julbaz.mediamonitoring.am

Մայիսի 28-ին կտեսնեք, թե ինչ է արել Ֆրանսիայի նախագահ Էմանուել Մակրոնը Հայաստանի համար։ Այս մասին մայիսի 7-ին լրագրողների հետ զրույցում հայտարարել է Հայաստանի վարչապետ Նիկոլ Փաշինյանը։

«Ինչո՞ւ պետք է պատմեմ։ Կցուցադրեմ», – նշել է նա։ Փաշինյանը հույս է հայտնել, որ հարցը տված լրագրողը Հայաստանում կլինի, այլ կարևոր գործեր չի ունենա, և կկարողանա լուսաբանել միջոցառումը՝ զորահանդեսը։ «Եթե չկարողանաք ներկա լինել միջոցառմանը, կարող եք միացնել հեռուստացույցը և տեսնել, թե ինչ է արել Մակրոնը», – հավելել է նա։

Ավելի վաղ Փաշինյանը հայտարարել էր, որ մայիսի 28-ին՝ Հայաստանի Առաջին Հանրապետության օրը, Երևանի Հանրապետության հրապարակում կկայանա զինվորական շքերթ։

Նշենք, որ Մակրոնը մայիսի 3-5-ը պետական այցով եղել է Հայաստանում և ընտրական շրջանում հերթական անգամ հայտարարել է գործող իշխանություններին ուղիղ աջակցելու մասին։

Ես դեռ 2022 կամ 2023 թվականին ասում էի, որ Ուկրաինայի հարցում մենք Ռուսաստանի հետ դաշնակիցներ չենք։ Այս մասին մայիսի 7-ին լրագրողների հետ զրույցում հայտարարել է Հայաստանի վարչապետ Նիկոլ Փաշինյանը։

Նրա խոսքով՝ Ալմա-Աթայի հռչակագիրը Հայաստանի համար սկզբունքային նշանակություն ունի, և Երևանը հիմք է ընդունում այդ հռչակագիրը՝ Ադրբեջանի հետ հարաբերությունները կառուցելիս։

Նա հիշեցրեց, որ Հայաստանը Ուկրաինա է ուղարկել մարդասիրական օգնություն։ Խոսելով Ուկրաինայի նախագահ Վլադիմիր Զելենսկու՝ 2020 թվականի պատերազմից հետո Ադրբեջանի հասցեին շնորհավորանքների մասին՝ Փաշինյանը հիշեցրեց, որ ՀԱՊԿ անդամները, օրինակ՝ Բելառուսը, նույնպես շնորհավորել էին Ադրբեջանին։

«Ես չեմ տեսել, որ «Բարգավաճ Հայաստան» կուսակցության ղեկավարը, ով ընկերական հարաբերությունների մեջ է (Լուկաշենկոյի հետ–խմբ), այդ մասին որևէ բան ասեր։ Նման կերպ էին արտահայտվել նաև ռուս բարձրագույն պաշտոնյաները։ Ինչո՞ւ դրան չարձագանքեց «Բարգավաճ Հայաստան» կուսակցության ղեկավարը», – նշեց Փաշինյանը։

Նա ընդգծեց, որ 2022 թվականի հոկտեմբերի 6-ի Պրահայի հայտարարությունից առաջ Ռուսաստանի նախագահը երկու անգամ հայտարարել էր, որ Ղարաբաղը Ադրբեջանի մաս է։ «Ինչպե՞ս են դա մեկնաբանում «Բարգավաճ Հայաստան», «Ուժեղ Հայաստան» կուսակցությունների և «Հայաստան» դաշինքի ներկայացուցիչները։ Բելառուսի նախագահը Ադրբեջան կատարած այցի ընթացքում ուղիղ հայտարարել է, որ մասնակցել է 44-օրյա պատերազմի նախապատրաստմանը։

«Բարգավաճ Հայաստան» կուսակցության ղեկավարը մինչ այժմ այս կապակցությամբ իր դիրքորոշումը չի հայտնել։ Թող արտահայտվի։ Բելառուսի նախագահն ասել է, որ Հայաստանն այլևս ոչ ոքի պետք չէ, բացի ԵԱՏՄ երկրներից։ Թող «Բարգավաճ Հայաստան» կուսակցության ղեկավարը նաև այս հարցի մասին արտահայտվի», – եզրափակեց Նիկոլ Փաշինյանը։

