Author: Julbaz

Իրանում ինտերնետի հասանելիությունը բացակայում է արդեն 50 օր։ Այս մասին տեղեկացրել է NetBlocks միջազգային մոնիտորինգային ծառայությունը։

Հայտարարության մեջ նշվում է, որ Իրանն արդեն յոթ շաբաթ է՝ մնում է մեկուսացված գլոբալ համացանցից, իսկ թվային շրջափակումը հասել է 50-րդ օրվան կամ 1 176 ժամի։

Հիշեցնենք, որ փետրվարի 28-ին ԱՄՆ-ը և Իսրայելը ռազմական գործողություններ սկսեցին Իրանի դեմ։ Արդյունքում սպանվեցին Իրանի գերագույն առաջնորդ Ալի Խամենեին և մի շարք բարձրաստիճան պաշտոնյաներ։ Դրանից հետո Իրանը սկսեց հարվածներ հասցնել ոչ միայն Իսրայելին, այլև այն թիրախներին, որոնք նա սահմանել էր Սաուդյան Արաբիայի, Քաթարի, Արաբական Միացյալ Էմիրությունների, Օմանի, Բահրեյնի, Քուվեյթի, Իրաքի և Կիպրոսի տարածքում, որտեղ տեղակայված են ԱՄՆ-ի և նրա դաշնակիցների ռազմակայանները։

Ապրիլի 11-ին Իրանն ու ԱՄՆ-ը Իսլամաբադում անցկացրեցին բանակցությունների մի քանի փուլ։ Իրանական պատվիրակությունը գլխավորում էր խորհրդարանի խոսնակ Մոհամմադ-Բագեր Գալիբաֆը, ամերիկյանը՝ փոխնախագահ Ջեյ Դի Վենսը։ Ավելի ուշ Թեհրանում և Վաշինգտոնում հայտարարեցին, որ կողմերը չեն կարողացել համաձայնության գալ հակամարտության երկարաժամկետ կարգավորման շուրջ՝ մի շարք պահպանվող տարաձայնությունների պատճառով։

Ուկրաինայի ոստիկանությունը ոչնչացրել է Կիևում քաղաքացիների ուղղությամբ անկանոն կրակ բացած և պատանդներ վերցրած անհայտ անձին: Ինչպես հայտնում են լրատվամիջոցները, այս մասին նշել է Կիևի քաղաքապետ Վիտալի Կլիչկոն:

Անհայտ անձը ոչնչացվել է ոստիկանության իրականացրած հատուկ գործողության ընթացքում: Նշվում է, որ իրականացվում են անձի նույնականացման աշխատանքներ:

Փողոցում արձակած կրակոցների հետևանքով սպանվել է 1, վիրավորվել՝ 10 անձ, այդ թվում՝ 1 երեխա:

Իրանի զինված ուժերը պատրաստ են երկրի պաշտպանությանը: Ինչպես հաղորդում է Fars գործակալությանը, այս մասին ասված է Բանակի ազգային օրվա առթիվ Իրանի նախագահ Մասուդ Պեզեշքիանի շնորհավորական ուղերձում:

Պեզեշքիանը, մատնանշելով ներկայիս զգայուն պայմաններում առկա սպառնալիքները, ընդգծել է զինված ուժերի համակարգված գործողություններն ու պատրաստակամությունը երկրի պաշտպանությանը՝ բանակի դերը համարելով վճռորոշ:

Իրանի նախագահը բանակի բացառիկ առանձնահատկություններն է համարել դրա խորը կապը ժողովրդի հետ, ինչպես նաև ակտիվ մասնակցությունը հասարակությանը օգնություն ցուցաբերելու և ծառայելու գործում:

Նշենք, որ Իրանում Բանակի ազգային օրն ամեն տարի նշվում է ապրիլի 18-ին: Այս օրը հիմնադրվել է 1979 թվականին Իսլամական հեղափոխությունից հետո՝ այաթոլլա Խոմեյնիի կողմից՝ նպատակ ունենալով ցուցադրել բանակի համերաշխությունը ժողովրդի հետ:

Հարկ վճարողի օրվան ընդառաջ՝ Պետական եկամուտների կոմիտեի նախագահ Էդուարդ Հակոբյանը հանդիպել է փոքր բիզնեսի ներկայացուցիչների հետ։ Այս մասին հայտնում են ՊԵԿ-ից: Ողջունելով միջոցառման մասնակիցներին՝ ՊԵԿ նախագահը կարևորել է հարկ վճարելու մշակույթի ձևավորումն ու դրա նկատմամբ պատասխանատու և հոգատար մոտեցման ամրապնդումը՝ ընդգծելով հարկ վճարողների հետ ուղիղ շփումների նշանակությունը։

«ՊԵԿ-ի առաքելությունն ու տեսլականը մեզ համար պարզապես ձևակերպումներ չեն․ դրանք մեր ամենօրյա աշխատանքի հիմքն են։ Մեր բոլոր փոփոխությունների կենտրոնում մարդն է, և հենց այդ պատճառով մենք հետևողականորեն շարժվում ենք դեպի բիզնեսին ավելի մոտ և գործընկերային կառույց դառնալու ուղղությամբ»,- նշել է Հակոբյանը:

Հանդիպման ընթացքում տնտեսավարողներին ներկայացվել են վերջին տարիների հարկային և մաքսային բարեփոխումները, առաջիկա ծրագրերը՝ օրենսդրական փոփոխություններից և թվայնացումիցմինչև արհեստական բանականության կիրառումն ու օրինապահ հարկ վճարողների համար նախատեսվող նոր հնարավորությունները։

«Այս ամենի հիմքում նույն գաղափարն է՝ ստեղծել ավելի հարմար, կանխատեսելի և վստահելի միջավայր բիզնեսի համար»,-ընդգծել է Կոմիտեի ղեկավարը։

Էդուարդ Հակոբյանը նշել է, որ առանցքային է բաց ու անկեղծ հաղորդակցությունը հարկ վճարողների հետ:

«Երբ կա փոխվստահություն, պետությունն ու բիզնեսը դառնում են գործընկերներ։ Այդ ճանապարհին արդեն ունենք շոշափելի արդյունքներ՝ ներառյալ ստվերի էական նվազումը, որը ոչ միայն վարչարարության, այլևմտածելակերպի փոփոխության արդյունք է»,- նշել է ՊԵԿ նախագահը:

Հանդիպման ընթացքում բիզնեսի ներկայացուցիչները բարձրաձայնել են իրենց հետաքրքրող հարցերը, ինչպես նաև ներկայացրել են առաջարկներ։

Անթալիայի դիվանագիտական համաժողովի շրջանակներում Հայաստանի արտաքին գործերի նախարարի տեղակալ Վահան Կոստանյանը հանդիպել է Արաբական Միացյալ Էմիրությունների նախագահի դիվանագիտական հարցերով խորհրդական Անվար Գարգաշի հետ: Այս մասին հայտնում են ԱԳՆ-ից:

Զրուցակիցները քննարկել են ՀՀ-ԱՄԷ երկկողմ, մասնավորապես՝ տնտեսական համագործակցությանը վերաբերող հարցեր: Մտքեր են փոխանակվել Մերձավոր Արևելքում տիրող անվտանգային իրավիճակի շուրջ։

ԱԺ «Քաղաքացիական պայմանագիր» խմբակցության պատգամավոր Վահագն Ալեքսանյանն իր ֆեյսբուքյան էջում հրապարակած տեսանյութով անդրադարձել է ընտրակաշառքի գործով ձերբակալված Գոհար Ղումաշյանի («Կալուգացի Սամոյի» թիմակից) պարզաբանումներին։ Պատգամավորը փաստերով ցույց է տվել, թե ինչպես են ընդդիմադիրները փորձում կոծկել ընտրակաշառքի փաստը՝ օգտագործելով վետերանների անունները։

Ըստ Ալեքսանյանի՝ ձերբակալված Ղումաշյանը հայտարարել է, թե ձայնագրության մեջ լսվող նվերի մասին խոսակցությունն ուղղված է եղել 102-ամյա վետերան Ռոզալիա Աբգարյանին՝ ծննդյան օրվա կապակցությամբ։ Սակայն պատգամավորը մատնանշում է աբսուրդի հասնող ժամանակագրական անհամապատասխանություն. խոսակցությունը տեղի է ունեցել ապրիլի կեսերին, մինչդեռ վետերանի ծննդյան օրը հունիսի 17-ին է։

«Հասկանում եք՝ ընտրությունները կլինեն հունիսի 7-ին, և դրանից հետո դեռ 10 օր կմնա մինչև տիկին լեգենդար Ռոզալիա Աբգարյանի ծննդյան օրը։ Բայց չգիտես ինչու «Կալուգացու» թիմակիցները որոշել էին նվերը տալ ապրիլին՝ ընտրություններից ու բուն ծննդյան օրվանից ամիսներ առաջ»,- նշել է Ալեքսանյանը։

Պատգամավորը որպես հակափաստարկ հիշեցրել է նաև նախորդ տարվա փորձը, երբ նույնիսկ Գագիկ Ծառուկյանն էր վետերանին շնորհավորել հենց հունիսի 17-ին և ոչ թե ապրիլին։

«Մեզ փորձում են ապուշի տեղ դնել, ու այս խելքով էլ սրանք ուզում են ինչ-որ բան բացատրել։ Ի՞նչ ասեմ»,- եզրափակել է Վահագն Ալեքսանյանը։

ԱՄՆ նախագահ Դոնալդ Թրամփը քննադատել է Իսպանիայի իշխանություններին՝ հայտարարելով, որ երկրի տնտեսությունը դժվար ժամանակներ է ապրում։ Այս մասին նա գրել է Truth Social սոցիալական ցանցում։

«Որևէ մեկն ուշադրություն դարձրե՞լ է, թե որքան վատ են գործերը Իսպանիայում։ Նրանց ֆինանսական ցուցանիշները, չնայած ՆԱՏՕ-ում և սեփական պաշտպանության գործում գրեթե զրոյական ներդրմանը, պարզապես սարսափելի են։ Տխուր է դրան նայելը»,- նշել է նա։