Դեմոկրատ օրենսդիրները պահանջում են ռազմական գերատեսչությունից բացատրություններ՝ կապված USS Abraham Lincoln ավիակրի վրա տիրող իրավիճակի հետ։ Բազմաթիվ վկայություններ են ի հայտ եկել այն մասին, որ երկարաձգված արշավը ծանր է անդրադարձել նավում ծառայող մոտ 5 000 նավաստիների և ծովային հետևակայինների հոգեկան վիճակի վրա։
Ինչպես հաղորդել է Navy Times պարբերականը, երեքշաբթի օրը անձնակազմը առնվազն երկու անգամ ստիպված է եղել կանխել նավաստիների՝ նավից նետվելու փորձերը։ Զինծառայողների ընտանիքների անդամները լրագրողներին հայտնել են, որ իրենց հարազատները գտնվում են խորը դեպրեսիայի մեջ։
The Wall Street Journal-ի տվյալներով՝ հղում անելով ԱՄՆ պաշտոնական ներկայացուցչին, օգոստոսի սկզբին մեկ մարդ իսկապես «նավից դուրս էր հայտնվել», սակայն նրան արագորեն փրկել են։
Ավիակիրը նավահանգստից դուրս է եկել 2025 թվականի նոյեմբերին՝ Հարավչինական ծովում նախատեսված յոթամսյա ծառայության համար։
2026 թվականի հունվարին նավը տեղափոխվել է Արաբական ծով՝ Իրանի դեմ «Էպիկական կատաղություն» (Operation Epic Fury) գործողության մեկնարկից կարճ ժամանակ առաջ։ Այդ ժամանակվանից այն անընդհատ գտնվում է այնտեղ։
Անցյալ շաբաթ, ըստ MS NOW-ի, ընտանիքների ավելի քան 200 անդամ հանդիպել են ՌԾՈւ նախարարի պաշտոնակատար Հուն Կաոյի (Hung Cao) հետ՝ իրենց մտահոգությունն արտահայտելու համար։ Հանդիպման մասնակիցներից մեկը Stars and Stripes-ին պատմել է, որ զինծառայող ամուսնուց հաղորդագրություն է ստացել. «Նա
Կալիֆոռնիայից դեմոկրատ կոնգրեսական Մայք Լևինը (Mike Levin) օգոստոսի 7-ին X սոցիալական ցանցում հրապարակել է նավի վրա առկա խնդիրների ցանկը.
-
Բորբոսապատ ցնցուղներ, կոտրված զուգարաններ, շաբաթներ առանց տաք ջրի։
-
Սակավ սնունդ, որը սահմանափակվում է «կես բաժակ բրնձով և երկու բլիթով»։
-
Դատարկված նավային խանութ, որտեղ սպառվել են օճառը, դեզոդորանտը և ատամի մածուկը։
-
Անձնակազմն այնքան է հյուծված, որ, ըստ հարազատներից մեկի, նավի բժիշկը նախազգուշացրել է. եթե շտապ նավահանգիստ չմտնեն, մարդիկ կսկսեն խելագարվել։
-
«Այսօր հիանալի օր կլիներ, որպեսզի [նախագահ] Թրամփը պաշտոնանկ աներ [պատերազմի նախարար] Փիթ Հեգսեթին և նրան փոխարիներ որևէ կոմպետենտ մեկով», — հայտարարել է Լևինը՝ հավելելով, որ դրանից հետո արտերկրում գտնվող ամերիկացի զինվորների անվտանգությունը միայն կուժեղանա։
Չորեքշաբթի օրը սենատոր Ռիչարդ Բլյումենթալը (D-Conn.) նամակ է ուղարկել Հեգսեթին և Հուն Կաոյին՝ նշելով, որ ավիակիրը «ավելի քան 200 օր նավահանգիստներ չի մտել՝ սահմանելով ծովում անընդմեջ անցկացրած օրերի ռեկորդ»։
Բլյումենթալը ՌԾՈւ-ից պահանջել է տրամադրել պաշտոնական զեկույց նավի պայմանների մասին, անձնակազմի պատրաստվածության գնահատական և Իրանի ափերի մոտ Լինքոլնի հետագա գտնվելու անհրաժեշտության հիմնավորում։
Հարցումներին ի պատասխան՝ ԱՄՆ ՌԾՈւ-ն CNN-ին հայտնել է. «Մենք նավի վրա չենք արձանագրում ինքնասպանական մտքերի կամ ինքնասպանության փորձերի աճ։ Մենք ամենայն լրջությամբ ենք վերաբերվում յուրաքանչյուր զինծառայողի բարեկեցությանը. իրավիճակը գնահատելու և օգնություն ցուցաբերելու համար հասանելի են կրոնական, բժշկական և հոգեբանական ծառայություններ»։
Պաշտպանական գերատեսչության պաշտոնյաները The Wall Street Journal-ին տված մեկնաբանությունում նշել են, որ նման պայմաններն ընդհանուր առմամբ բնորոշ են պատերազմական ժամանակաշրջանին, թեև նաև ընդունել են, որ նավահանգիստներում երկար ամիսներ կանգառների բացակայությունը ծանր ճնշում է գործադրում զորքերի վրա։
Հինգշաբթի օրը, գտնվելով Պանամայում՝ USS Gridley կործանիչի վրա ստուգայցով, պաշտպանության նախարար Փիթ Հեգսեթը լրագրողներին հայտարարել է, որ նավի վրա ստեղծված իրավիճակը «ամբողջությամբ խեղաթյուրված է». «Մենք անում ենք հնարավոր ամեն ինչ, որպեսզի յուրաքանչյուր նավ, յուրաքանչյուր անձնակազմ և յուրաքանչյուր հրամանատար ապահովված լինեն այն ամենով, ինչի կարիքն ունեն… Ես ուզում եմ, որ նրանք հնարավորինս շուտ վերադառնան տուն, — ասել է Հեգսեթը։ — Այն, ինչ նրանք անում են բաց ծովում այսքան խիստ պայմաններում՝ նավահանգիստներ նվազագույն մուտքերով, անհավանական է։ Ամերիկացիները պարզապես չեն հասկանում, թե դա ինչ է նշանակում»։
ԶԼՄ-ների հաղորդմամբ՝ մոտ ապագայում Պենտագոնը նախատեսում է փոխարինել USS Abraham Lincoln-ի հյուծված անձնակազմին՝ որպես փոխարինում ուղարկելով Ճապոնիայում տեղակայված USS George Washington ավիակիրը։