Category: TopNews.am

Եվրամիության արտաքին քաղաքականության և անվտանգության հարցերով բարձր ներկայացուցիչ Կայա Կալասը հայտարարել է, որ վաղը ԵՄ-ն ակնկալում է դրական որոշում կայացնել Ուկրաինային 90 միլիարդ եվրոյի վարկ տրամադրելու հարցում։

Այս ֆինանսական օգնության գործընթացում շրջադարձային կարող է լինել Հունգարիայում սպասվող քաղաքական փոփոխությունը։ Կալասի փոխանցմամբ՝ մայիսին Հունգարիայում սպասվող իշխանափոխությունից հետո, երբ Վիկտոր Օրբանը կլքի վարչապետի պաշտոնը, Բուդապեշտի հետ բանակցությունները կարող են նոր հուն մտնել։

Հիշեցնենք, որ Օրբանը երկար ժամանակ արգելափակում էր Ուկրաինային ուղղված նախաձեռնությունները՝ վերջին անգամ հայտարարելով, որ չի հաստատի վարկը, քանի դեռ Կիևը չի վերսկսել նավթի մատակարարումը «Դրուժբա» խողովակաշարով։ Ի տարբերություն Օրբանի՝ Հունգարիայի վարչապետի հիմնական թեկնածու Պետեր Մադյարը հայտարարել է, որ չի խոչընդոտի միջոցների տրամադրմանը, քանի որ Հունգարիան այդ գործընթացում ֆինանսական մասնակցություն չի ունենալու։

Հունգարիայի խորհրդարանական ընտրություններում հաղթանակած «Տիսա» կուսակցության առաջնորդ Պետեր Մադյարը, որը շուտով կստանձնի վարչապետի պաշտոնը, հայտարարել է, որ պաշտոնանկ կանի նախագահ Տամաշ Շույոկին և մի շարք այլ պաշտոնատար անձանց, եթե նրանք կամավոր չթողնեն իրենց պաշտոնները։ Այս մասին նա գրել է X հարթակում:

«Մինչև մայիսի 31-ը Օրբանի խամաճիկները կարող են կամավոր կերպով հեռանալ իրենց պաշտոններից։ Սա վերաբերում է Հունգարիայի նախագահին, Գերագույն դատարանի նախագահին, Արդարադատության գործերի ազգային վարչությանը, Սահմանադրական դատարանի նախագահին և գլխավոր դատախազին», – գրել է նա։

Մադյարը հավելել է, որ խորհրդարանական ընտրություններում հունգար ժողովուրդը «քվեարկել է քաղաքական լիարժեք փոխակերպման օգտին»։ «Եթե այս պաշտոնյաները մինչև մայիսի 31-ը կամավոր կերպով չհեռանան, ապա միլիոնավոր հունգարացիներից ստացած մանդատի հիման վրա մենք նրանց կհեռացնենք պաշտոնից», – հավելել է Մադյարը։

Համացանցում ՀՀ վարչապետ Նիկոլ Փաշինյանի և իր ընտանիքի մասին տեղեկատվություն է տարածվել, որը, ինչպես նշում է վարչապետի մամուլի խոսնակ Նազելի Բաղդասարյանը, սուտ է և որևէ կապ չունի իրականության հետ։ 

ՆԱՏՕ-ի գլխավոր քարտուղար Մարկ Ռյուտեն ապրիլի 21-ից 22-ը պաշտոնական այցով կլինի Թուրքիայում: Նա հանդիպումներ կունենա Թուրքիայի նախագահ Ռեջեփ Էրդողանի, արտգործնախարար Հաքան Ֆիդանի և պաշտպանության նախարար Յաշար Գյուլերի հետ:

Նշվում է, որ այցը նվիրված է անվտանգության և պաշտպանության ոլորտում համագործակցության հարցերի, ինչպես նաև ՆԱՏՕ-ի հետ Թուրքիայի փոխգործակցությանը:

Իրանի պետական հեռարձակողը (IRIB) երեքշաբթի օրը հերքել է տարածված տեղեկություններն այն մասին, թե Թեհրանը պատվիրակություն է ուղարկել Պակիստան՝ ԱՄՆ-ի հետ բանակցությունների երկրորդ փուլին մասնակցելու համար։

Հայտարարության մեջ նշվում է, որ որևէ իրանական պատվիրակություն՝ լինի հիմնական, թե օժանդակ, չի մեկնել Իսլամաբադ։ IRIB-ը «ոչ հավաստի» է որակել իրանցի պաշտոնյաների մեկնման և հանդիպումների ժամկետների վերաբերյալ նախկինում հնչած լուրերը։ 

Եվրամիության արտաքին քաղաքականության և անվտանգության հարցերով բարձր ներկայացուցիչ Կայա Կալասը, ԵՄ արտաքին գործերի նախարարների խորհրդի նիստից առաջ, անդրադարձել է Հարավային Կովկասում տիրող իրավիճակին՝ շեշտելով Հայաստանի և Ադրբեջանի հարաբերությունների կարգավորման կարևորությունը։

