julbaz.mediamonitoring.am

ԱՄՆ նախագահ Դոնալդ Թրամփի սպառնալիքը՝ ոչնչացնել իրանական քաղաքակրթությունը, անընդունելի է։ Այս մասին հայտարարել է ՄԱԿ-ում Իրանի մշտական ներկայացուցիչ Ամիր Սաիդ Իրավանին։

Նա նաև ցավալի է անվանել այն փաստը, որ ԱՄՆ առաջնորդը ողջ աշխարհի աչքի առաջ սպառնում է ոչնչացնել երկրի ողջ քաղաքացիական ենթակառուցվածքը։

«ԱՄՆ-ի կողմից քաղաքացիական ենթակառուցվածքներին հարվածներ հասցնելու դեպքում Իրանը կձեռնարկի համաչափ պատասխան միջոցներ։ ԱՄՆ-ն և Իսրայելը պատասխանատվություն կկրեն հետագա բոլոր հետևանքների համար՝ թե՛ տարածաշրջանային, թե՛ միջազգային», — նշել է Իրավանին։

Նրա խոսքով՝ Թեհրանը մերժում է ժամանակավոր հրադադարը, քանի որ, իր կարծիքով, դա անհրաժեշտ է ԱՄՆ-ին ուժերի վերախմբավորման և Իրանին հարվածները շարունակելուն նախապատրաստվելու համար։

«Առանց կասկածի, Իրանը լիակատար վճռականությամբ կձեռնարկի բոլոր անհրաժեշտ միջոցները իր ժողովրդի պաշտպանության, իր ինքնիշխանության և տարածքային ամբողջականության ապահովման, ինչպես նաև իր կենսական ազգային շահերի պաշտպանության համար», — ընդգծել է մշտական ներկայացուցիչը։

Ռուսաստանն ու Չինաստանը վետո են կիրառել Հորմուզի նեղուցի վերաբերյալ ՄԱԿ-ի Անվտանգության խորհրդի բանաձևի նախագծի վրա, որն առաջարկել էր Բահրեյնը։

Ի պաշտպանություն նախագծի հանդես է եկել 11 երկիր, Պակիստանն ու Կոլումբիան ձեռնպահ են մնացել։

Բահրեյնի կողմից Պարսից ծոցի երկրների աջակցությամբ պատրաստված փաստաթուղթը թույլ էր տալու միջազգային ուժերին օգտագործել «բոլոր անհրաժեշտ միջոցները» նեղուցի ապաշրջափակման և ազատ նավարկության երաշխավորման համար:

Հայաստանի ֆուտբոլի ազգային հավաքականի խաղացողները միացել են ապրիլի 7-ի տոնական բարեմաղթանքներին՝ յուրահատուկ կերպով շնորհավորելով կանանց և մայրերին։

Մայրության և գեղեցկության օրվա առթիվ Հայաստանի ֆուտբոլի ֆեդերացիայի մամուլի ծառայությունը հուզիչ տեսահոլովակ է հրապարակել:

Տեսանյութում ազգային ընտրանու ֆուտբոլիստներն իրենց երախտագիտությունն ու սերն են արտահայտում՝ համատեղ արտասանելով հայ մեծանուն քնարերգու Հովհաննես Շիրազի հայտնի՝ «Մորս սրտի հետ աշխարհն եմ չափել» ստեղծագործությունը:

Ապրիլի 7-ին` ժամը 17։19-ին, Լոռու մարզային օպերատիվ կառավարման կենտրոն ահազանգ է ստացվել, որ Հարթագյուղ բնակավայրից «Սուրբ Հովհաննես» մատուռ բարձրացող սարալանջին քաղաքացին ընկել է և վնասել ոտքը. անհրաժեշտ է փրկարարների օգնությունը։

ՆԳՆ Փրկարար ծառայությունից տեղեկացնում են, որ դԴեպքի վայր է մեկնել ՆԳՆ ՓԾ մարզային փրկարարական վարչության հրշեջ-փրկարարական ջոկատից մեկ մարտական հաշվարկ։

Փրկարարները քաղաքացուն տեղում ցուցաբերել են համապատասխան օգնություն, այնուհետև պատգարակով մոտեցրել շտապօգնության ավտոմեքենային։

Բարձրագույն ուսումնական հաստատությունները մինչև 2029-30 ուսումնական տարին ներառյալ ընդունելությունը կիրականացնեն ներկայում գործող իրավակարգավորումներով։ Այդ նպատակով 2025 թվականին ընդունված «Բարձրագույն կրթության և գիտության մասին» նոր օրենքի անցումային դրույթներում համապատասխան հստակեցումներ են առաջարկվում՝ նկատի ունենալով, որ այս ընթացքում կմշակվի և կգործարկվի ընդունելության նոր կարգը, որի պահանջն ամրագրված է նոր օրենքով։

Համապատասխան նախագիծն ապրիլի 7-ին քննարկվել է ԱԺ ԳԿՄՍԵՍ հարցերի մշտական հանձնաժողովի նիստում։ Ներկայացնելով նախագիծը՝ ԿԳՄՍ նախարար Ժաննա Անդրեասյանը նշել է, որ նախագծով բովանդակային փոփոխություն չի առաջարկվում, այլ ընդամենը, հաշվի առնելով մեծածավալ փոփոխությունների իրականացման համար պահանջվող աշխատանքները, առաջարկվում է անցումային դրույթները հստակեցնել։

Ըստ նախարարի՝ քննարկվող նախագծով կարգավորում է անցումային ժամանակահատվածում ընդունելության գործընթացի կազմակերպումը, որը կմնա անփոփոխ մինչև 2030 թվականը։ Նոր օրենքի համաձայն՝ նոր պայմաններով նախատեսվող ընդունելությունը կազմակերպվելու է նշված ժամանակահատվածից հետո, երբ բուհերն արդեն պատրաստ կլինեն ընդունելության նոր համակարգին անցմանը։

Ժաննա Անդրեասյանի խոսքով՝ երկրորդ կարգավորումը վերաբերում է բուհերի կառավարմանը, մասնավորապես՝ ռեկտորների ընտրության գործընթացին, որտեղ ևս որոշակի տեխնիկական բնույթի փոփոխություններ են առաջարկվում։

Նշվել է, որ «Բարձրագույն կրթության և գիտության մասին» օրենքում լրացումներ կատարելու նախագծի ընդունումը պայմանավորված է օրենքի սահուն կիրարկման համար անհրաժեշտ անցումային դրույթների և համապատասխան լիազորող նորմերի նախատեսման անհրաժեշտությամբ։

Առաջարկվող փոփոխությունները թույլ կտան ապահովել գիտական կազմակերպությունների և բուհերի կառավարման ընթացիկ գործընթացների կարգավորումը՝ նախքան նոր օրենքի կիրարկումն ապահովող անհրաժեշտ ենթաօրենսդրական ակտերի ընդունումը:

Նախագծի ընդունումը կնպաստի նաև բարձրագույն ուսումնական հաստատությունների (մասնավորապես՝ բակալավրի կրթական աստիճանում) ընդունելության գործընթացի բնականոն կազմակերպմանը, յուրաքանչյուր ուսումնական տարվա համար հաստատվող մասնագիտությունների և քննությունների ցանկի, պետության կողմից լրիվ փոխհատուցմամբ տեղերի հաստատման համար լիազորող նորմերի ամրագրմանը՝ մինչ նոր ենթաօրենսդրական ակտերի ընդունումը։

Ապրիլի 7-ին խոշոր ավտովթար է տեղի ունեցել Երևանում։ Ժամը 17։50-ի սահմաններում «Howo» մակնիշի բեռնատար ավտոմեքենան Հարավ-Արևմտյան թաղամասից դեպի նոր Հյուսիս-Հարավ կառուցված ճանապարհին՝ «Դեֆանս» թաղամասի մոտ, բախվել է երկաթե պաշտպանիչ ճաղավանդակին և հայտնվել կամրջի հարևանությամբ՝ ճանապարհի երթևեկելի գոտում։

Shamshyan.com-ի հաղորդմամբ, ըստ նախնական տեղեկությունների՝ տուժածներ չկան։

Վթարի փաստով ՊԾ Երևան քաղաքի գնդում փաստաթղթեր են կազմվում։ Բեռնատարը բարձված է եղել «սալյարկայով», ինչի պատճառով էլ սկսվել է արտահոսք, իսկ վթարի հետևանքով վնասվել են «Hyundai Elantra», «Toyota Camry», «Honda Fit» և «Kia» մակնիշի ավտոմեքենաները։

Իսրայելի ռազմաօդային ուժերը երեքշաբթի հարվածներ են հասցրել Իրանի երկաթուղային ցանցի շուրջ 10 առանցքային հատվածների և կամուրջների: Այս մասին The Times of Israel պարբերականին հայտնել է սեփական աղբյուրը:

Ըստ հրապարակման՝ հարձակումները մաս են կազմում Իսլամական հեղափոխության պահապանների կորպուսի (ԻՀՊԿ) կողմից սպառազինությունների տեղափոխումը կանխելու ջանքերին:

Հարվածներից քիչ առաջ Իսրայելի պաշտպանության բանակը զգուշացրել էր Իրանի բնակիչներին՝ մինչև երեկո ձեռնպահ մնալ երկաթուղային տրանսպորտից օգտվելուց:

Աղբյուրը նշել է, որ ԻՀՊԿ-ն օգտագործել է երկաթուղային և ավտոմոբիլային կամուրջները սպառազինություն և ռազմական բեռներ տեղափոխելու համար: Իսրայելը նախկինում հայտարարել էր Իրանի ենթակառուցվածքային օբյեկտներին հարվածներ հասցնելու պատրաստակամության մասին՝ նպատակ ունենալով տնտեսական վնաս հասցնել երկրին:

NASA-ն հրապարակել է պատմական լուսանկարներ, որոնք արվել են Artemis 2 առաքելության տիեզերագնացների կողմից Orion տիեզերանավից՝ Լուսնի շուրջ թռիչքի ժամանակ: Կադրերը հայտնվել են Սպիտակ տան X-ի էջում. 

NASA-ի պաշտոնական կայքում դրանք դեռևս չկան: Տասնամյակների ընթացքում առաջին անգամ մարդիկ կրկին հնարավորություն են ստացել Լուսինն ու Երկիրը նկարահանել նման դիրքից ոչ թե ավտոմատ սարքերով, այլ անմիջապես տիեզերանավից:

Ամենաուշագրավ լուսանկարներից մեկը Երկրի պատկերն է լուսնային հորիզոնի վրա՝ 1968 թվականի «Ապոլոն 8» առաքելությունից հետո պատմության մեջ մտած հայտնի «Երկրի ծագումը» լուսանկարի ժամանակակից տարբերակը: Լուսանկարում առանձնապես լավ երևում է ոչ միայն Երկրի սկավառակը, այլև Լուսնի մակերևույթը, որի գույնը ոչ թե սովորական արծաթափայլ մոխրագույն է, այլ ավելի շուտ շագանակագույն:

Հրապարակված երկրորդ կադրում երևում է արևի խավարումը՝ դիտված Orion-ի տախտակամածից: Այդ պահին Լուսինը հայտնվել է տիեզերանավի և Արեգակի միջև: