julbaz.mediamonitoring.am

Երկու լցանավ ականների վրա պայթել և հրդեհվել են՝ փորձելով Հորմուզի նեղուցի շրջանում անցնել չթույլատրված երթուղով։ Այս մասին հայտարարել են Իրանի Իսլամական հեղափոխության պահապանների կորպուսի (ԻՀՊԿ) ռազմածովային ուժերը, փոխանցում է Mehr-ը։

ԻՀՊԿ-ի տվյալներով, լցանավերից մեկը գտնվել է նեղուցից արևելք, մյուսը՝ անմիջապես նեղուցում։ Երկու նավերն էլ պայթյունից հետո հրդեհվել են։

ԻՀՊԿ-ի ռազմածովային ուժերի մամուլի ծառայության հայտարարության մեջ ասվում է, որ լցանավերը բազմիցս խախտել են սահմանված կանոնները և անջատել նավիգացիայի ու տեղորոշման համակարգերը՝ նախքան այն երթուղով անցնելու փորձը, որը Թեհրանը համարում է չթույլատրված։

Իրանցի զինվորականները նախազգուշացրել են, որ այն նավերը, որոնք համագործակցում են ամերիկացի զինվորականների հետ և խախտում Հորմուզի նեղուցով անցնելու՝ Իրանի սահմանած կանոնները, վտանգում են պայթել ականների վրա։

ԻՀՊԿ-ն նաև կոչ է արել անձնակազմերին չվստահել ԱՄՆ զինված ուժերի Կենտրոնական հրամանատարության (CENTCOM) հրամանատարի հայտարարություններին։

ԱՄՆ Հյուսիսային Կարոլինա նահանգում ոչ սթափ վիճակում մեքենա վարելու մեջ կասկածվող վարորդը մխրճվել է հեծանվորդների խմբի մեջ։ Մեկ մարդ զոհվել է, առնվազն 12-ը՝ վնասվածքներ ստացել, հայտնում է NBC News-ը։

Վթարը տեղի է ունեցել շաբաթ առավոտյան Ուեյք շրջանի Օպտիմիստ Ֆարմ Ռոուդ ճանապարհին՝ Ռոլիից մոտ 23 կմ հարավարևմուտք։

Նահանգի ճանապարհային ոստիկանության տվյալներով, 76-ամյա Դոնալդ Ռոբերտ Մորիս-Ջոնսը հատել է բաժանարար գիծը և վրաերթի ենթարկել հեծանվորդներին։

Բախումից հետո վարորդը հեռացել է դեպքի վայրից, ապա մոտ 800 մ անց ձախ կողմից դուրս է եկել ճանապարհից և ընկել ճամփեզրի խրամատը։ Ոստիկանությունը վթարի վայր է ժամանել առավոտյան ժամը 9։30-ից քիչ անց։

Զոհվածը Քերի քաղաքի բնակիչ, 63-ամյա Պատրիկ Ալեն Թերներն է։ Տուժածները տարբեր աստիճանի՝ թեթևից մինչև ծանր վնասվածքներ են ստացել։ Մի քանի մարդ տեղափոխվել է հիվանդանոց։

Մորիս-Ջոնսը ձերբակալվել է։ Նրան մեղադրանքներ են առաջադրվել ճանապարհատրանսպորտային պատահարի հետևանքով մահ պատճառելու, ճանապարհատրանսպորտային պատահարի հետևանքով առողջությանը ծանր վնաս պատճառելու յոթ դրվագի, վթարի վայրը լքելու ութ դրվագի, ոչ սթափ վիճակում մեքենա վարելու, վտանգավոր վարելու և հանդիպակաց գոտի դուրս գալու համար։

Ճանապարհային ոստիկանությունում հայտնել են, որ ոչ սթափ վիճակը կարող էր վթարի պատճառներից մեկը լինել։ Տղամարդը տեղափոխվել է Ուեյք շրջանի քննչական մեկուսարան։ Գրավի չափը կազմում է 1 միլիոն դոլար։

Մոսկվայի կենտրոնում՝ Կիտայ-գորոդի շրջանում, ոստիկանության զանգվածային ստուգայցերի ընթացքում ավելի քան հարյուր մարդու են բերման ենթարկել։

Բերման ենթարկվածների վկայությամբ, ոստիկանության բաժիններում նրանցից ոմանց զինկոմիսարիատ ներկայանալու ծանուցագրեր են հանձնել, իսկ չափահասներին նաև առաջարկել են պայմանագիր կնքել Պաշտպանության նախարարության հետ, հայտնում է «Осторожно, новости» տելեգրամյան ալիքը։

Աղբյուրի տվյալներով, մարդկանց սկսել են բերման ենթարկել նախորդ օրը երեկոյան։ Բերման ենթարկվածների թվում կան անչափահասներ։ Մարդկանց հատուկ ավտոմեքենաներով տեղափոխել են ոստիկանության «Բասմաննի» և «Տագանսկի» բաժիններ։ Բաժինների շենքերի մոտ հավաքվել են դեռահասների ծնողները՝ սպասելով իրենց երեխաների ազատ արձակմանը։

Բերման ենթարկվածներից ոմանք լրագրողներին պատմել են, որ ոստիկանությունում իրենց զինկոմիսարիատ ներկայանալու ծանուցագրեր են հանձնել։ Երիտասարդներից մեկը հայտնել է, որ չափահասներին նաև առաջարկել են պայմանագիր կնքել Պաշտպանության նախարարության հետ։ Հայտնի չէ՝ արդյոք բերման ենթարկվածներից որևէ մեկը համաձայնել է այդ առաջարկին։

Բերման ենթարկվածներից մի քանիսը բողոքել են ուժայինների կողմից բռնության գործադրումից։ Ոմանք պնդել են, որ մի քանի ժամ անցկացրել են գերլցված հատուկ ավտոմեքենաներում։

Մոսկվայի՝ ՌԴ ՆԳՆ գլխավոր վարչությունում ստուգայցերն անվանել են «կանխարգելիչ միջոցառումներ», որոնք ուղղված են իրավախախտումների, այդ թվում՝ հասարակական վայրերում ալկոհոլ օգտագործելու հետ կապված խախտումների կանխարգելմանն ու կանխմանը, գրում է «Коммерсантъ»-ը։

Գերատեսչությունում չեն հստակեցրել բերման ենթարկվածների ընդհանուր թիվը։

«Օրենսդրությունը խախտած անձանց նկատմամբ օրենքով սահմանված կարգով միջոցներ կձեռնարկվեն», — հայտարարել են Ռուսաստանի ՆԳՆ Մոսկվայի գլխավոր վարչության մամուլի ծառայությունում։

BMW-ն փորձարկում է i3 Touring էլեկտրական ունիվերսալը, որը պետք է ընդլայնի Neue Klasse էլեկտրական մեքենաների ընտանիքը։ Մասնակի քողարկմամբ նախատիպը նկատել են Նյուրբուրգրինգի մայրուղում։ Նոր մոդելի պրեմիերան սպասվում է 2027 թվականին, գրել է Motor 1-ը։

i3 սեդանի համեմատ՝ ունիվերսալը կունենա երկարացված տանիք և թափքի ավելի գործնական հետնամաս՝ բեռնախցիկի մեծ դռնով։ Առջևի հատվածը, դատելով փորձարկվող նախատիպից, գրեթե նույնը կլինի, ինչ սեդանինը։

Ավտոմեքենայի տանիքին տեսանելի է համայնապատկերային ապակե վահանակը։ Հավանաբար, այն կլինի անշարժ՝ առանց սահող հատվածի։ Մեկ այլ հնարավոր փոփոխություն վերաբերում է հետևի դռանը․ նախատիպի վրա չի երևում հետևի ապակին բեռնախցիկի հիմնական դռնից անկախ բացելու առանձին կոճակ։ BMW-ն արդեն հրաժարվել է այս գործառույթից 5 Series և i5 Touring ունիվերսալներում։ Ընկերությունում որոշումը բացատրել են աերոդինամիկայի պահանջներով։

Սրահը, ենթադրաբար, կկրկնի i3 սեդանի ձևավորումը։ Կլինեն մեծ կենտրոնական էկրան, դիմապակու ստորին հատվածում տեղեկատվության պրոյեկցիա և ֆիզիկական կոճակների կրճատված քանակ։

