Playboy ամսագրի հիմնադիր Հյու Հեֆները 2005 թվականին բազմիցս դիմել է ՀԴԲ-ին՝ հաղորդելով Ջեֆրի Էփշտեյնի կողմից գործադրված սեռական բռնության մասին այն բանից հետո, երբ նախկին Playmate-ը պատմել է նրան, որ դարձել է բռնաբարության և մարդկանց թրաֆիքինգի զոհ։ Նոր մանրամասները ներառված են Էփշտեյնի 32 ենթադրյալ զոհերի՝ ԱՄՆ կառավարության դեմ ներկայացված հայցում, գրում է New York Post-ը։
Դիմողներից մեկը Աուդրա Լին Քրիստիանսենն է, որը դարձել էր 2003 թվականի հոկտեմբերի Playmate-ը։ Հայցի համաձայն, 23 տարեկանում, բնակվելով Բևերլի Հիլզի Playboy առանձնատանը, նա Հեֆներին պատմել է Էփշտեյնի կողմից ենթադրյալ բռնության մասին և խնդրել նրան դիմել իրավապահ մարմիններին։
Հայցում պնդվում է, որ «Հեֆները Քրիստիանսենի անունից բազմիցս զանգահարել է ՀԴԲ՝ Ջեֆրի Էփշտեյնի մասին տեղեկացնելու համար»։
Քրիստիանսենը նաև հայտարարել է, որ իրեն փոխանցել են Հեֆների հարուստ ընկերներից մեկին՝ Մակաոյից միլիարդատեր Սթենլի Հոյին, որին նյութերում անվանում են Ասիայի խաղային բիզնեսի խոշորագույն գործիչներից մեկը։ Հոն մահացել է 2020 թվականին։
Քրիստիանսենի վկայությամբ, Էփշտեյնի հետ իրեն ծանոթացրել են գործակալները՝ Playboy-ում իր ֆոտոշարքի հրապարակումից հետո։ Նա ՀԴԲ-ին պատմել է, որ ֆինանսիստը ցանկացել է հանդիպել իրեն համարի լույսընծայումից հետո։
Միևնույն ժամանակ, ըստ հայցի, ՀԴԲ-ն Քրիստիանսենի հետ կապ է հաստատել միայն 2020 թվականի հոկտեմբերին՝ Հեֆների դիմումից 15 տարի անց և արդեն Էփշտեյնի մահից հետո։
Հայցը լրացվել է 2026 թվականի մայիսին։ Դրա հեղինակները ՀԴԲ-ին մեղադրում են նրանում, որ գերատեսչությունը չի արձագանքել Էփշտեյնի սեռական հանցագործությունների վերաբերյալ բազմաթիվ հաղորդումներին, որոնք ստացվել էին դեռևս 1996 թվականից։
Հայցվորների փաստաբան Ջորդան Մերսոնը հայտարարել է, որ ՀԴԲ-ի փորձերը՝ հայցը մերժել ընթացակարգային հիմքերով, լուրջ հարցեր են առաջացնում այն մասին, թե ինչպես է գերատեսչությունը մտադիր դասեր քաղել սեփական սխալներից, եթե չի ընդունում թույլ տված բացթողումները։
Հունիսին ՀԴԲ-ն փորձել է հասնել գործի կարճմանը՝ հայտարարելով, որ գերատեսչությունը պարտավոր չէ քննել յուրաքանչյուր ստացվող դիմում։ Գործը շարունակում է մնալ դատարանի քննության ներքո։ ՀԴԲ-ն հրապարակայնորեն չի հայտնել, թե ինչ գործողություններ են ձեռնարկվել Հեֆների դիմումներից հետո։