Ավելի վաղ գրել էինք` մայիսի 22-ի վաղ առավոտյան ՀՀ Հակակոռուպցիոն կոմիտեի աշխատակիցները գործողություններ են իրականացրել Գյումրիում: Շուրջ 7 ժամ տևած խուզարկություններ են արվել ԱԺ պատգամավոր, առաջիկա խորհրդարանական ընտրություններում «Բարգավաճ Հայաստան» կուսակցության ցուցակով առաջադրված Մարտուն Գրիգորյանի առանձնատանը, մեքենայում և նախընտրական շտաբերում: Խուզարկությունների ընթացքում իրավապահները փնտրել և առգրավել են համակարգիչներ, փաստաթղթեր և էլեկտրոնային տեղեկատվական կրիչներ։
Մեր տեղեկություններով, քննիչները առգրավել են նաև պատգամավորի բջջային հեռախոսը:Չնայած նրան, որ իրավապահներն իրավունք չունեին վերցնելու նրա հեռախոսը՝ հաշվի առնելով Գրիգորյանի պատգամավորական անձեռնմխելիությունը։ Իրավապահները, սակայն, այդպես էլ չեն գտել այն, ինչը ժամերով փնտրել են։ Մեր աղբյուրը պատմեց, որ փնտրած «չեկերը կամ ֆինանսական փոխանցումները» այդպես էլ չեն գտել, ինչից բավական զայրացել են ու տակնուվրա արել գլխավոր շտաբը։
Արդյունքում ձերբակալվել է Մարտուն Գրիգորյանի թիմի երկու անդամ։Ինչպես արդեն տեղեկացրել էինք, ձերբակալված երկու անձանցից մեկը Գյումրու ավագանու անդամ Արտակ Հովսեփյանն է ։
Ի դեպ, իրավապահները մինչ օրս չեն հանրայնացրել ձերբակալվածների կոնկրետ անունները։ Ըստ Հակակոռուպցիոն կոմիտեի տարածած նախնական տվյալների՝ Գրիգորյանի թիմակիցներին ձերբակալել են և քրեական վարույթ հարուցել նախընտրական շրջանում «բարեգործության արգելքը» խախտելու հոդվածով: Իբրև թե բարեգործության անվան տակ, Գյումրիի բնակիչներից մեկի տան վերանորոգման համար անհատույց շինանյութ է տրամադրվել, ինչը քննչական մարմինը դիտարկում է որպես ընտրողներին կաշառելու փորձ:
Միևնույն ժամանակ արդեն իսկ ակտիվորեն շրջանառվում են տեղեկություններ, թե իրավապահների ձեռքի տակ եղած կամ գործով անցնող գաղտնալսումների ձայնագրություններում հստակ լսվում է հենց անձամբ Մարտուն Գրիգորյանի ձայնը։ Մինչդեռ, մեր աղբյուրի փոխանցմամբ, խոսակցությունը վերաբերում է նախընտրական շրջանում իրականացվող «աջակցության» կազմակերպչական հարցերին, ինչը փորձ է արվում օգտագործել որպես ուղիղ ապացույց ։ Գրիգորյանի թիմակրցները վստահ են` Գյումրիում ծավալվող այս իրադարձությունները, խուզարկությունների շեշտակի թափը և նախընտրական փուլում հանրությանը հրամցվող «արտահոսքերը» տեղավորվում են մեկ ընդհանուր տրամաբանության մեջ՝ գործող իշխանությունն օգտագործում է վարչական ու իրավական ողջ արսենալը՝ ընդդիմադիր դաշտը կազմալուծելու և սեփական դիրքերն անձեռնմխելի պահելու համար։ Մարտուն Գրիգորյանին թիրախավորելն էլ պատահական չէ։
Նա Շիրակի մարզում, և հատկապես Գյումրիում, ունի ձևավորված, կայուն և ծանրակշիռ ընտրազանգված, որը տարիներ շարունակ հավատարիմ է մնացել նրան։ Այդ ամենի լավագույն ապացույցը Գյումրիի ՏԻՄ վերջին ընտրություններն էին, որտեղ քաղաքապետի ընտրության և ավագանու կազմի ձևավորման հարցում Մարտուն Գրիգորյանն ու իր թիմը խաղացին վճռորոշ դեր՝ թույլ չտալով գործող իշխանությանը քաղաքում հասնել միանձնյա և բացարձակ հսկողության։
Այսպես կոչված «ընտրակաշառքի» կամ «նախընտրական բարեգործության արգելքի» հոդվածները կիրառվում են ծայրահեղ ընտրողական սկզբունքով։ Այն, ինչ իշխանական թեկնածուների պարագայում ներկայացվում է որպես «պետական սուբվենցիոն ծրագիր» կամ սովորական աշխատանք, ընդդիմադիրների դեպքում ակնթարթորեն որակվում է որպես քրեորեն պատժելի արարք։ Շինանյութի տրամադրման պատմությունը դառնում է առիթ՝ 7-ժամյա խուզարկություններ անելու և պատգամավորական անձեռնմխելիություն ունեցող անձի հեռախոսն առգրավելու համար, ինչի նպատակն է խզել թեկնածուի կապը շտաբների հետ։ Երիտասարդ իրավաբան Արտեմ Մնացականյանը մեզ հետ զրույցում նկատում է, որ Մարտուն Գրիգորյանի ձայնի առկայության մասին լուրերի կազմակերպված տարածումը դասական PR տեխնոլոգիա է։ «Նախաքննական գաղտնիք հանդիսացող նյութերը կամ կտրտված ձայնագրությունները միտումնավոր հանրայնացվում են նախքան դատարանի որոշումը՝ ապահովելու համար «մեղավորության կանխավարկածը»։ Սրանով իշխանությունը փորձում է հանրային ընկալման մեջ վարկաբեկել ընդդիմադիր առաջնորդներին և հոգեբանական առավելություն ստանալ քվեարկությունից առաջ։
Բացի այդ, Գյումրու ավագանու անդամների և առանցքային թիմակիցների ձերբակալությունը հարված է շտաբի կազմակերպչական ողնաշարին։ Թիրախավորելով տեղերում աշխատող ակտիվիստներին՝ իշխանությունը երկակի նպատակ է հետապնդում.
Ֆիզիկապես մեկուսացնել այն մարդկանց, ովքեր ունակ են ձայներ մոբիլիզացնել։
Վախի ազդակ հղել շարքային քաղաքացիներին ու մյուս համակիրներին, որ ընդդիմության կողքին կանգնելը կարող է ավարտվել բանտով կամ խուզարկություններով։
Մարտուն Գրիգորյանի և նրա թիմի դեմ իրականացվող այս արշավը ցույց է տալիս, որ գործող վարչախումբը, չունենալով բավարար քաղաքական արգումենտներ և վստահություն Շիրակի մարզում, անցել է ուժային ճնշումների տակտիկային։ Սա ժողովրդավարական ինստիտուտների դեգրադացիայի և ընտրական գործընթացները բացառապես վարչական մամլիչով վերահսկելու ձգտման հերթական ապացույցն է»֊ ասում է իրավաբանը։