Ձեր նշած անձը Տաշիրում Կառավարության արած ներդրումների նույնիսկ 10 տոկոսը չէր էլ կարող անել և չի արել վերջին տարիներին, որովհետև չի կարող որևէ մեկը Կառավարությանը համապատասխան ներդրումներ անել: Կառավարությունն է Տաշիրում ներդրումներ արել, դպրոց կառուցել: Այդ մասին, այսօր՝ մայիսի 7–ին, կառավարության նիստից հետո լրագրողների հետ ճեպազրույցի ժամանակ ասաց վարչապետ Նիկոլ Փաշինյանը՝ անդրադառնալով հարցին, թե ինչու է Սամվել Կարապետյանին անվանում «Կալուգացի օլիգարխ», եթե Հայաստանում նա հայտնի է «Տաշիրի Սամվել» անունով. դա հատուկ արվում է, որպեսզի ռուսականությո՞ւն հաղորդվի նրա կերպարին:

«Հայաստանում անձեր կան, բդեշխային տրամաբանության տարածքներ փորձում են կապել նրանց հետ: Այդ անձինք, ինչքան ներդրում են արել, 10 անգամ գողացել են, այդ թվում՝ էլեկտրաէներգիայի հավելագրումներ անելու տրամաբանությամբ»,- ասաց նա:

Այս համատեքստում Փաշինյանը հիշեցրեց, որ այսօր՝ Կառավարության նիստի ժամանակ, ներկայացվել է, որ ապօրինի գույքի բռնագանձման գործով մի առանձնատան նկատմամբ պետական սեփականություն է գրանցվել:

«Տեսա՞ք, ապօրինի գույքի բռնագանձման պրոցեսով վճռաբեկ դատարանի որոշմամբ արդեն պատերազմի եռագլուխ կուսակցության անդամներից մեկի ընտանիքի անդամի առանձնատունն այլևս պետական սեփականություն է: Առաջիկայում կդառնա կա՛մ ծերերի խնամքի կենտրոն, կա՛մ որևէ այլ բան…

Ես ընդհանրապես ոչ միայն դեմ եմ, այլև թույլ չեմ տա, որ Հայաստանի որևէ տարածքի անուն կապվի որևէ անձի հետ, որովհետև այդ մարդիկ այդ տարածքի հետ կապ չունեն: Այդ տարածքն իրենց համար գոյության, հանցավոր գործունեության, բդեշխային հարաբերություններ հաստատելու տարածք է, և որտեղ ազատությունը չի մտել, այդտեղ այդ ազատությունը մտնելու է: Հատիկ-հատիկ ձեռքներից առնելու ենք բոլոր գույքերը»,- ասաց նա:

Ինչ վերաբերում է կալուգացի բնորոշմանը, ապա, ըստ Փաշինյանի, Սամվել Կարապետյանին նման կերպ անվանելու պատճառն այն է, որ վերջինիս հետաքրքրությունների կենտրոնը ՀՀ-ից դուրս է:

Անդրադառնալով Ռոբերտ Քոչարյանին՝ լրագրողը հետաքրքրվեց՝ իշխող ուժի կողմից նրան ընդդիմության թեկնածու ներկայացնելու նպատակը նրան թիրախավորե՞լն է: Փաշինյանը արձագանքեց, որ Սամվել Կարապետյանը չի կարող լինել պատգամավորի և վարչապետի թեկնածու. «Ֆեյք լուրերից պրծանք, հիմա էլ ֆեյք թեկնածուների ձե՞ռքն ենք ընկնելու: Այդ մարդը հիբրիդային ֆեյք թեկնածու է: Ինչպես հիբրիդային լուրեր են տարածում ՀՀ-ում, հիմա էլ հիբրիդային ֆեյք թեկնածու են բերել ՀՀ-ում օգտագործելու համար»,- ասաց նա՝ հիշեցնելով, որ խորհրդարանական ընտրություններից հետո առաջին նիստի դրությամբ պետք է վարչապետ նշանակված լինի: