Վաշինգտոնին այլևս պետք չէ Իրանի հետ համաձայնագիրը. Թրամփ

ԱՄՆ նախագահ Դոնալդ Թրամփը հայտարարել է, որ Վաշինգտոնին այլևս պետք չէ Իրանի հետ համաձայնագիրը։

Այս մասին ԱՄՆ ղեկավարը հայտարարել է Truth Social սոցհարթակում։

«Մեզ Իրանի հետ համաձայնագիր պետք չէ։ Այդ օրերը վաղուց անցել են։ Մենք ունենք նրանց փողերը՝ հարյուր միլիարդավոր դոլարներ, և մենք ունենք նրանց նեղուցը», – գրել է նա։

Ալեն Սիմոնյանը ռուսերեն բանաստեղծությամբ է արձագանքել ՀԱՊԿ-ում Հայաստանին ձայնի իրավունքից զրկելու որոշմանը

Ալեն Սիմոնյանը ռուսերեն բանաստեղծությամբ է արձագանքել ՀԱՊԿ-ում Հայաստանին ձայնի իրավունքից զրկելու որոշմանը

ԱԽ քարտուղար Ալեն Սիմոնյանը սոցցանցի իր էջում ռուսերեն բանաստեղծությամբ է արձագանքել նախօրեին ՀԱՊԿ-ում Հայաստանին ձայնի իրավունքից զրկելու որոշմանը։

«Лишили голоса нас там,
     где очень громко все молчали
     когда нас дружно убивали»,- գրել է Սիմոնյանը։

Ուիթքոֆը հույս ունի Պուտինի հետ հանդիպումից հետո հայտարարել Ուկրաինայի հարցով ԵՄ մասնակցությամբ նոր եռակողմ բանակցությունների մասին

ԱՄՆ նախագահի հատուկ բանագնաց Սթիվ Ուիթքոֆը հույս է հայտնել, որ Մոսկվայում Ռուսաստանի նախագահ Վլադիմիր Պուտինի հետ հանդիպումից հետո հնարավոր կլինի հայտարարել Ուկրաինայի հարցով եռակողմ բանակցությունների հաջորդ փուլի մասին՝ արդեն Եվրամիության ներկայացուցիչների մասնակցությամբ. հաղորդում է ՌԻԱ Նովոստին։

«Հուսով ենք, որ շուտով, հնարավոր է՝ հենց այս հանդիպումից հետո, կկարողանանք հայտարարել Եվրամիության ներկայացուցիչների մասնակցությամբ հաջորդ եռակողմ հանդիպման մասին»,- Կրեմլում Պուտինի հետ հանդիպմանը հայտարարել է Ուիթքոֆը։

Ամերիկացի բանագնացը նաև ընդգծել է, որ ԱՄՆ նախագահ Դոնալդ Թրամփն անհրաժեշտ է համարում հնարավորինս շուտ ավարտել ուկրաինական հակամարտությունը, տեղեկացնում է ՏԱՍՍ-ը։

«Նախագահ Թրամփը կարծում է, որ շատ կարևոր է հնարավորինս արագ ավարտել այս հակամարտությունը։ Մենք մեր կողմից անում ենք անհրաժեշտ ամեն ինչ այն ավարտին հասցնելու համար»,- նշել է Ուիթքոֆը։

Ուիթքոֆը և ԱՄՆ նախագահի մյուս հատուկ բանագնաց Ջարեդ Քուշները Մոսկվա են ժամանել Աբու Դաբիից, որտեղ ավելի վաղ կայացել էին Ռուսաստանի, ԱՄՆ-ի և Ուկրաինայի եռակողմ բանակցությունները։

Ռուսական պատվիրակության ղեկավար, ՌԴ նախագահի օգնական Վլադիմիր Մեդինսկու խոսքով՝ Աբու Դաբիի բանակցությունների առանցքային թեման եվրոպական անվտանգության ճարտարապետությունն էր։

Փեզեշքիանն ու Էրդողանը քննարկել են առևտուրը, տարածաշրջանային կայունությունն ու երկու երկրների հարաբերությունները

Իրանի և Թուրքիայի նախագահներ Մասուդ Փեզեշքիանն ու Ռեջեփ Թայիփ Էրդողանը Թուրքիայում ՄԱԿ-ի Կլիմայի փոփոխության 31-րդ համաժողովի (COP31) շրջանակում կայացած հանդիպմանը քննարկել են երկկողմ համագործակցության ընդլայնումն ու տարածաշրջանային կայունության ամրապնդումը, հայտնում է Mehr-ը։

Պետությունների ղեկավարները դիտարկել են քաղաքական, տնտեսական և առևտրային կապերի զարգացման ուղիները, ինչպես նաև մտքեր փոխանակել տարածաշրջանային ու միջազգային առանցքային հարցերի շուրջ։

Փեզեշքիանն ու Էրդողանն ընդգծել են Իրանի և Թուրքիայի պատմական, մշակութային ու քաղաքակրթական ընդհանրությունները՝ նշելով երկու հարևան երկրների ժողովուրդների միջև կապերի ամրապնդման կարևորությունը։ Նրանք հայտարարել են քաղաքական, տնտեսական, առևտրային և տարածաշրջանային ոլորտներում փոխգործակցությունն ընդլայնելու համար առկա ներուժն ավելի արդյունավետ օգտագործելու անհրաժեշտության մասին։

