Month: April 2026

Եվրամիությունը Շենգեն գոտու սահմաններում 3-րդ երկրների քաղաքացիների համար ապրիլի 10-ից ներդնում է մուտքի-ելքի նոր ավտոմատացված համակարգ (EES)․ հաղորդում է Euronews-ը։

Ինչպես նշվում է, դա կարող է զգալիորեն նպաստել ԵՄ վերահսկողական համակարգերի արդիականացմանը, սակայն ոչ առանց մի քանի սկզբնական խոչընդոտների։

ԵՄ մուտքի/ելքի համակարգը (EES), որը փուլ առ փուլ ներդրվել է անցյալ տարվա հոկտեմբերի 12-ին 29 եվրոպական երկրում, լիովին կգործի 2026 թվականի ապրիլի 10-ից։ Սա կնշանակի, որ անձնագրերի կնիքները կփոխարինվեն թվային եղանակով գրանցված մուտքերով և ելքերով, ինչպես նաև ԵՄ քաղաքացի չհանդիսացող և կարճաժամկետ ուղևորություն իրականացնող ճանապարհորդների մուտքի մերժումներով։

Կգրանցվեն նաև կենսաչափական տեղեկություններ՝ դեմքի պատկերները և մատնահետքերը, ինչպես նաև օգտագործվող ճանապարհորդական փաստաթղթի անձնական տվյալները։

Այս նոր համակարգը ներդրվել է ԵՄ սահմանային անվտանգության և ներգաղթի համակարգերն արդիականացնելու, ինչպես նաև հանցագործությունն ու խարդախությունը նվազեցնելու և անվտանգության ռիսկերը բացահայտելու համար։

Ըստ Եվրոպական հանձնաժողովի՝ ներդրման պահից ի վեր ավելի քան 24․000 մարդու մուտքը մերժվել է տարբեր պատճառներով՝ ժամկետանց և կեղծ փաստաթղթեր, կամ իրենց այցելության պատճառը լիովին չհիմնավորելու անկարողություն։ Ավելի քան 600 մարդ նույնականացվել է որպես Եվրոպայի անվտանգության համար ռիսկ ներկայացնող։

Սա ներառում է նաև Մեծ Բրիտանիայի քաղաքացիներին, ինչպես նաև վիզայից ազատված ճանապարհորդներին՝ անկախ նրանից, թե նրանք ճանապարհորդում են զբոսաշրջությա՞ն, թե՞ գործնական նպատակով։

Այն նաև վերաբերում է այն անձանց, որոնք ԵՄ-ում ունեն սեփականություն, բայց չունեն բնակության թույլտվություն։

Այնուամենայնիվ, Իռլանդիան և Կիպրոսն ազատված են EES-ից, ինչը նշանակում է, որ նրանք կշարունակեն իրականացնել ձեռքով անձնագրային ստուգումներ։

Անահիտ Մանասյանը շարունակում է հանդիպումները գտնվելու վայրն անհայտ անձանց և Ադրբեջանում ազատությունից զրկված հայերի հարազատների հետ․ հայտնում է ՄԻՊ գրասենյակը։

«Վերջին օրերին Մարդու իրավունքների պաշտպանը շարունակել է հանդիպումները գտնվելու վայրն անհայտ անձանց և Ադրբեջանում ազատությունից զրկված հայերի հարազատների հետ։

Հանդիպումների ընթացքում քննարկվել են նրանց իրավունքների պաշտպանությանն առնչվող ընթացիկ խնդիրները, Պաշտպանի մանդատի շրջանակում արդեն իսկ ձեռնարկված քայլերը, ինչպես նաև շարունակական աջակցության ապահովման և անհրաժեշտ տեղեկատվության տրամադրման հարցերը։

Պաշտպանը վերահաստատել է, որ հարազատների մտահոգությունների պատշաճ հասցեագրումն ու նրանց իրավունքների արդյունավետ պաշտպանությունն իր առաջնահերթություններից է։ Այս ուղղությամբ իրականացվում են աշխատանքներ՝ ինչպես ներպետական, այնպես էլ միջազգային մեխանիզմների շրջանակում՝ կիրառելով բոլոր հնարավոր գործիքները։

Մարդու իրավունքների պաշտպանն ընդգծում է, որ այս անձանց իրավունքներին առնչվող հարցերը պետք է մշտապես գտնվեն պետության ուշադրության կենտրոնում և պետք է շարունակական քայլեր ձեռնարկվեն անձանց իրավունքների երաշխավորումն ապահովելու ուղղությամբ»,- ասված է հայտարարության մեջ։