Ունիվերսալի գլխավոր առավելությունը կլինի տարողունակ բեռնախցիկը։ i3 սեդանի դեպքում դրա ծավալը 420 լիտր է, իսկ Touring-ի բեռնային տարածքը պետք է ավելի մեծ լինի։ Առջևի՝ 31 լիտր ծավալով բեռնախցիկը, հավանաբար, կպահպանվի։

Էլեկտրական ունիվերսալի արտադրությունը կկազմակերպվի Մյունխենի BMW գործարանում։ Միաժամանակ, ներքին այրման շարժիչով ապագա 3 Series ունիվերսալը, եթե ընկերությունը թողարկի դրա նոր սերունդը, կկառուցվի այլ հարթակի վրա և կարտադրվի Դինգոլֆինգում։

Հետագայում BMW-ն կարող է ներկայացնել նաև ունիվերսալի սպորտային տարբերակները։ Հնարավոր տարբերակների թվում նշվում են i3 M60-ը և չորս էլեկտրաշարժիչով ամբողջովին էլեկտրական M3 Touring-ը։ Սակայն այս տարբերակները դեռ պաշտոնապես չեն հաստատվել։

Իտալացի շեֆ-խոհարար Դավիդե Տամբուրելան չի կարողացել վիճարկել Ավստրալիայի Բրիսբեն քաղաքի La Costa ռեստորանից իր հեռացումը, որը տեղի է ունեցել խոզապուխտով և արքայախնձորով պիցցա պատրաստելուց հրաժարվելուց հետո, գրել է ABC News-ը։

Ավստրալիայի աշխատանքային հարաբերությունների հանձնաժողովը մերժել է նրա դիմումը, քանի որ այն ներկայացվել էր սահմանված ժամկետից ուշ։

Տամբուրելային աշխատանքից ազատել են 2026 թվականի մայիսի 20-ին՝ ղեկավարության հետ հանդիպումից հետո, որի ընթացքում քննարկվել են դժգոհությունները նրա աշխատանքից։ Դրանց թվում էր միջոցառման հյուրերի համար խոզապուխտով և արքայախնձորով պիցցա պատրաստելուց հրաժարվելը։ Խոհարարը բացատրել է, որ պիցցայի մեջ արքայախնձոր ավելացնելը համարում է վիրավորանք իտալական մշակույթի նկատմամբ։ Հանձնաժողովի տվյալներով՝ չորս տարվա ընթացքում նա երեք անգամ հրաժարվել է կատարել նման խնդրանքներ։

Սակայն այս դրվագը գործատուի միակ դժգոհությունը չէր։ Ղեկավարությունը նաև մատնանշել է հույզերի անպատշաճ դրսևորումը, գործընկերների հետ շփման խնդիրները, հյուրերին սպասարկելու վարքագիծը և հրահանգները չկատարելը։ Ռեստորանի սեփականատեր Էլիոթ Ինգրեմը հայտնել է, որ աշխատանքից ազատելու որոշումը պայմանավորված է եղել մի շարք հանգամանքներով, թեև պիցցայի շուրջ ծագած վեճն ազդել է դրա վրա։

Տամբուրելան նաև պնդել է, որ իր հեռացումը կարող էր կապված լինել աշխատանքային վնասվածքի հետ. ապրիլին նա աշխատավայրում կոտրել էր աջ ձեռքի երկու ոսկոր։ Նա հանձնաժողովին խնդրել է թույլատրել բողոքը ներկայացնել ժամկետն անցնելուց հետո՝ ուշացումը բացատրելով առողջական խնդիրներով, սթրեսով և ներգաղթային կարգավիճակի վերաբերյալ իր մտավախություններով։

Կանոնների համաձայն՝ աշխատանքից ազատումը վիճարկելու դիմումը պետք է ներկայացնել 21 օրվա ընթացքում։ Տամբուրելան հանձնաժողովին դիմել է 28 օր ուշացումով։ Կոմիսար Ջենիֆեր Հանթը որոշել է, որ ներկայացված հանգամանքները բացառիկ չեն և չեն հիմնավորում ժամկետի երկարաձգումը։ Միաժամանակ, հանձնաժողովը վերջնական որոշում չի կայացրել աշխատանքից ազատման հետ կապված բոլոր մեղադրանքների էության վերաբերյալ։

La Costa ռեստորանը հետագայում փակվել է։ Տամբուրելան աշխատանքի է անցել որպես շեֆ-խոհարար մեկ այլ իտալական ռեստորանում։