Ըստ Կալասի՝ Եվրամիության համար առաջնահերթություն է երկու երկրների միջև հարաբերությունների նորմալացումը։ Նա հայտնել է, որ այսօրվա քննարկումների առանցքում լինելու է Հայաստանի համար նախատեսված նոր առաքելության հարցը։ Բարձր ներկայացուցչի խոսքով՝ Եվրոպան մտադիր է ավելի խորացնել աշխատանքը կողմերի հետ՝ խաղաղության գործընթացին նպաստելու նպատակով։

«Մեզ համար չափազանց կարևոր է Հայաստանի և Ադրբեջանի հարաբերությունների կարգավորումը։ Մենք պատրաստվում ենք քննարկել Հայաստանի համար նոր առաքելությունը և այն, թե ինչպես կարող ենք հետագայում զարգացնել աշխատանքը նրանց հարաբերությունների ուղղությամբ»,- նշել է Կալասը։

Պատասխանելով լրագրողների հարցերին՝ ԵՄ գլխավոր դիվանագետը հավելել է, որ այսօրվա քննարկումների ճնշող մեծամասնությունը նվիրված է լինելու հենց Հայաստանին և Ադրբեջանին։ 

Հայաստանի գյուղերը ցեխի միջից դուրս բերելը կշարունակի մնալ կարևոր խնդիր մարդկանց հարմարավետությունը, բարեկեցությունը և երջանկությունն ապահովելու տեսակետից: Այդ մասին «Քաղաքացիական պայմանագիր» կուսակցության նախընտրական ծրագիրը ներկայացնելիս ասաց վարչապետ Նիկոլ Փաշինյանը:

Վերջին 8 տարում, ըստ Փաշինյանի, Հայաստանի բազմաթիվ գյուղերում բազմաթիվ փողոցներ են սալարկվել, նորոգվել, այնպիսի փողոցներ, որոնք գյուղի պատմության ընթացքում երբեք բարեկարգ չեն եղել, հողե փողոցները եղել են փոշու մեջ, իսկ անձրևի ժամանակ՝ ցեխի:

«Մենք ՀՀ գյուղերը ցեխի միջից հանելը շատ կարևոր քաղաքական, տնտեսական խնդիր ենք համարում, որպեսզի գյուղում ապրելը չնշանակի զրկված լինել… Միշտ այդ օրինակն եմ բերում, գյուղում կանայք կաբլուկով կոշիկ հագնելու հնարավորությունից չպետք է զրկված լինեն: Բարեկեցություն ասելով՝ մենք նկատի ունենք նաև բարեկեցություն գյուղական վայրերում: Մեր գյուղերի ցեխի մեջ լինելն է, որ գյուղական բնակավայրերից դեպի խոշոր բնակավայրեր արտագաղթի պատճառ է դառնում»,- ասաց նա:

Ըստ Փաշինյանի՝ այս գործընթացը միանգամից փոխել հնարավոր չէ, բայց աշխատանքները սկսված են, և գործընթացի տեմպը կապված է նաև ՀԴՄ կտրոնների հետ. «Ինչպիսի արագությամբ առաջ կգնան և ինչ ծավալով, ես էլի անընդհատ կրկնում եմ նույն բանը, այն ծավալով, ինչ ծավալով մենք ամեն անգամ առևտուր անելիս կպահանջենք ու կստանանք ՀԴՄ կտրոններ: Ինչքան շատ ՀԴՄ կտրոններ պահանջենք և ստանանք, այնքան ավելի արագ, ավելի մեծ ծավալներով մեր գյուղերը դուրս կգան ցեխի միջից»:

Վաշինգտոնն առաջարկում է հետ քաշվել և պաշտպանական նոր գծեր կառուցել՝ հայտարարել է Ուկրաինայի նախագահը: Սակայն, Վոլոդիմիր Զելենսկու խոսքով, առաջ է գալիս այդ տարածքների բնակիչների և զինվորականների արձագանքի հարցը:

«Բացի այդ, մենք չունենք անվտանգության երաշխիքներ, որոնք կկանխեին ռուսական հնարավոր նոր հարձակումները։ Այո, Թրամփը դեռ 2 տարի էլ կմնա, իսկ հետո՞ ինչ ենք անելու», – մտահոգություն է հայտնել նախագահը: Զելենսկու խոսքով՝ Դոնբասից դուրս գալը ռազմավարական պարտություն կլինի Ուկրաինայի համար։

Նրա համոզմամբ՝ պատերազմը դադարեցնելու ամենաիրատեսական տարբերակն է ֆիքսել ներկայիս դիրքերը և անցնել դիվանագիտական գործընթացներին։ «Սակայն Ռուսաստանը չի ընդունում այս ձևաչափը», – հավելել է Զելենսկին։ Նա կարևոր է համարել, որ Ուկրաինան հնարավորինս արագ ստեղծի հակահրթիռային սեփական համակարգը՝ կախված չլինելու արտասահմանյան համակարգերից: