաղորդումները՝ Թրամփն առանձահատուկ կերպով քննադատել է The Washington Post պարբերականին, որն ավելի վաղ հայտնել էր, թե նա մտահոգված է ամերիկյան զինանոցների վիճակով։

«Այդ լուրը շրջանառության մեջ է դրել The Washington Post-ը՝ ոլորտի ամենավատ լրատվամիջոցներից մեկը, այն դեպքում, երբ մենք նրանց հայտնել էինք, որ իրենց նարատիվը ծայրից ծայր կեղծ է։ Իրականում ես նրանց կեղծ «ռեպորտաժները» դավաճանական եմ համարում»,- հայտարարել է ԱՄՆ նախագահը։

Ավելի վաղ ամերիկյան զանգվածային լրատվամիջոցները Իրանի դեմ ռազմական գործողության ընթացքում սպառազինության լայնածավալ օգտագործումից հետո հաղորդում էին որոշ բարձր ճշգրտության հրթիռների պաշարների հնարավոր կրճատման մասին։ Թրամփի վարչակազմը մերժել է այդ գնահատականները։

Իսրայելական «Մոսադ» հետախուզության նոր ղեկավար Ռոման Գոֆմանը պաշտոնանկ է արել գործակալության երկու բարձրաստիճան պաշտոնյաների, որոնք առնչություն են եղել Իրանում իշխանափոխության անհաջող ծրագրի մշակման հետ, հայտնում է իսրայելական 12-րդ հեռուստաալիքը։

Խոսքը «Մոսադի»՝ անցյալ տարվա դեկտեմբերին հետախուզական վարչության ղեկավարի պաշտոնը ստանձնած անձի և գերատեսչության իրանական ուղղության ղեկավարի մասին է։

Հեռուստաալիքի տվյալներով՝ երկու պաշտոնյաներն էլ մասնակցել են օպերատիվ ծրագրի նախապատրաստմանը, որը նախատեսում էր Իսլամական Հանրապետության ղեկավարության տապալում՝ Իրանի էթնիկ փոքրամասնությունների աջակցությամբ, և նոր կառավարության ստեղծում:

Հաղորդվում է, որ առաջարկը ներկայացվել էր ԱՄՆ նախագահ Դոնալդ Թրամփին, սակայն մի շարք պատճառներով այդպես էլ չի իրագործվել։ Ամերիկացի պաշտոնյաները, ինչպես պնդում են, դեռևս պատերազմի մեկնարկից առաջ զգուշացրել էին Թրամփին, որ Իրանում իշխանափոխության հնարավորության վերաբերյալ իսրայելական գնահատականներն անիրատեսական էին:

Անվտանգության ոլորտի աղբյուրները 12-րդ ալիքին հայտնել են, որ Գոֆմանի և երկու աշխատակիցների միջև տարաձայնություններ են եղել հենց սկզբից։ Ընդ որում, ըստ նրանց, հեռացումները տեղի են ունենում փոխադարձ համաձայնությամբ՝ «Մոսադի» ավելի լայնամասշտաբ վերակազմավորման շրջանակում, իսկ նախկին երկու ղեկավարները կշարունակեն աշխատանքը գերատեսչության կառույցում՝ այլ պաշտոններում։

Մանչեսթերում երկաթուղային երթևեկության կառավարման կենտրոնում էլեկտրամատակարարման խափանումը հանգեցրել է գնացքների աշխատանքի լայնամասշտաբ ընդհատումների Անգլիայի կենտրոնական և հյուսիսարևմտյան շրջաններում, հայտնում է PA Media-ն։

Վթարը տեղի է ունեցել 14:00-ից քիչ առաջ և ազդել է ազդանշանային համակարգի աշխատանքի վրա։

Network Rail համակարգի տվյալներով՝ պատճառն էլեկտրասնուցման խափանումն է եղել Մանչեսթերի երկաթուղիների կառավարման կենտրոնում՝ Ashburys կայարանի մոտ։

Անսարքության պատճառով Մանչեսթեր Պիկադիլի կայարանով գնացքների երթևեկությունը դադարեցվել է։ Խնդիրների մասին հայտնել են CrossCountry Trains և Transport for Wales օպերատորները։

Northern և TransPennine Express ընկերություններն ուղևորներին խորհուրդ են տվել ձեռնպահ մնալ ուղևորություններից՝ նշելով, որ կապի համակարգերի խափանման պատճառով գնացքները չեն կարող անվտանգ երթևեկել։

National Rail համակարգը նախազգուշացրել է, որ երթևեկության լուրջ խախտումները կպահպանվեն առնվազն մինչև օրվա վերջ։ Ամենաշատը տուժել են Մեծ Մանչեսթերի, Միդլենդսի և հյուսիսարևմտյան Անգլիայի երթուղիները։

Մեծ Բրիտանիայի տրանսպորտի նախարար Հայդի Ալեքսանդերը հայտարարել է, որ կանոնավոր թարմացումներ է ստանում իրավիճակի վերաբերյալ, և ուղևորներին կոչ է արել ուղևորություններից առաջ ստուգել տեղեկությունները։

Մանչեսթերի երկաթուղիների կառավարման կենտրոնը բացվել է 2014 թվականին և երկրի ամբողջ երկաթուղային ցանցի կենտրոնացված կառավարմանն աստիճանաբար անցնելու համար ստեղծված նմանատիպ 12 օբյեկտներից մեկն է։

Եթե մոտ ժամանակում Ուկրաինայում հանրաքվե անցկացվեր՝ երկրի՝ Եվրամիությանն անդամակցելու հարցով, ապա անդամակցությանը կողմ կքվեարկեր քաղաքացիների 69,2%-ը, վկայում են SOCIS սոցիոլոգիական խմբի հարցման արդյունքները, հաղորդում է «Европейская правда»-ն։

ԵՄ-ին անդամակցելու դեմ կարտահայտվեր հարցվածների 22,2%-ը, ևս 8,7%-ը չէր մասնակցի քվեարկությանը կամ չէր կողմնորոշվի պատասխանի հարցում։

Միաժամանակ, եվրաինտեգրմանն աջակցության մակարդակն ավելի ցածր է եղել, քան նախորդ մի շարք հարցումներում, սակայն չի հասել վերջին երկու տարվա նվազագույն ցուցանիշներին։

Ուկրաինայի՝ ՆԱՏՕ-ին անդամակցելու վերաբերյալ հանրաքվեի դեպքում դրական պատասխան կտար հարցվածների 61,2%-ը, դեմ կարտահայտվեր 29,5%-ը։ Եվս 9,4% հարցման մասնակիցներ չէին մասնակցի քվեարկությանը կամ չէին կողմնորոշվի։

ՆԱՏՕ-ին անդամակցությանն աջակցությունը փոքր-ինչ աճել է SOCIS-ի նախորդ երկու ուսումնասիրությունների համեմատ, սակայն երկարաժամկետ հեռանկարում նույնպես նվազման միտում է նկատվում։

Հարցումն անցկացվել է 2026 թվականի հուլիսի 28-ից օգոստոսի 2-ը՝ 2000 մարդու շրջանում։ Հետազոտության սխալի սահմանը կազմում է մինչև 2,6%։

Ավելի վաղ Rating Group-ի հունիսյան հարցումը ցույց էր տվել աջակցության ավելի բարձր մակարդակ․ Ուկրաինայի՝ ԵՄ-ին անդամակցությունը հավանություն էր տալիս հարցվածների 79%-ը, իսկ ՆԱՏՕ-ին անդամակցությանը՝ 63%-ը։

Միաժամանակ, Լեհաստանում հուլիսյան ուսումնասիրությունը ցույց է տվել, որ լեհերի ավելի քան կեսը դեմ է Ուկրաինայի՝ Եվրամիությանն անդամակցելուն։

Ավելի քան 25 հազար մարդ է մահացել Եվրոպայում 2026 թվականին ծայրահեղ շոգի պատճառով՝ ըստ Bloomberg գործակալության հավաքած վերջին հասանելի տվյալների:

Մահվան դեպքերի ամենամեծ թիվը գրանցվել է Գերմանիայում. Ռոբերտ Կոխի ինստիտուտի գնահատմամբ՝ ապրիլից սկսած շոգը կարող էր հանգեցնել մոտ 11,9 հազար լրացուցիչ մահվան:

Իսպանիայի, Ֆրանսիայի, Մեծ Բրիտանիայի, Շվեյցարիայի և Նիդեռլանդների պետական գերատեսչությունների և հետազոտական կազմակերպությունների տվյալները ցույց են տալիս, որ տարածաշրջանում շոգի հետ կապված մահերի ընդհանուր թիվը գերազանցել է 25 հազարը:

Գիտնականները նշում են, որ անոմալ բարձր ջերմաստիճանի ժամանակահատվածները դառնում են գնալով ավելի լուրջ սպառնալիք Եվրոպայի բնակչության, հատկապես՝ տարեցների և խրոնիկական հիվանդություններ ունեցող մարդկանց առողջության համար:

ԱՄՆ նախագահ Դոնալդ Թրամփը, հավանաբար, հակված է 2028 թվականի ընտրություններում որպես իր իրավահաջորդ աջակցել փոխնախագահ Ջեյ Դի Վենսին, հաղորդում է The Washington Post-ը՝ հղում անելով աղբյուրներին։

Պարբերականի տվյալներով՝ մոտ երկու շաբաթ առաջ Օվալաձև աշխատասենյակում դոնորների հետ հանդիպման ժամանակ Թրամփն ասել է. «Վերջիվերջո, մեզ պետք է ընտրել Ջեյ Դիին»։ Միաժամանակ աղբյուրը նշել է, որ նախագահը դեռ պաշտոնապես ընտրություն չի կատարել Վենսի և պետքարտուղար Մարկո Ռուբիոյի միջև։

Ներկայում Վենսը համարվում է Հանրապետական կուսակցության կողմից առաջադրման գլխավոր հավանական թեկնածուն, սակայն Ռուբիոն ևս ամրապնդել է իր դիրքերը համազգային հարցումներում, առանցքային նահանգներում վարկանիշներում և ներհուսակցական քվեարկություններում։

Ավելի վաղ Թրամփը բազմիցս դրական էր արտահայտվել Վենսի մասին՝ նրան անվանելով ամենահավանական իրավահաջորդը, սակայն նաև ակտիվորեն աջակցել էր Ռուբիոյին, որը վարչակազմում միաժամանակ մի քանի առանցքային պաշտոններ է զբաղեցնում։

«Փոխնախագահ Վենսը Հանրապետական կուսակցության ապագան է, իսկ Մարկո Ռուբիոն նրա ամենամոտ ընկերներից մեկն է վարչակազմում»,- հայտարարել է Թրամփի քաղաքական շրջապատի ներկայացուցիչներից մեկը։

Աղբյուրների տվյալներով՝ թեկնածուին աջակցելու վերջնական որոշումը կարող է հետաձգվել։ Նախագահի խորհրդականների կարծիքով՝ Թրամփը շահագրգռված է պահպանել ազդեցությունը կուսակցության վրա և չի ցանկանում չափազանց շուտ քաղաքական ուշադրությունը փոխանցել հնարավոր իրավահաջորդին։

2028 թվականի ընտրություններում հանրապետականներին գլխավորելու իրավունքի համար պայքարը դեռ վաղ փուլում է, սակայն Վենսի և Ռուբիոյի միջև դիմակայությունն արդեն դառնում է կուսակցության ներսում գլխավոր ինտրիգներից մեկը։

Associated Press-ը հայտնում է, որ Պուերտո Ռիկոյի իշխանությունները խիստ ծայրահեղ շոգի հետևանքով սրվող երաշտի պատճառով ջրի մատակարարման վրա սահմանափակումներ են մտցնում Սան Խուանում և այլ խոշոր քաղաքներում։

Ուրբաթ օրվանից ավելի քան 180 հազար սպառողներ 48 ժամով կմնան առանց ջրամատակարարման՝ ջրի մատակարարման հերթափոխային գրաֆիկի շրջանակում։

ԱՄՆ-ից կախում ունեցող «չներառված կազմակերպված տարածքի» կարգավիճակով (Commonwealth of Puerto Rico) Պուերտո Ռիկոյի իշխանությունները փորձում են լուծում գտնել իրավիճակի վատթարացման ֆոնին։

«Այս իրավիճակը մեր վերահսկողությունից դուրս է։ Ոչինչ չի կանխում դրա վատթարացումը»,- հայտարարել է Փուերտո Ռիկոյի նահանգապետ Ջենիֆեր Գոնսալեսը։

Հուլիսը Սան Խուանի համար դարձել է ամենաչոր ամիսը ավելի քան 120 տարվա դիտարկումների ընթացքում և քաղաքի պատմության մեջ երկրորդ ամենաշոգ ամիսը։ Ամերիկյան երաշտի մոնիտորինգի տվյալներով՝ Պուերտո Ռիկոյի տարածքի գրեթե մեկ քառորդը գտնվում է խիստ երաշտի պայմաններում, ևս 36%-ը՝ չափավոր երաշտի պայմաններում։

Սան Խուանի Ազգային օդերևութաբանական ծառայության օդերևութաբան Մարիա Նովոա Գարսիան հայտարարել է, որ առաջիկա երկու-երեք շաբաթներին տեղումների քանակը կարող է լինել նորմայից առնվազն 50%-ով ցածր։

«Մենք տեսնում ենք, որ Էլ Նինյոն շարունակում է ուժեղանալ»,- ասել է նա՝ նշելով տաքացման բնական կլիմայական ցիկլի ազդեցությունը։

Սահմանափակումները կվերաբերեն ոչ միայն Սան Խուանին, այլև Կարոլինա, Խունկոս, Գուրաբո, Տրուխիլիոն Ալտո, Կանովանաս և Լոիսա քաղաքների առանձին շրջաններին։

Նահանգապետը չի հստակեցրել, թե որքան ժամանակ կգործեն միջոցառումները։ Պուերտո Ռիկոյի ջրամատակարարման և կոյուղու վարչության ղեկավար Լուիս Գոնսալես Դելգադոն հայտնել է, որ խմելու ջուրը կմատակարարվի բեռնատարներով, առաջնահերթություն կտրվի հիվանդանոցներին և տարեց բնակիչների տներին։

Միաժամանակ, բնակիչների մի մասն արդեն ամիսներ շարունակ բախվում է ջրամատակարարման խափանումների, որոնք ուղղակիորեն կապված չեն երաշտի հետ։ Տեղական իշխանությունները խնդիրը բացատրում են ենթակառուցվածքների մեջ ներդրումների և դրանց սպասարկման բազմամյա պակասով։

Իշխանությունների տվյալներով՝ ավելի վաղ Պուերտո Ռիկոն ջրի մատակարարման սահմանափակումներ էր մտցրել 2015 և 2020 թվականներին, երբ շուրջ 400 հազար սպառողներ ջուր էին ստանում միայն երեք օրը մեկ։