Իրանական նավահանգիստների արգելափակումը պատերազմի ակտ է և, հետևաբար, հրադադարի ռեժիմի խախտում. այս մասին հայտարարել է Աբբաս Արաղչին:
Առևտրային նավի վրա հարված հասցնելը և դրա անձնակազմին պատանդ վերցնելը նույնիսկ ավելի լուրջ խախտում է, X-ի իր էջում գրել է Իրանի արտգործնախարարը:
«Իրանը գիտի, թե ինչպես չեզոքացնել սահմանափակումները, ինչպես պաշտպանել իր շահերը և ինչպես դիմակայել ճնշումներին»,- հայտարարել է նա:
Խոր ցավով տեղեկացնում ենք, որ կյանքից հեռացել է մեր սիրելի դերասանուհի «Պաուզա Անոյի»՝ Նարինե Ոսկանյանի մայրը՝ Սուսիկը։
Կիսում ենք ընտանիքի վիշտը և հայտնում մեր անկեղծ ցավակցությունները հարազատներին ու մտերիմներին։
Հոգեհանգիստը տեղի կունենա 23.04.2026թ․ ժամը 17։00-ին «Էլար» սգո սրահում (հասցե՝ Արտաշիսյան 46/1)։ Թող նրա հոգին հանգչի խաղաղությամբ։
Այս մասին տեղեկանում ենք ԶԼՄ-ներից:
Amnesty International իրավապաշտպան կազմակերպությունը 2025 թվականին վերաբերող ամենամյա զեկույցում կրկին քննադատել է Հայաստանի ոստիկանությանը:
Հեղինակավոր կառույցը փաստում է, որ ոստիկանության բարեփոխումները, այդ թվում՝ 2024-ին ընդունված նոր օրենքը, որը նպատակ ուներ բարելավել հավաքների ընթացքում ոստիկանության գործողությունները, չհաջողեցին մեղմել ցույցերի ժամանակ անհամաչափ ուժի կիրառման և ոստիկանության հաշվետվողականության պակասի վերաբերյալ մտահոգությունները։
«Սա հատկապես ակնհայտ էր 2024 թվականի մայիս և հունիս ամիսներին տեղի ունեցած հակակառավարական բողոքների ընթացքում արձանագրված մարդու իրավունքների խախտումների դեպքում»,- գրում է Amnesty International-ը՝ նկատի ունենալով «Տավուշը հանուն հայրենիքի» շարժման մասնակիցների և ոստիկանների միջև բախումները:
«Չնայած ոստիկանության կողմից ապօրինի ուժի կիրառման վերաբերյալ բավարար ապացույցներին, հետագայում քրեական վարույթներ հարուցվեցին միայն ցուցարարների դեմ՝ ընդհանուր թվով 16 անձի նկատմամբ, և ոչ մի ոստիկան պատասխանատվության չենթարկվեց», – այսօր հրապարակած զեկույցում գրել է Amnesty International-ը:
Կառույցն անդրադարձել է նաև Սամվել Կարապետյանի կալանավորմանը՝ ակնարկելով, որ դա կապ ուներ նաև Երևանի և Մոսկվայի հարաբերությունների հետ. «Հայաստանի արտաքին քաղաքականության՝ դեպի Արևմուտք ուղղված փոփոխությունը և Ռուսաստանի հետ ավանդական կապերը նվազեցնելու ջանքերը դարձան քաղաքական բաժանարար՝ խթանելով ապատեղեկատվական արշավներ և ատելության խոսք ամբողջ երկրում։ Հունիսին իշխանությունները հայտարարեցին, որ կանխել են պետական հեղաշրջման փորձ՝ ձերբակալելով Ռուսաստանի հետ կապ ունեցող ազդեցիկ գործարարի»,- ասված է զեկույցում։
«Ուժեղ Հայաստան» դաշինքը համագումար է անցկացրել։
Հայտնի է դարձել ընտրական ցուցակի առաջին հնգյակը: Ընտրական ցուցակը գլխավորում է «Ուժեղ Հայաստան» կուսակցության քաղաքական խորհրդի անդամ Նարեկ Կարապետյանը․
