Category: TopNews.am

Հորմուզի նեղուցով նավթի առաքումները լիովին չեն դադարել՝ չնայած Իրանի և ԱՄՆ-ի միջև համաձայնագրի բացակայությանը, երկուշաբթի հաղորդել է CNN-ը։

«Մինչև 5 միլիոն բարել նավթ է անցնում Պարսից ծոցի Օմանի ափերի մոտ գտնվող հարավային միջանցքով»,- հաղորդել է հեռուստաալիքը՝ հղում անելով նավագնացության աղբյուրներին։

CNN-ի տվյալներով՝ նավերի երթևեկությունը շարունակվում է՝ «չնայած իրանական անօդաչու թռչող սարքերի պարբերական հարձակումներին»։

Հեռուստաալիքի տվյալներով՝ նավթի առաքումները ներկայումս կազմում են օրական մոտավորապես 3-5 միլիոն բարել։

Մինչդեռ, Մերձավոր Արևելքի հակամարտությունից առաջ Պարսից ծոցից Հորմուզի նեղուցով օրական միջինում ստացվում էր մոտ 20 միլիոն բարել նավթ, որը կազմում էր համաշխարհային մատակարարման մոտ 20%-ը, նշում է CNN-ը։

Գելենջիկի մոտակայքում գտնվող Արխիպո-Օսիպովկա ավանի վրա անօդաչու թռչող սարքերի հարձակման հետևանքով զոհվել է 6 մարդ, ևս 47-ը ստացել են տարբեր աստիճանի վնասվածքներ։

Տեղական իշխանությունները և Կրասնոդարի երկրամասի նահանգապետ Վենիամին Կոնդրատևը հայտնել են, որ քաղաքացիական ենթակառուցվածքներին հարվածը հասցվել է զբոսաշրջային սեզոնի թեժ պահին։

Զոհվածների թվում կա երեք երեխա։ Ըստ Գելենջիկի քաղաքապետ Ալեքսեյ Բոգոդիստովի՝ տուժածներից առնվազն 17-ը հոսպիտալացվել են Գելենջիկի, Տուապսեի և Գորյաչի Կլյուչի բժշկական հաստատություններում, իսկ ծանր վիճակում գտնվողներին տեղափոխել են հարակից խոշոր քաղաքների հիվանդանոցներ։ Դեպքի վայրում շարունակում են աշխատել արտակարգ իրավիճակների ծառայությունները՝ վիրավորների վերջնական ցուցակները ճշտելու և հետևանքները վերացնելու նպատակով։

Իրանի նախագահ Մասուդ Փեզեշքիանը հայտարարել է, որ անհրաժեշտ է համոզել Վաշինգտոնին կատարելու փոխըմբռնման հուշագրի պայմանները, քանի որ դրանից է կախված Մերձավոր Արևելքի անվտանգությունը:

«Մենք պետք է ձգտենք համոզել թշնամուն հավատարիմ մնալ ստորագրվածին։ Երկրի, տարածաշրջանի և մեր դաշնակիցների անվտանգությունը կամրապնդվի այդ հուշագրի շնորհիվ»,- գրել է նա X սոցիալական ցանցում։

Փեզեշքիանը վստահություն է հայտնել, որ հուշագիրն ապագայում կդառնա Իրանի միջազգային հարաբերությունների հիմքը։

Հունիսի 18-ի գիշերը ԱՄՆ-ն և Իրանը հուշագիր են ստորագրել, որով նախատեսվում է ավարտել փետրվարի 28-ին սկսված հակամարտությունը: Փաստաթղթում, մասնավորապես, տեղ են գտել Հորմուզի նեղուցի բացումն ու Թեհրանի հավաստիացումները, որ միջուկային զենք մշակելու ծրագրեր չունի:

Հունիսի 26-ի լույս 27-ի գիշերը, սակայն, ԱՄՆ-ն սկսել է կետային հարվածներ հասցնել Իրանին՝ ի պատասխան Հորմուզի նեղուցում նավերի գնդակոծության: Ավելի ուշ Վաշինգտոնն ընդլայնել է հարվածների շրջանակը՝ դրանք չկապելով նեղուցով անցնող նավագնացության շուրջ վեճերի հետ։

Կիրակի գիշերը ԱՄՆ նախագահ Դոնալդ Թրամփը հայտարարել է, որ որոշել է չշարունակել Իրանի դեմ նախատեսված ավելի մեծ հարվածները, քանի որ ցանկանում է արագ և խաղաղ ճանապարհով հասնել իր նպատակներին։

Ազգային ժողովի նախագահ Ռուբեն Ռուբինյանի՝ օգոստոսի 3-ի կարգադրություններով ԱԺ նախագահի խորհրդականներ են նշանակվել Գրետա Զորունցը և Արման Բարխուդարյանը։

Լուսինե Բեկչյանը և Էլինա Իշխանյանը նշանակվել են Ազգային ժողովի նախագահի օգնականներ։

1lurer.am

Վերջին շաբաթներին Հայաստանում միանգամից մի քանի զանգվածային սննդային թունավորում է գրանցվել։ Տարբեր համայնքներում և հանրային սննդի օբյեկտներում գրանցված դեպքերը կրկին սրել են հարցը, թե որտեղ է խզվում սննդի անվտանգության շղթան, և թե որ փուլում է առաջանում վտանգը։

Տոնական սեղան, ուրախ հավաք․ ընտանեկան կարևոր օրը ժամեր անց վերածվեց անհանգստության։ «Ռադիոլուր»–ի զրուցակիցը մկրտության երեկոյի մասնակից էր։ Ասում է՝ սննդի համն ու հոտը կասկածելի չէին։ Սակայն ժամեր անց ինքնազգացողությունը վատացել է․ որովայնային ցավեր և սննդային թունավորմանը բնորոշ այլ ախտանիշներ։ Կեսգիշերին ստիպված եղավ բժշկի դիմելու։ Պարզվեց՝ միակը չէր։ Օգոստոսի 1-ի գիշերը Արտաշատի բժշկական կենտրոն է դիմել 14 քաղաքացի՝ սննդային թունավորմանը բնորոշ ախտանիշներով։ Բոլորն էլ՝ նույն միջոցառման մասնակիցներ։

Սննդամթերքի անվտանգության տեսչական մարմինը շարունակում է վերահսկողությունը հանրային սննդի ոլորտում։ ՍԱՏՄ իրազեկման բաժնի պետ Անուշ Հարությունյանի տեղեկացմամբ՝ միայն ամռան երկու ամսում ստուգվել է հանրային սննդի 107 օբյեկտ։ 13-ում արձանագրել են սանիտարահիգիենիկ նորմերի այնպիսի խախտումներ, որոնց պատճառով գործունեությունը կասեցվել է։ Կասեցված օբյեկտներից են մանկական երեք ճամբարների խոհանոցներ․

«Նրանցից 5-ը խախտումները վերացրել են, և վերականգնվել է նրանց գործունեությունը, մնացածը շարունակում են մնալ դեռ կասեցված»։

Տեսչական մարմնի ստուգումները տարեկան ծրագրով են, նաև քաղաքացիների բողոքների և ահազանգերի հիման վրա։ ՍԱՏՄ Երևանի կենտրոնի գլխավոր տեսուչ Հայկ Մայիլյանը նշում է՝ հայտնաբերված խախտումների դեպքում կիրառվում են տարբեր չափի տուգանքներ՝ կախված խախտման բնույթից․

«Օրինակ՝ սանիտարահիգիենիկ նորմերի խախտումների համար հանրային սննդի կետերում նախատեսվում է տուգանք 20-120 հզր դրամ, պիտանիության ժամկետն անցած սննդամթերքի համար՝ 100-200 հզր դրամ տուգանք, տեխնիկական կանոնակարգերի պահանջների խախտումով սննդամթերք արտադրելու համար՝ 200-500 հզր դրամ, արտադրություններում արտադրական պրոցեսները կամ սանիտարահիգիենիկ նորմերի խախտման համար՝ արդեն 400 հզր դրամ, ու յուրաքանչյուր խախտում գումարվում է իրար»։

Սննդային թունավորման պատճառները ողջ շղթայի տարբեր փուլերում են՝ հումքի ընդունումից մինչև պատրաստում, պահպանում և մատուցում։

Վերջին շաբաթներին զանգվածային թունավորման դեպքերից մեկը Լոռու մարզի Ճոճկան համայնքում էր։ Հարսանեկան արարողությունից հետո 22 քաղաքացի բժշկի էր դիմել սուր աղիքային վարակի ախտանիշներով՝ հիմնականում փսխում և լուծ։ Լաբորատոր հետազոտությամբ հաստատվել էր ստաֆիլոկոկային վարակ։

