ԱՄՆ ֆինանսների նախարար Սքոթ Բեսենթը հայտարարել է, որ Միացյալ Նահանգները Իրանի դեմ կսահմանի «պատմության մեջ ամենախիստ պատժամիջոցները»։ Նրա խոսքով՝ դա, հավանաբար, թույլ կտա նվազեցնել նոր լայնածավալ ռազմական գործողությունների անհրաժեշտությունը։
Բեսենթի մեկնաբանությունները հնչել են ԱՄՆ նախագահ Դոնալդ Թրամփի՝ մեկ օր առաջ արած հայտարարությունից հետո, որում նա սպառնացել էր «տնտեսական պատերազմով» և զգուշացրել լուրջ տնտեսական հետևանքների մասին ցանկացած երկրի համար, որը Իրանին կտրամադրի «ցանկացած աջակցություն, որը թույլ կտա նրան գոյատևել»։ Բեսենթը խոստացել է նոր միջոցների մանրամասները բացահայտել հաջորդ շաբաթ։
Հինգշաբթի նավթի գները բարձրացել են ավելի քան երեք շաբաթվա առավելագույն մակարդակին՝ այն բանից հետո, երբ ԱՄՆ-ը սպառնացել է ֆինանսական պատժամիջոցներ սահմանել՝ նպատակ ունենալով վերջ դնել պատերազմին։
«Ես այնքան էլ չեմ հասկանում, թե ինչու նավթի գները բարձրացան հենց դրա պատճառով»,- CNBC-ին տված հարցազրույցում ասել է Բեսենթը։ «Եթե մենք կիրառում ենք առավելագույն տնտեսական ճնշում, ապա դա, հավանաբար, նշանակում է, որ ռազմական գործողությունների լայնածավալ վերսկսում չի լինի»,- հավելել է նա։
Բեսենթի ելույթից առաջ Իրանի արտաքին գործերի նախարարությունը հայտարարել էր, որ դատապարտում է ԱՄՆ-ի կողմից սահմանված տնտեսական և առևտրային պատժամիջոցները՝ դրանք անվանելով «տնտեսական ահաբեկչություն»։ Իրանի արտաքին քաղաքական գերատեսչության խոսքով՝ այս միջոցները «ոչ մի փոքր տատանում չեն առաջացնի» իրանցիների վճռականության մեջ՝ պաշտպանելու Իրանի անկախությունը, արժանապատվությունն ու ազգային ինքնիշխանությունը։
Բեսենթը CNBC-ին ասել է, որ երկուշաբթի մամուլի ասուլիսում կներկայացնի նոր պատժամիջոցների փաթեթի լրացուցիչ մանրամասները և «կասի, թե կոնկրետ ինչ ենք պատրաստվում անել» Իրանի նկատմամբ։
«Սա երկակի հարված է։ Մենք ունենք [Իրանի] շրջափակում, և կունենանք պատմության մեջ ամենախիստ պատժամիջոցները»,- ասել է նա։ «Սա կաշխատի, և մենք կկործանենք այդ ռեժիմը։ Ժամանակն է, որ մեր դաշնակիցներն ու աշխարհի մնացած մասը որոշում կայացնեն»,- հավելել է Բեսենթը։
Հարցին, թե արդյոք ԱՄՆ-ը կարող է միջոցներ ձեռնարկել Չինաստանի դեմ Իրանի հետ բիզնես վարելու համար, Բեսենթը պատասխանել է, որ նման շատ խոսակցություններ ավելի լավ է վարել փակ ռեժիմով։ «Հաշվի առեք, որ Չինաստանը իր էներգիայի 50%-ը ստանում է… Պարսից ծոցի երկրներից։ Ուստի նրանց համար շատ օգտակար կլիներ միանալ ծրագրին»,- ասել է նա։
Վաշինգտոնում Չինաստանի դեսպանատունը հայտարարել է, որ «պատժամիջոցներն ու ճնշումը չեն օգնում լուծել խնդիրը»։ «Չինաստանը կոչ է անում համապատասխան կողմերին գործել պատասխանատու կերպով և հարցը լուծել քաղաքական ու դիվանագիտական միջոցներով»,- հայտարարել է դեսպանատան ներկայացուցիչը։