Առաջնահերթ ուղղությունների թվում կողմերն առանձնացրել են ապրանքաշրջանառության ավելացումը, տնտեսական համագործակցության դյուրացումը, մասնավոր հատվածի ներկայացուցիչների միջև կապերի ամրապնդումն ու համատեղ նախագծերի իրականացման նոր հնարավորությունների օգտագործումը։ Նախագահները վերահաստատել են փոխադարձ հարգանքի, բարիդրացիության և ընդհանուր շահերի հիման վրա հարաբերությունները զարգացնելու մտադրությունը։

Բանակցությունների ընթացքում առանձնահատուկ ուշադրություն է դարձվել տարածաշրջանում տիրող իրավիճակին և խաղաղության, կայունության ու երկարաժամկետ անվտանգության պահպանման համար երկրների միջև համագործակցության ամրապնդման անհրաժեշտությանը։ Կողմերն ընդգծել են երկխոսության, կառուցողական փոխգործակցության և լարվածության սրացումն ու անկայունության տարածումը կանխելուն ուղղված համատեղ ջանքերի կարևորությունը։

Նախագահները նաև նշել են տարածաշրջանի պետությունների ընդհանուր պատասխանատվությունը անվտանգության, կայունության և կայուն զարգացման ապահովման հարցում՝ մատնանշելով ընդհանուր խնդիրների լուծման համաձայնեցված մոտեցումների անհրաժեշտությունը։

Հայաստանի և Էստոնիայի վարչապետները քննարկել են երկկողմ կապերն ու Հայաստան-ԵՄ հարաբերությունները

Դուբլինում ընթացող Եվրոպական քաղաքական համայնքի 9-րդ գագաթնաժողովի շրջանակում տեղի է ունեցել Հայաստանի և Էստոնիայի վարչապետներ Նիկոլ Փաշինյանի ու Քրիստեն Միխալի հանդիպումը:

Զրուցակիցները կարևորել են երկու երկրների միջև հարաբերությունների ինտենսիվ բնույթը՝ նշելով, որ վերջին ժամանակահատվածում երկկողմ բարձր մակարդակի շփումները դարձել են պարբերական: Կողմերը վստահություն են հայտնել, որ դա կնպաստի տարբեր ոլորտներում Հայաստան-Էստոնիա կապերի զարգացմանն ու ընդլայնմանը:

Նիկոլ Փաշինյանը և Քրիստեն Միխալն անդրադարձել են նաև Հայաստան-Եվրոպական միություն հարաբերություններին և դրանց հետագա խորացմանը: Մտքեր են փոխանակվել տարածաշրջանային նշանակության այլ թեմաների շուրջ:

Եվրոպական քաղաքական համայնքի 9-րդ գագաթնաժողովի դիմավորման արարողությունը՝ Դուբլինում


Դուբլինում տեղի է ունեցել Եվրոպական քաղաքական համայնքի 9-րդ գագաթնաժողովի դիմավորման արարողությունը: ՀՀ վարչապետ Նիկոլ Փաշինյանը ֆեյսբուքյան էջում լուսանկար է հրապարակել:

Շատ ցավալի բան է եղել․․․ Հեգնանքն ու սպառնալիքն ատելության դեմքն ունեն հասարակության մեջ


Շատ ցավալի բան է եղել: ՀՀ արդարադատության նախարար Սրբուհի Գալյանը լքել է (կամ ընդմիջել է) մամուլի ասուլիսը՝ հուզվելով, որ երկրում ամեն օր արձանագրվող մահերի…

Քաղաքական հետապնդումներ ու կալանավորումներ․ ՔՊ-ն մերժեց ընդդիմության հայտարարությունը

Այսօր Հայաստանում ժողովրդավարության վիճակի շուրջ թեժ բանավեճ ծավալվեց Ազգային ժողովի պետա-իրավական հարցերի մշտական հանձնաժողովի նիստում։ Ընդդիմադիր «Հայաստան» խմբակցությունն ահազանգ հնչեցրեց քաղաքական հետապնդումների, կալանքի լայն կիրառման և մարդու իրավունքների խախտումների մասին, մինչդեռ իշխող «Քաղաքացիական պայմանագիր» խմբակցության պատգամավորները վիճարկեցին այդ գնահատականները։

«Հայաստան» խմբակցության պատգամավոր Լիլիթ Գալստյանը հանձնաժողովին ներկայացրեց «Հայաստանում ժողովրդավարության նահանջի վերաբերյալ» հայտարարության նախագիծը։ Ըստ Գալստյանի՝ Հայաստանում ժողովրդավարության հետընթացի դրսևորումներից են կալանավորումները, քրեակատարողական հիմնարկներում մահվան դեպքերը, զանգվածային գաղտնալսումներն ու քաղաքական հետապնդումները։

Իր ելույթում ընդդիմադիր պատգամավորը հղում արեց նաև միջազգային իրավապաշտպան կազմակերպությունների զեկույցներին՝ նշելով, որ դրանցում խոսվում են Հայաստանում մարդու իրավունքների պաշտպանության, դատական համակարգի անկախության և ազատությունների սահմանափակման վերաբերյալ մտահոգություններ։

Իշխանական պատգամավորները, սակայն, չհամաձայնեցին ընդդիմության ներկայացրած գնահատականներին։ ՔՊ խմբակցության պատգամավոր Լիլիթ Մինասյանը Գալստյանից պահանջեց մատնանշել միջազգային զեկույց, որտեղ կոնկրետ անձ ճանաչվել է քաղբանտարկյալ։

«Մի միջազգային զեկույց ասեք, որտեղ քաղբանտարկյալի անուն կա»,- հարցրեց Մինասյանը։

Ի պատասխան՝ Լիլիթ Գալստյանը հիշատակեց ՀՀԿ փոխնախագահ Արմեն Աշոտյանի գործը՝ հղում անելով Եվրոպական ժողովրդական կուսակցության 2023 թվականի նոյեմբերի 14-ի բանաձևին, որում մտահոգություն էր արտահայտվել նրա կալանավորման վերաբերյալ։

Քննարկման ընթացքում անդրադարձ կատարվեց նաև Վանաձորի նախկին քաղաքապետ Մամիկոն Ասլանյանի և նոյեմբերի 10-ին «Նուբարաշեն» քրեակատարողական հիմնարկում մահացած, «Ուժեղ Հայաստան» կուսակցության ներկայացուցիչ Արսեն Գևորգյանի գործերին։

Բանավեճն ավելի սրվեց, երբ ՔՊ խմբակցության պատգամավոր Արման Եղոյանը Լիլիթ Գալստյանին հորդորեց ժողովրդավարության նահանջի փոխարեն խոսել «ծովից ծով Հայաստանի» մասին։

«Դուք այդ իրավունքը չունեք ինձ ասելու՝ ինչի մասին խոսեմ»,- հակադարձեց Գալստյանը՝ իշխանական պատգամավորի հորդորը գնահատելով որպես իր խոսքի թեման թելադրելու փորձ։

Երկարատև և բուռն քննարկումից հետո իշխող «Քաղաքացիական պայմանագիր» խմբակցության պատգամավորները դեմ քվեարկեցին ընդդիմության ներկայացրած հայտարարության նախագծին։ Այդուհանդերձ, «Հայաստան» խմբակցությունը չի պատրաստվում թեման հանել օրակարգից։ Խմբակցությունը Հայաստանում ժողովրդավարության նահանջի վերաբերյալ խորհրդարանական լսումներ է հրավիրել։

Գառնի Մութաֆյան

Վեհափառի եղբորն ու եղբորորդուն դատարանը մեղավոր ճանաչեց (տեսանյութ)

Վեհափառի եղբորն ու եղբորորդուն դատարանը մեղավոր ճանաչեց

Արմավիրի մարզի ընդհանուր իրավասության դատարանը՝ դատավոր Գևորգ Մանուկյանի նախագահությամբ, Վեհափառի եղբայր Գևորգ Ներսիսյանին նշանակեց երեք տարի ազատազրկում և պատիժը պայմանականորեն չկիրառեց՝ նշանակելով փորձաշրջան։

Վեհափառի եղբորորդի Համբարձում Ներսիսյանին դատարանը նշանակեց ազատազրկում՝ երեք տարի հինգ ամիս ժամկետով և որոշեց պատիժը հետաձգել՝ մինչև վերջինիս երեխան դառնա վեց տարեկան։

Հիշեցնենք, որ Ամենայն հայոց կաթողիկոսի եղբայրը` Գևորգ Ներսիսյանը և նրա որդին` Համբարձում Ներսիսյանը, ձերբակալվել են նոյեմբերի 2-ին: Նրանց մեղադրում են խուլիգանության և քարոզչությունը խոչընդոտելու մեջ։ Ըստ փաստաբան Արա Զոհրաբյանի` Համբարձում Ներսիսյանը նոյեմբերի 1-ին` ժամը 14:40-ի սահմաններում, կանգնած է եղել իր տան դարպասի դիմաց, նրան մի մարդ է մոտեցել և առաջարկել է մասնակցել «Հանրապետություն» կուսակցության` ժամը 16:00-ի հանդիպմանը: Համբարձում Ներսիսյանը հրաժարվել է, այդ մարդը փորձել է համոզել, խոսել են, այնուհետև մոտեցել է Համբարձումի հայրը՝ Գևորգ Ներսիսյանը, երեքով խոսել են և խաղաղ բաժանվել:

Քրեական վարույթի հիմք է դարձել Վաղարշապատ խոշորացված համայնքում «Հանրապետություն» կուսակցության թեկնածու Հարություն Մկրտչյանի գրառումը, որտեղ նշված էր, որ նոյեմբերի 1-ին Գևորգ Ներսիսյանը և նրա որդին խոչընդոտել են նախընտրական քարոզչությանը։