«Ուժեղ Հայաստան» դաշինքի ընտրական ցուցակի պատգամավորության 1-ից 18 թեկնածուները․
Նարեկ Կարապետյան
Արամ Վարդևանյան
Գոհար Մելոյան
Դավիթ Ղազինյան
Ռուբեն Մխիթարյան
Արեգա Հովսեփյան
Մամիկոն Ասլանյան
Ավետիս Առաքելյան
Մարիաննա Ղահրամանյան
Հայկ Սուքիասյան
Արգիշտի Դարբինյան
Իրինա Յոլյան
Էդգար Ղազարյան
Տիգրան Աբրահամյան
Լենա Մաթևոսյան
Անդրանիկ Գևորգյան
Լիլյա Շուշանյան
Գրիշա Թամրազյան
Aravot.am-ի տեղեկություններով, մի քանի օր առաջ՝ ապրիլի 15-ին, ծեծկռտուք է տեղի ունեցել Գյումրու Անի թաղամասի «Հակոբ Մծբնեցի» եկեղեցու բակում։ Ժամը 24․00-ի սահմաններում ոստիկանություն է ահազանգել մի քաղաքացի՝ տեղեկացնելով, որ եկեղեցու հետնամասում իրար են ծեծում։
Դեպքի վայր մեկնած օպերատիվ խումբը ու պարեկային ծառայության կարգախումբը պարզել են, որ այդ նույն թաղամասի 45-ամյա բնակիչներից մեկը մոտ մեկ ժամ առաջ վարորդներից մեկին զգուշացում է կատարել «Opel» մակնիշի մեքենան անկանոն վարելու համար, որից հետո վարորդը և երկու ուղևորները իջել են ավտոմեքենայից ու ձեռքերով-ոտքերով հարվածներ են հասցրել նախազգուշացնող տղամարդու մարմնի տարբեր մասերին՝ պատճառելով վնասվածքներ։
Ամբողջական հոդվածը՝ սկզբնաղբյուր կայքում:
Ապարանի ջրամբարի լցվածության մակարդակը պաշտոնական աղբյուրներում հրապարակված տվյալներով՝ կտրուկ փոփոխություների է ենթարկվել վերջին շաբաթների ընթացքում։ Oragir.News-ի տեղեկություններով բոլորովին վերջերս մոտավորապես 25% էր լցվածությունը, այսօր արդեն՝ 52%-ից մի փոքր պակաս։
Այս խնդրի վերաբերյալ Oragir.News-ը հարցում էր ուղարկել ՀՀ շրջակա միջավայրի նախարարություն՝ խնդրելով պարզաբանել՝ Ապարանի ջրամբարի լցվածությունն ինչպես է գնահատվում, քանի որ մեր տեղկությունների համաձայն իրական թիվը 25% է։
Մենք նաև խնդրել էինք պարզաբանել՝ նման իրավիճակը կարո՞ղ է նպաստել Սևանա լճից ջրառի ավելացմանը, ենթադրաբար՝ լճի մակարդակի չափից ավելի բարձրացումը կանխելու նպատակով։
Հարցումից անցել է շուրջ 9 օր, գերատեսչությունից պատասխան դեռ չենք ստացել։
Հիշեցնենք՝ Oragir.News-ի տեսախցիկը ֆիքսել էր, որ Ապարանի գետը տվյալ ժամանակահատվածում ունեցել է զգալի հոսք։ Տեսանելի է, որ ջրի ծավալը բավարար է կուտակման համար, ինչը հարց է առաջացնում՝ արդյո՞ք հնարավոր չէր այդ ռեսուրսը պահպանել ջրամբարում, այլ ոչ թե բաց թողնել գետի հունով։
Նկատենք, որ Հայաստանում հաճախ արձանագրվում է մի խնդիր, երբ գարնան ամիսներին ջրամբարները ամբողջությամբ չեն լցվում, ջրի զգալի մասը հոսում է գետերով, մինչդեռ ամռանը ոռոգման ջրի պակասը լրացվում է Սևանա լիճից հավելյալ ջրառի հաշվին։
Oragir.News-ն այս թեմայով իր նախորդ հրապարակման մեջ բարձրացրել է վարկած, ըստ որի՝ Սևանի ջրի մակարդակի բարձրացումը կարող է ջրով կամ մամուռով ծածկել ափամերձ հանգստյան գոտիներն ու բնակավայրերը, և այդ պատճառով հնարավոր է նախընտրելի համարվի սահմանափակել ջրամբարների, այդ թվում՝ Ապարանի լցվածությունը՝ շարունակելով Սևանից ջրառը։
Շրջակա միջավայրի նախկին փոխնախարար Այսեր Ղազարյանն, Oragir.News-ի հետ զրույցում անդրադառնալով խնդրին, նշեց, որ ջրամբարների լցվածության նման արագ աճը տեսականորեն հնարավոր է միայն որոշակի պայմաններում՝ առատ տեղումների կամ ինտենսիվ հալոցքների դեպքում։ Սակայն հաշվի առնելով ներկայիս եղանակային պայմանները՝ նման կտրուկ փոփոխությունը լիովին բնական համարել դժվար է։
«Այս տարի առատ տեղումների պայմաններում որոշակի բարձրացումներ հնարավոր են, և դրանք կարող են լինել ավելի մեծ, քան նախորդ տարիներին։ Սակայն չեմ կարծում, որ մի շաբաթվա ընթացքում նման աճը կարող է բացառապես բնական պատճառներով պայմանավորված լինել։ Ներկայումս եղանակը բավականին ցուրտ է, ինտենսիվ հալոցքներ դեռևս չեն սպասվում, և զգալի փոփոխությունները կարող են սկսվել ավելի ուշ փուլում։ Ընդհանուր առմամբ, ոլորտում առկա են մի շարք համակարգային և կառավարման խնդիրներ, որոնց համեմատ տվյալների նմանատիպ տատանումները երկրորդական նշանակություն ունեն և չեն հանդիսանում առաջնային վերլուծության առարկա»,- կարծիք հայտնեց փորձագետը։
Խնդիրը, սակայն, միայն թվերի ճշգրտությունը չէ։ Հարց է առաջանում՝ արդյո՞ք ջրամբարների կառավարումը իրականացվում է արդյունավետ և ռազմավարական մոտեցմամբ։
Մասնավորապես, հաճախ բարձրաձայնվում է այն մտահոգությունը, որ ջրային ռեսուրսների ոչ արդյունավետ կառավարումը կարող է հանգեցնել ջրի ավելորդ բացթողման՝ այն ուղղելով դեպի հարևան երկրներ, մինչդեռ ամռանը առաջանում է ոռոգման ջրի պակաս։
Այս համատեքստում հաճախ հիշատակվում է նաև Սևանա լիճի դերը, որը շարունակում է մնալ Հայաստանի հիմնական ջրային «ապահովագրական պաշարը»։ Ամառային սեզոնին ջրամբարների թերի լցվածության կամ սխալ կառավարման պատճառով ստիպված են լինում մեծացնել Սևանից ջրառը, ինչը երկարաժամկետ էկոլոգիական ռիսկեր է առաջացնում։
Oragir.News-ի հարցին՝ հնարավո՞ր է գործ ունենք կառավարման խնդիրների կամ կանխամտածված քաղաքականության հետ, մեր զրուցակիցը պատասխանեց․
«Չի կարելի բացառել որևէ սցենար։ Հայաստանում երբեմն նկատվում են ինչպես համակարգային թերությունների, այնպես էլ մասնագիտական մոտեցման պակասի հետևանքով ձևավորված իրավիճակներ, որոնք որոշ դեպքերում կարող են նաև դիտարկվել որպես նպատակային գործողությունների արդյունք։ Խնդիրը բազմաշերտ է և պահանջում է առանձին ու մանրակրկիտ ուսումնասիրություն»։
Oragir.News-ը թեմայի շրջանակում հարցումներ է ուղարկել թե՛ ՀՀ Ջրային կոմիտե, թե՛ Շրջակա միջավայրի նախարարություն։ Պատասխանները ստանալուն պես ևս մեկ անգամ կանդրադառնանք խնդրին։
Հասմիկ Մովսիսյան
Դիզայներ և երգչուհի Անահիտ Սիմոնյանը ով տևական ժամանակ է՝ բնակություն է հաստատել ԱՄՆ-ում, շարունակում է մնալ հանրության ուշադրության կենտրոնում իր էպատաժային և համարձակ ոճով։
Այս անգամ Անահիտը ներկայացել է հերթական տպավորիչ կերպարով, որն անմիջապես քննարկումների առիթ է դարձել հետևորդների շրջանում։
Սակայն լուսանկարից բացի, երկրպագուների հետաքրքրությունը շարժել է նաև նրա խորհրդավոր գրառումը։ Անահիտն ակնարկել է, որ շուտով ներկայանալու է նոր նախագծով կամ նորությամբ, բայց առայժմ գերադասել է փակ պահել բոլոր փակագծերը։
«Շուտով…»,- կարճ մակագրել է նա՝ ստիպելով հետևորդներին գուշակություններ անել՝ արդյո՞ք խոսքը նոր երգի, թե՞ նորաձևության ոլորտում հերթական հավաքածուի մասին է։
«Անկեղծ՝ ինձ համար զարմանալի էր, որովհետև լարվածության մասին ինֆորմացիա չկա, ամեն դեպքում գոնե ես ամբողջ օրը այստեղ եմ»,- Oragir.News-ի հետ զրույցում ասացին «Երևան ավտոբուս» ՓԲԸ-ից՝ անդրադառնալով մամուլում շրջանառվող այն լուրերին, թե ընկերությունում իրավիճակը լարված է, և վարորդները պատրաստվում են միահամուռ կերպով թողնել աշխատանքը։
Ավելի վաղ լուրեր էին տարածվել, որ ավտոբուսների վարորդները դժգոհում են իրենց վրա դրված հսկիչի պարտականություններից և խիստ ծանրաբեռնված աշխատանքային գրաֆիկից՝ սպառնալով դադարեցնել աշխատանքը, եթե հարցին լուծում չտրվի։
Oragir.News-ի հետ զրույցում ՓԲԸ-ի ներկայացուցիչը, մեկնաբանելով տարածված տեղեկությունը, նշեց, որ այնտեղ խոսում է ընդամենը մեկ հոգի, որի ձայնը փոխված է, ինչը թույլ չի տալիս նույնականացնել նրան կամ հաստատել, որ նա իրականում վարորդ է։
Նշեց նաև, որ վարորդների աշխատանքից ազատման կամ ընդունման գործընթացում որևէ արտառոց բան չկա։
«Մեծ հիմնարկ է, լինում են դեպքեր, 1000 պլյուս 1500-ի մոտ վարորդներ են, տարբեր պատճառներով և՛ դուրս եկող վարորդ է լինում, և՛ ընդունվող վարորդ է լինում, սովորական ընթացիկ աշխատանքային վիճակ է»,- ասաց նա։
«Երևան ավտոբուս» ՓԲԸ- մամուլի խոսնակ Գեղամ Ասատրյանը տեղեկացրեց, որ աշխատանքային ժամերի հարցում ևս որևէ փոփոխություն չի կատարվել։
Անդրադառնալով վարորդների վրա դրված հավելյալ վերահսկողական գործառույթներին՝ նա ընդգծեց, որ վճարումների նկատմամբ հետևողական լինելը միշտ էլ եղել է վարորդների պարտականությունը։
«Վարորդները աշխատանքային պայմանագրերից բխող գործառույթներ են իրականացնում, որևէ նորություն էդտեղ չկա, պարզապես տարբեր հանգամանքներից ելնելով որոշակի ժամանակահատված էդտեղ մի փոքրիկ կետանցում էր եղել՝ վարորդները հետևողական չէին վճարումներին»։
Այն հարցին, թե արդյո՞ք վարորդները որևէ պահանջներ ներկայացրել են իրենց գրաֆիկի փոփոխության կամ վերահսկիչ գործողությունները իրենց վրայից վերցնելու համար, Ասատրյանը պատասխանեց. «Հերքում եմ, որ վարորդները «Երևան ավտոբուս» ՓԲԸ-ի տնօրինությանը որոշակի պահանջներ ներկայացրած լինեն»։
Հիշեցնենք, որ ըստ նախօրեին մամուլում տարածված լուրի՝ ավտոբուսի վարորդները մտադիր են դուրս գալ աշխատանքից, եթե չկարգավորվեն մի շարք հարցեր:
Փաշինյանի ներկայացրած նախընտրական ծրագիրը լուրջ չի ընդունվում քաղաքական համայնքի կողմից, քանի որ նա մի քանի տարի առաջ լրիվ հակառակ բան էր ասում։
Հետևաբար՝ կա ողջամիտ կասկած, որ մի քանի տարի անց այլ բան կասի՝ մարդկանց հավի տեղ դնելով։
Այսպես՝ 2020-ի հոկտեմբերի 30-ին նա ընդարձակ ասուլիս էր կազմակերպել՝ պատասխանել եվրոպական լրատվամիջոցների հարցերին, չբարեկամաբար արտահայտվել Թուրքիայի մասին, հանդիմանել Եվրոպային, որը չի տեսնում Թուրքիայի հակահայ, հակաքաղաքակրթական, հակաեվրոպական քայլերը։
«Թուրքիան այստեղ եկել է ոչ այնքան Լեռնային Ղարաբաղի հարցի կարգավորման գործում Ադրբեջանին աջակցելու, որքան իր կայսերական քաղաքականությունը շարունակելու։
Այստեղ տեղի ունեցողը շարունակությունն է այն քաղաքականության, որ Թուրքիան վարում է Միջերկրականում՝ Հունաստանի, Կիպրոսի նկատմամբ, Լիբիայում, Սիրիայում և Իրաքում։ Եվ իմ արձանագրումը կրկին մեկն է՝ որ դա կայսերական քաղաքականություն է, որովհետև Հարավային Կովկասում, ըստ էության, հայերը վերջին խոչընդոտն են Թուրքիայի ճանապարհին՝ շարունակելու իրենց կայսերական քաղաքականությունը դեպի հյուսիս-արևելք և հարավ-արևելք։
Իմ գնահատականը շարունակում է մնալ նույնը. եթե արևմտյան հանրությունը Թուրքիայի այս գործողությունները համարժեք գնահատականի չարժանացնի, ոչ հեռավոր ապագայում հարկ է Թուրքիային սպասել Վիեննայի մերձակայքում»,- ասել է ՔՊ առաջնորդը, ապա հավելել. «Ես պետք է մտածեմ Երևանի, Հայաստանի և հայ ժողովրդի անվտանգության մասին, Վիեննայի անվտանգությունն իմ աշխատանքային տրամաբանության մեջ չի մտնում, հետո թող հանկարծ չասեն՝ չզգուշացրեցինք»։
Այս խոսքն ուղղված էր Եվրոպային, զգուշացնում էր, որ Թուրքիան կարող է ներխուժել Վիեննա, այսինքն՝ ԵՄ։ Այս հանդիմանությամբ հանդես եկող Փաշինյանը, հավանաբար, ակնկալում էր, որ Եվրոպան կամաչի ու այնպիսի կոշտ միջոցներ կձեռնարկի Թուրքիայի դեմ, որ կկանգնեցնի 44-օրյա պատերազմը։
Լրիվ այլ դիրքորոշում է արտահայտում նա այսօր Թուրքիայի և Եվրամիության վերաբերյալ։ 2020-ին նա զգուշացնում էր, որ Եվրոպայի դարպասները փակեն Թուրքիայի առաջ։ Իսկ հիմա նա հայտարարում է, թե ուզում է բացել Հայաստանի դարպասները Թուրքիայի առաջ։ Թուրքիայի և Ադրբեջանի հետ հարաբերությունների զարգացումը համարվում է կենսական նշանակություն ունեցող տարածաշրջանային ուղղություն։
Միանգամից նկատենք, որ թե՛ 2020-ի հոկտեմբերի 30-ին արտահայտած, թե՛ ներկայում՝ ՔՊ-ի նախընտրական ծրագրում ներկայացրած դիրքորոշումները կտրված են քաղաքական ռեալությունից, կիսատ-պռատ, սիրողական մոտեցումներ են, որոնք կարող էր արտահայտել սկսնակ քաղաքական գործիչը, որը աշխարհաքաղաքականության, Հայաստանի քաղաքական օրակարգի մասին շատ սակավ գիտելիքներ ու տեղեկատվություն ունի։
Այս տպավորությունն էլ հակատրամաբանական է, քանի որ Նիկոլ Փաշինյանը, լինելով պետության բարձրագույն պաշտոնյան, չէր կարող այսքան սակավակիրթ ու ապատեղեկացված լինել ո՛չ 2020-ի հոկտեմբերի 30-ին, ո՛չ էլ առավել ևս հիմա։ Հետևաբար՝ ողջամիտ կասկած է ծագում, որ նա միտումնավոր էր ապաքաղաքական, անտրամաբանական, քաղաքական ռեալության հետ կապ չունեցող բաներ ասում։ Նույնպես՝ այսօր ողջամիտ կասկած կա, որ Փաշինյանը շարունակում է ապակողմնորոշել հասարակությանը, սակավակիրթ, անտեղյակ ձևանալ։
Օրինակ՝ Փաշինյանը կարո՞ղ է բացատրել, թե ինչո՞ւ էր 2020–2021-ին Թուրքիայի հանդեպ թշնամաբար վերաբերվում, իսկ հիմա՝ բարեկամաբար։ Ի՞նչ է փոխվել Թուրքիայում ու Հայաստանում այս ընթացքում։ Եթե ՔՊ-ական իշխանությունը հրաժարվում է Արցախից, Հայոց ցեղասպանությունը չի համարում արտաքին քաղաքական առաջնահերթություն և պատրաստ է ԹՐԻՓՓ-ով ճանապարհ տրամադրել Թուրքիային դեպի Ադրբեջան և Ասիա, ապա ինչո՞ւ է Թուրքիան շարունակում փակ պահել հայ-թուրքական սահմանը։ Ինչո՞ւ են թուրք պաշտոնյաներն ու քաղաքագետները ծիծաղում, երբ լրագրողները հայ-թուրքական սահմանի բացման մասին հարց են տալիս նրանց։ Նրանք Փաշինյանի վրա՞ են ծիծաղում, թե՞ հայ ժողովրդի։
Կամ շատ պարզ հարց. ինչպե՞ս են Գյումրի-Թուրքիա սահմանի երկաթգիծ կառուցելու ծրագրային կետն իրականացնելու, եթե ՀԿԵ-ի կոնցեսիան հետ չեն վերցնում, ռուսներն էլ մատը մատին չեն խփում։շ
Կարճ ասած՝ Թուրքիային ու Եվրոպային վերաբերող պարզ հարցեր են թևածում օդում Փաշինյանի ներկայացումից հետո։ Ինչո՞ւ ԵՄ-ին միանալու գործընթաց սկսելու մասին օրենքն ընդունելուց հետո ոչինչ չեն անում այդ ուղղությամբ, նույնիսկ ԵՄ-ին անդամակցելու հայտ չեն ներկայացնում։
Նշենք, որ հայ-թուրքական սահմանը, ըստ էության, ՀՀ–ԵՄ մաքսային սահմանն է։ Այսինքն՝ բացելով Հայաստան–Թուրքիա սահմանը՝ ՀՀ տնտեսությունն էր բացվում եվրոպականի առաջ։
Փաշինյանն ինչքա՞ն կարող է անգործություն դրսևորել Հայաստանի իրական ապաշրջափակման հարցում։ Գուցե ի՞նքն է Էրդողանին խնդրում, որ հայ-թուրքական սահմանը փակ պահեն, որ ՀՀ տնտեսությունը ռուսական սայլին կապված մնա։
Թաթուլ Մկրտչյան
Երևանում ապրիլի 21-ի ցերեկը, 22-ի գիշերը, 23-25-ին կեսօրից հետո, 26-ին գիշերը և կեսօրից հետո սպասվում է անձրև և ամպրոպ, ամպրոպի ժամանակ՝ քամու ուժգնացում մինչև 16-19մ/վ արագությամբ։ Ապրիլի 22-ի ցերեկը, 23-25-ի գիշերային ժամերին սպասվում է առանց տեղումների եղանակ։
Հանրապետության տարածքում ապրիլի 21-ի և 24-ի ցերեկը շրջանների զգալի մասում սպասվում է անձրև և ամպրոպ, առանձին հատվսծներում՝ ինտենսիվ։ Ապրիլի 22-ի գիշերը, 23-ի ցերեկը, 24-ի գիշերը, 25-26-ին առանձին շրջաններում սպասվում է կարճատև անձրև և ամպրոպ։ Ապրիլի 22-ի ցերեկը, 23-ի գիշերը սպասվում է առանց տեղումների եղանակ։
Քամին` հարավարևմտյան` 2-5 մ/վ, ամպրոպի ժամանակ սպասվում է նաև քամու ուժգնացում 16-20մ/վ արագությամբ:
Օդի ջերմաստիճանն աստիճանաբար կբարձրանա ապրիլի 22-23-ի ցերեկային ժամերին՝ 4-6, ապրիլի 23-24-ի գիշերային ժամերին՝ 2-4 աստիճանով։