Հարավային Կորեայի նախագահ Լի Չժե Մյոնը Հյուսիսային Կորեային առաջարկել է սկսել բանակցություններ Կորեական պատերազմի պաշտոնական ավարտի շուրջ, որը տեխնիկապես մինչև օրս դեռ ավարտված չէ, հաղորդում է AFP-ն։
Համապատասխան հայտարարությամբ նա հանդես է եկել Կորեական թերակղզու՝ ճապոնական տիրապետությունից ազատագրման օրվա առթիվ կազմակերպված արարողության ժամանակ։
Լին առաջարկել է ստեղծել «անվտանգության բազմաստիճան համակարգ», որը թույլ կտա կանխել նոր բախումները ապառազմականացված գոտու շրջանում, որը բաժանում է երկու երկրները։ Նա նաև կոչ է արել քննարկել գործնական քայլեր՝ զսպելու Հյուսիսային Կորեայի միջուկային ծրագրի հետագա զարգացումը։
«Եկեք հրաժարվենք միմյանց սպառնալու մտադրություններից և որպես անմիջականորեն ներգրավված կողմեր սկսենք բանակցություններ բազմամյա պատերազմի դադարեցման շուրջ», — հայտարարել է հարավկորեացի նախագահը։
Ըստ նրա, երկու երկրները պետք է «նստեն դեմ առ դեմ՝ հանուն խաղաղ համակեցության և փոխադարձ աճի»։ Լին հույս է հայտնել, որ նման երկխոսությունը կհանդիսանա հարթակ՝ քննարկելու «Հյուսիսի միջուկային ներուժի հետագա զարգացումը կանգնեցնելու արդյունավետ եղանակները»։
Կորեական թերակղզում մարտական գործողությունները փաստացի դադարել են 1953 թվականին զինադադարի ստորագրումից հետո, սակայն խաղաղության պայմանագիր այդպես էլ չի կնքվել։ Հաջորդ տասնամյակների ընթացքում ապառազմականացված գոտու երկայնքով բազմիցս բախումներ են տեղի ունեցել, և լարվածությունը պահպանվել է։ Կողմերը նաև պարբերաբար միմյանց մեղադրել են սադրանքների մեջ, այդ թվում՝ աղբով և քարոզչական նյութերով օդապարիկներ արձակելու համար։
Լին, որն անցյալ տարի Հարավային Կորեայի նախագահի պաշտոնը ստանձնեց իր նախորդ Յուն Սոկ Յոլի իմփիչմենթից հետո, փորձում է բարելավել հարաբերությունները Փհենյանի և Չինաստանի հետ, որոնք զգալիորեն վատթարացել էին նախորդ վարչակազմի օրոք։
Հյուսիսային Կորեան 2022 թվականին պաշտոնապես իրեն հռչակեց միջուկային տերություն և հայտարարեց, որ չի հրաժարվի իր միջուկային զենքից։ Փորձագետների գնահատմամբ, Փհենյանն ունի մի քանի տասնյակ միջուկային մարտագլխիկներ։ Ավելի վաղ Լին ասում էր, որ Հյուսիսային Կորեան տարեկան արտադրում է ևս մոտ 15–20 մարտագլխիկ։
Հարավկորեական առաջնորդը նաև հայտարարել էր ԱՄՆ նախագահ Դոնալդ Թրամփի և Հյուսիսային Կորեայի առաջնորդ Կիմ Չեն Ընի միջև միջուկային զենքի արտադրությունը սառեցնելու վերաբերյալ հնարավոր պայմանավորվածությանը աջակցելու պատրաստակամության մասին։ Նա նման նպատակը անվանել էր «իրատեսական», թեև Սեուլը շարունակում է հանդես գալ Հյուսիսային Կորեայի լիակատար ապամիջուկայնացման օգտին։
Փհենյանը դեռևս չի արձագանքել Լիի նոր առաջարկին։ Հյուսիսային Կորեայի պետական լրատվամիջոցները միայն հայտնել են ազգային Ազատագրման օրվա առթիվ Կիմ Չեն Ընի մասնակցությամբ միջոցառումների մասին։
Ավելի վաղ հյուսիսկորեական իշխանությունները բազմիցս մերժել էին Լիի երկխոսության առաջարկները՝ մասնավորապես քննադատելով ԱՄՆ-ի և Հարավային Կորեայի միջև պաշտպանության ոլորտում համաձայնությունները և երկու երկրների համատեղ ռազմական զորավարժությունները։
Պահպանվող լարվածության ֆոնին Հյուսիսային Կորեան երեքշաբթի օրը բալիստիկ հրթիռ է արձակել դեպի ծով։ Սա, ենթադրաբար, Հյուսիսային Կորեայի 11-րդ հրթիռային փորձարկումն էր այս տարի և տեղի է ունեցել ԱՄՆ-ի և Հարավային Կորեայի նախատեսված համատեղ ռազմական զորավարժություններից ընդամենը մի քանի օր առաջ։