Month: April 2026

Երեկ՝ ապրիլի 11-ին, ավտովթար է տեղի ունեցել Շիրակի մարզում։ Հայտնում է shamshyan.com-ը:

Ժամը 08։50-ի սահմաններում Գյումրի քաղաքի «Անկախության» հրապարակում բախվել են Շիրակի մարզի բնակիչներ՝ 46-ամյա Հարություն Ա․-ի վարած «Mercedes» և 41-ամյա Սարգիս Գ․-ի վարած «Mercedes» մակնիշի ավտոմեքենաները։

Ինչպես հայտնում է ֆոտոլրագրող Գագիկ Շամշյանը, վթարի հետևանքով «Mercedes»-ներից մեկի ուղևոր, Շիրակի մարզի բնակիչ 40-ամյա Ռիտա Մ․-ն տեղափոխվել է «Գյումրի» բժշկական կենտրոն, իսկ մյուս «Mercedes»-ը բախվել է երկաթե էլեկտրասյանը։

Ավելին՝ սկզբնաղբյուր կայքում:

2024 թվականի սկզբին` 2 տարի առաջ, հայտնի դարձավ, որ Նիկոլ Փաշինյանը վաճառել է 3֊րդ մասի իր բնակարանը, սակայն առ այսօր, իբր օրինականություն քարոզող Փաշինյանները դուրս չեն գրվել փաստացի ուրիշին պատկանող բնակարանից։

Թերևս ողջամիտ բացատրություն կարող է լինել այն, որ բնակարանը վաճառվել է ձևական` եկամուտ օրինականացնելու նպատակով։

Իսկ թե ով է գնորդը, Oragir.News-ը կփորձի պարզել առաջիկայում։

Ամեն դեպքում, եթե Փաշինյանները վաղուց գրանցվել են այլ վայրերում, իսկ «գնորդը» իրականում հանդիսանում է Չեխովի 8/50 հասցեի սեփականատերը, ապա դա մեկ անգամ ևս փաստում է, թե ԱԺ ընտրությունների նախաշեմին ինչ ողբալի վիճակում են գտնվում Կենտրոնական ընտրական հանձնաժողովի ցուցակները։

Գերմանիայի Հագեն քաղաքում (Հյուսիսային Հռենոս-Վեստֆալիա) վայրի խոզերը դարձել են լուրջ գլխացավանք 190,000 բնակիչների համար՝ աստիճանաբար կորցնելով վախը մարդկանցից և բնակելի թաղամասեր այցելելով նույնիսկ ցերեկային ժամերին:

Բնակիչների կողմից նկարահանված կադրերը փաստում են, թե ինչպես են տասնյակից ավելի կենդանիներ ազատ շրջում տների մոտ, ինչի պատճառով մարդիկ այժմ վախենում են նույնիսկ շներին զբոսանքի հանել:

Իրավիճակը սրվում է նրանով, որ որոշ բնակիչներ, հակառակ մասնագետների հորդորների, պատշգամբներից կերակրում են կենդանիներին, ինչն ավելի է գայթակղում նրանց մնալ քաղաքում:

Տեղացի անտառապահ Մարտին Հոլը նշում է, որ բնակելի տարածքներում որսն անհնար է և վտանգավոր, իսկ հատուկ հոտերով նրանց անտառ վերադարձնելու փորձերը հազիվ թե հաջողվեն:

Նա կարծում է, որ բնակիչները պետք է սովորեն համակեցության կանոնները. չմոտենալ կենդանիներին, դրսում սնունդ չթողնել և խոզին հանդիպելիս բարձր ձայներով կամ ծափերով նախապես տեղեկացնել սեփական ներկայության մասին, քանի որ վայրի խոզերը հարձակվում են միայն վախեցած կամ անակնկալի եկած մարդկանց վրա։

Ստեփանծմինդա-Լարս ավտոճանապարհը փակ է բոլոր տեսակի տրանսպորտային միջոցների համար։

Այս մասին հայտնում են Վրաստանի ՆԳՆ ԱԻ դեպարտամենտից և ՌԴ ԱԻՆ Հյուսիսային Օսիայի ճգնաժամային կառավարման կենտրոնից:

Փրկարար ծառայությունը տեղեկացնում է, որ ՀՀ տարածքում ավտոճանապարհները հիմնականում անցանելի են:

Փակ են Արագածոտնի մարզում «Ամբերդ» բարձր լեռնային օդերևութաբանական կայանից Ամբերդ ամրոց և Քարի լիճ տանող ավտոճանապարհները։

Վարորդներին հորդորում ենք երթևեկել բացառապես ձմեռային անվադողերով։

Հանրապետության տարածքում ապրիլի 12-ին և 13-ին ժամանակ առ ժամանակ շրջանների զգալի մասում, 14-ին, 15-ի գիշերն առանձին շրջաններում սպասվում են տեղումներ. առանձին վայրերում՝ առատ։

Տեղումները լեռնային և առանձին նախալեռնային գոտիներում կդիտվեն ձյան և թաց ձյան, հովտային գոտիներում՝ անձրևի տեսքով։ Առանձին վայրերում սպասվում է ամպրոպ։

Ապրիլի 15-ի ցերեկը, 16-ին սպասվում է առանց տեղումների եղանակ։ Քամին հարավարևմտյան է` 2-5 մ/վ: Օդի ջերմաստիճանն ապրիլի 13-ի ցերեկը և 14-ի գիշերը կնվազի 5-7 աստիճանով։

Երևանում ապրիլի 12-ին և 13-ին ժամանակ առ ժամանակ սպասվում է անձրև, հնարավոր է նաև ամպրոպ։ Ապրիլի 14-ին,15-ի գիշերը հնարավոր է կարճատև անձրև։ Ապրիլի 15-ի ցերեկը, 16-ին սպասվում է առանց տեղումների եղանակ։

Միջերկրական ծովից ակտիվ ցիկլոնի ներթանցմամբ պայմանավորված՝ ապրիլի 12-ին և 13-ին ողջ հանրապետությունում սպասվում են տեղումներ, Շիրակում, Գեղարքունիքում, Լոռիում, Տավուշի նախալեռներում, Կոտայքի, Արագածոտնի և Վայոց ձորի լեռնային շրջաններում՝ ձյան տեսքով։

Նշված հատվածներում սպասվում է նաև բուք, ցածր հորիզոնական տեսանելիություն, առանձին ավտոճանապարհներին մերկասառույց։