Տեսչական ստուգումները հայտնաբերել էին սանիտարահիգիենիկ մի շարք լուրջ խախտումներ, օբյեկտի գործունեությունը ժամանակավորապես կասեցվել էր։

Աղմուկից զերծ չմնաց նաև Ֆրանսիայի դեսպանատունը։ Երկրի ազգային տոնի առիթով ընդունելությունից հետո տասնյակ հյուրեր սուր աղիքային վարակի ախտանիշներով դիմել էին բուժօգնության։ Հետազոտություններով հաստատվեց սալմոնելոզ։ Երևանի ամենահայտնի հյուրանոցներից մեկում պատվիրված սննդից թունավորումների պատճառով դեսպանատունը հայտնվեց անհարմար դրության մեջ և հաղորդագրությամբ ափսոսանք հայտնեց կատարվածի համար՝ ակնկալելով, որ կպարզվեն պատճառն ու մեղավորները։

Ստուգումներ սկսվեցին սնունդը պատրաստած խոհանոցում։ Պաշտոնական կառույցները նշել էին՝ միջոցառմանը մատուցված սննդի նմուշներն արդեն հնարավոր չէր հետազոտել, քանի որ դրանք ամբողջությամբ սպառված էին։

Հատկապես ամռան ամիսներին կարևորվում է, այսպես կոչված, «սառը շղթայի» պահպանումը՝ ասում է ՍԱՏՄ Երևանի կենտրոնի գլխավոր տեսուչ Հայկ Մայիլյանը․

«Ստուգման ընթացքում նայել ենք ընդունվող հումքի տեսակը․ ի՞նչ հումք ենք ընդունում, ի՞նչ պայմաններում է այն ընդունվում, այնուհետև ամբողջ ընթացքը՝ որտեղ է պահպանվում, սառնարաններում է արդյոք, թե ոչ, արդյոք սառնարանները կամ այն դարակաշարը, որտեղ որ պահպանվում է, համապատասխանում են օրենսդրական պահանջներին, թե ոչ։ Եփման պրոցեսներում արդյո՞ք ճիշտ է եփվում, սանիտարահիգիենիկ նորմերը պահպանվո՞ւմ են, թե՞ ոչ»։

Սննդամթերքի անվտանգության տեսչական մարմնի մասնագետները հորդորում են սնունդը պատրաստել մատուցմանը հնարավորինս մոտ ժամերի, իսկ մինչև այդ պահել սառնարանային պայմաններում։ Երկար ժամանակ  բաց մնացած սնունդը պարզապես պետք է թափել։

ՍԱՏՄ սննդամթերքի անվտանգության վարչության պետ Գոհար Վարդանյանն ասում է՝ որքան էլ իրենք հորդորեն, հույսը մարդկանց գիտակցության վրա է․

«Սպառողներին կհորդորեմ, որ աչալուրջ լինեն, պահանջատեր լինեն և խախտումների դեպքում անպայման ահազանգեն, չհապաղեն, իսկ տնտեսվարողներին կհորդորեմ պահպանել օրենսդրական պահանջները և պարտավորություն կրեն սպառողների առողջության և անվտանգության համար»։

Երևանում ու Հայաստանի տարբեր համայնքներում տասնյակ մարդկանց հիվանդանոց հասցրած դեպքերը հիշեցնում են՝ ափսեում հաճախ լուրջ վտանգ է թաքնված, այնպես որ զգոն է պետք լինել։

armradio

ՀՀ քննչական կոմիտեի հատկապես կարևոր գործերի քննության գլխավոր վարչության մարդու դեմ ուղղված հանցագործությունների քննության վարչությունում քննվող քրեական վարույթի նախաքննության ընթացքում առերևույթ փաստական տվյալներ են ձեռք բերվել այն մասին, որ 2026 թվականի ապրիլ-մայիս ամիսների ընթացքում «Հայաստան» դաշինքի կողմից պատգամավորության թեկնածու առաջադրված Հ․Դ․-ն և շտաբներից մեկի ղեկավար Հ․Ս․-ն, դաշինքի հավաքներին մասնակցելու նպատակով նյութապես շահագրգռել են Ս․Մ․-ին՝ նրան աշխատանքի տեսքով քողարկված ձևով խոստանալով վճարել 150 հզր ՀՀ դրամ գումար։ Այս մասին տեղեկացնում են ՀՀ ՔԿ-ից:

«Նախաքննության ընթացքում հսկող դատախազի կողմից որոշում է կայացվել Հ․Ս․-ի և Հ․Դ․-ի նկատմամբ հարուցել հանրային քրեական հետապնդում՝ Քրեական օրենսգրքի 236-րդ հոդվածի 2-րդ մասով (հավաքին մասնակցելու նպատակով նյութապես շահագրգռելը):

Քրեական վարույթը մեղադրական եզրակացությամբ ուղարկվել է հսկող դատախազին»,- ասվում է հաղորդագրությունում:

Ծանուցում. հանցագործության համար մեղադրվողը համարվում է անմեղ, քանի դեռ նրա մեղավորությունն ապացուցված չէ Քրեական դատավարության օրենսգրքով սահմանված կարգով` դատարանի` օրինական ուժի մեջ մտած դատավճռով։

«Վեոլիա Ջուր» ընկերությունը տեղեկացնում է իր հաճախորդներին և սպառողներին, որ վթարի վերացման աշխատանքներով պայմանավորված, ս.թ. օգոստոսի 4-ին ժամը 10:00-ից մինչև օգոստոսի 5-ը ժամը 10:00-ն կդադարեցվի Երևանի և Կոտայքի մարզի հետևյալ տարածքների ջրամատակարարումը՝

Դավթաշեն վարչական շրջանի՝ Դավթաշեն 1-4 զանգվածների, Եղվարդի խճուղու Ձոր-1, Ձոր-2 թաղամասերի, Դավթաշեն 1-10, Հ.Մելքումով, Ա.Միկոյան, Փիրումյաններ փողոցների, Օլիմպավան և Reebok մարզահամալիրների,  ՀՀ Ոստիկանության անձնագրային և վիզաների վարչության շենքի,

Աջափնյակ վարչական շրջանի՝ Նազարբեկյան, Նորաշեն, Գ-1 թաղամասերի, Ալիխանյան Եղբայրներ փողոցի, Հալաբյան 22-38 համարների իրենց  կոտորակներով, Մարգարյան 7 համարի,

Կոտայքի մարզի՝ Զովունի գյուղի 21-37 փողոցների, Պռոշյան, Քասախ գյուղերի:

Ընկերությունը հայցում է սպառողների ներողամտությունը պատճառված անհանգստության և կանխավ շնորհակալություն հայտնում ըմբռնման համար:

ՀԷՑ-ը բավականին խոշոր ընկերություն էր մինչև այնտեղ ժամանակավոր կառավարչի նշանակումը: Ընկերությունը Հայաստանի 1000 խոշոր հարկատուների մեջ 21-րդն էր մինչև ժամանակավոր կառավարչի նշանակումը, հիմա 13-րդն է: Շեշտակի աճը տեսնո՞ւմ եք:

Այդ մասին Ազգային ժողովի՝ օգոստոսի 3-ի նիստին ասաց Ազգային ժողովի նախագահի տեղակալի թեկնածու Վահագն Ալեքսանյանը՝ անդրադառնալով այն ընկերություններին, որոնք պետական կառավարման են անցել, բայց, ըստ «Ուժեղ Հայաստան» խմբակցության ղեկավար Նարեկ Կարապետյանի, զրո օգուտ ունեն:

Ըստ Վահագն Ալեքսանյանի՝ նույնատիպ իրավիճակ է նաև Զանգեզուրի պղնձամոլիբդենային կոմբինատի պարագայում:

«ԶՊՄԿ-ն մինչև պետական մասնաբաժին ունենալը 8-9 տարում վճարել է այնքան հարկ, ինչքան պետական մասնաբաժին ունենալուց հետո 1-2 տարում: Թվերը շատ կոնկրետ չասեմ: 1-2 տարում պետական մասնակցություն ունենալուց հետո վճարել է այնքան հարկ, ինչքան դրանից առաջ նախկինում վճարել է 8-9 տարում: Դուք այս տարբերությունը տեսնո՞ւմ եք, թե՞ չեք տեսնում»,- ասաց նա:

Ինչպես արդեն հայտնել ենք, ՀՀ քննչական կոմիտեի պետության, սահմանադրական կարգի հիմունքների և հասարակական անվտանգության դեմ ուղղված հանցագործությունների քննության գլխավոր վարչությունում քննվող քրեական վարույթի շրջանակում առերևույթ փաստական տվյալներ են ձեռք բերվել այն մասին, որ Ավետիք Չալաբյանը, հանդիսանալով «Հայաքվե» միավորման համակարգող, Հայաստանի Հանրապետությունում 2026 թվականի հունիսի 7-ին կայացած խորհրդարանական ընտրություններին ընտրության իրավունք ունեցող անձանց ընտրական իրավունքի ազատ իրականացմանը խոչընդոտելու նպատակով, 2026 թվականի փետրվարի 4-ին Երևան քաղաքի սրճարաններից մեկում հանդիպել է Հայաստանի Հանրապետությունում գտնվող օտարերկրյա պետության ներկայացուցիչների հետ, որի ընթացքում համոզելու, վերոհիշյալ ընտրություններում նաև նրանց կողմից նախընտրած քաղաքական ուժի հաղթանակն ապահովելու հանգամանքով շահագրգռելու միջոցով դրդել է վերջիններիս, որպեսզի նրանք խմբի կազմում, նախնական համաձայնությամբ, իրենց ծառայողական, իշխանական լիազորությունները և դրանցով պայմանավորված ազդեցությունն օգտագործելով խոչընդոտեն հունիսի 7-ին կայացած խորհրդարանական ընտրություններին ընտրության իրավունք ունեցող ՀՀ քաղաքացիների ընտրական իրավունքի ազատ իրականացմանը, այն է՝ օտարերկրյա պետությունում գործող կազմակերպությունների սեփականատերերի միջոցով ստիպեն այդ կազմակերպություններում աշխատող, ընտրելու իրավունք ունեցող ՀՀ քաղաքացիներին մեկնել Հայաստանի Հանրապետություն և հունիսի 7-ին կայացած խորհրդարանական ընտրությունների ընթացքում քվեարկել «Ուժեղ Հայաստան» դաշինքի օգտին, որի կապակցությամբ օտարերկրյա պետության ներկայացուցիչները տվել են իրենց համաձայնությունը: Այս մասին տեղեկացնում են ՔԿ-ից:

Քննչական և վարութային գործողությունների արդյունքում բացահայտվել է հանցանք կատարած անձը և հսկող դատախազի որոշմամբ Ա․Չ․-ի նկատմամբ հարուցվել է հանրային քրեական հետապնդում՝ Քրեական օրենսգրքի 43-210-րդ հոդվածի 2-րդ մասի 5-րդ և 6-րդ կետերով (իշխանական կամ ծառայողական լիազորությունները կամ դրանցով պայմանավորված ազդեցությունն օգտագործելով մի խումբ անձանց կողմից նախնական համաձայնությամբ ընտրական իրավունքի իրականացմանը խոչընդոտելու նախապատրաստություն): 

Ա․Չ.-ի նկատմամբ որպես խափանման միջոց կիրառվել է կալանքը։

Նրա վերաբերյալ քրեական վարույթը մեղադրական եզրակացությամբ ուղարկվել է հսկող դատախազին»,- ասվում է հաղորդագրությունում:

Ծանուցում. հանցագործության համար մեղադրվողը համարվում է անմեղ, քանի դեռ նրա մեղավորությունն ապացուցված չէ Քրեական դատավարության օրենսգրքով սահմանված կարգով` դատարանի` օրինական ուժի մեջ մտած դատավճռով։

Դատախազը 2026 թվականի օգոստոսի 3-ին, հաստատված մեղադրական եզրակացությամբ, Երևան քաղաքի առաջին ատյանի ընդհանուր իրավասության քրեական դատարան է հանձնել 2003 թվականից մինչև 2008 թվականի մայիսի 29-ը ՀՀ Կառավարությանն առընթեր ոստիկանության պետի պաշտոնը զբաղեցրած Հ.Հ.-ի վերաբերյալ քրեական վարույթի նյութերը: Այս մասին տեղեկացնում են ՀՀ գլխավոր դատախազությունից:

Հիշեցնենք, որ 2008 թվականի մարտի 1-2-ը Երևան քաղաքում տեղի ունեցած իրադարձությունների վերաբերյալ նախաձեռնված քրեական վարույթի շրջանակում, դատախազը, սեփական նախաձեռնությամբ, 2026 թվականի ապրիլի 18-ին, հանրային քրեական հետապնդում է հարուցել ՀՀ ԿԱ ոստիկանության նախկին պետ Հ.Հ.-ի նկատմամբ՝ 18.04.2003 թվականին ընդունված Քրեական օրենսգրքի 38-309-րդ հոդվածի 2-րդ մասով (պաշտոնատար անձի կողմից պաշտոնեական լիազորություններն անցնելուն օժանդակելը, որը զուգորդվել է բռնություն, զենք կամ հատուկ միջոցներ գործադրելով) և 315-րդ հոդվածի 2-րդ մասով (պաշտոնեական անփութություն, որն անզգուշությամբ առաջացրել է մարդու մահ կամ այլ ծանր հետևանքներ):

«Քրեական վարույթով պարզվել է, որ Հ.Հ.-ն, 2003 թվականից մինչև 2008 թվականի մայիսի 29-ը զբաղեցնելով ՀՀ Կառավարությանն առընթեր ոստիկանության պետի պաշտոնը, իրականացնելով ՀՀ ոստիկանության ընդհանուր ղեկավարումը, 2008 թվականի մարտի 1-ին անցնելով իր պաշտոնեական լիազորությունները, ՀՀ ոստիկանության այլ բարձրաստիճան պաշտոնատար անձանց հետ հանցակցությամբ կազմակերպել է ոստիկանության տարբեր ստորաբաժանումների կողմից բռնության և հատուկ միջոցների գործադրմամբ զուգորդված Երևան քաղաքի «Ազատության» հրապարակում նստացույց անող խաղաղ ցույցը ցրելը, ցուցարարներին հրապարակից բռնության գործադրմամբ հարկադրաբար հեռացնելը, ապա քաղաքի կենտրոնական հատվածներում նրանց կուտակումները, հնարավոր ցույցերն ու հավաքները բացառելը, որպիսի գործողություններով անձանց իրավունքներին և օրինական շահերին, ինչպես նաև հասարակության և պետության օրինական շահերին պատճառվել է էական վնաս:

Ոստիկանության պետի պաշտոնը զբաղեցրած Հ.Հ.-ին առաջադրված մյուս մեղադրանքի հիմքում դրված է այն հանգամանքը, որ Հ.Հ.-ն, որպես ոստիկանության պետական կառավարման մարմնի ղեկավար, պարտավոր լինելով սահմանված կարգով Հայաստանի Հանրապետության կառավարության քննարկմանը ներկայացնել ոստիկանության գործունեությանն ու աշխատանքի կազմակերպմանը վերաբերող նորմատիվ իրավական ակտերի նախագծեր և առաջարկություններ, այդ թվում՝ «Չերյոմուխա 7» արցունքաբեր և  «Զարյա» լուսաձայնային և այլ հատուկ միջոցների կիրառման կարգը, չի կատարել այդ պարտականությունը:

Հաշվի առնելով, որ Հ.Հ.-ն 2019 թվականին մահացել է, նրա նկատմամբ հանրային քրեական հետապնդում հարուցելու մասին որոշումը հանձնվել էր օրինական ներկայացուցչին՝ վերջինիս կնոջը:

Հ.Հ.-ի կինն առարկել էր, որպեսզի մեղադրյալի մահվան հիմքով Հ.Հ.-ի նկատմամբ հանրային քրեական հետապնդումը դադարեցվի:

Հսկող դատախազի կողմից թիվ 62202608 քրեական վարույթից անջատված թիվ 62292726 քրեական վարույթի նյութերը վերադարձվել էին վարույթ իրականացնող մարմին՝ Հակակոռուպցիոն կոմիտեին՝ մեղադրական եզրակացությամբ նախաքննությունն ավարտելու ուղղությամբ միջոցներ ձեռնարկելու համար»,- ասվում է հաղորդագրությունում:

Ծանուցում. հանցագործության համար մեղադրվողը համարվում է անմեղ, քանի դեռ նրա մեղավորությունն ապացուցված չէ Քրեական դատավարության օրենսգրքով սահմանված կարգով` դատարանի` օրինական ուժի մեջ մտած դատավճռով: