Սաարբրյուքենի համալսարանի հետազոտողները ուսումնասիրել են, թե արդյոք ինտելեկտը կարող է ազդել մարդու՝ որևէ կոնկրետ ոլորտում խոր գիտելիքներ ձեռք բերելու ունակության վրա, նույնիսկ այն դեպքում, երբ ուսումը չի բերում գնահատականներ, աշխատավարձ կամ կարիերային առավելություններ։
Այդպիսի ոլորտ նրանք ընտրել են գինին՝ խաղողի տեսակների, տարածաշրջանների, արտադրության տեխնոլոգիաների և խմիչքի ոճերի մասին գիտելիքները։
Հետազոտության արդյունքները հրապարակվել են Intelligence & Cognitive Abilities ամսագրում։
Հետազոտությանը մասնակցել է 525 մարդ։ Սկզբում նրանք անցել են ինտելեկտի ստանդարտացված ICAR թեստ, որը գնահատում է, մասնավորապես, վերբալ և տրամաբանական մտածողությունը, ինչպես նաև թվային և տառային հաջորդականություններում օրինաչափություններ բացահայտելու կարողությունը։ Այնուհետև մասնակիցները պատասխանել են գինու մասին 68 հարցի, որոնք կազմվել էին միջազգային Wine & Spirit Education Trust (WSET) որակավորման ծրագրի հիման վրա։
Արդյունքները ցույց են տվել, որ ինտելեկտի ցուցանիշները վիճակագրորեն բացատրում էին մասնակիցների՝ գինու մասին գիտելիքների մակարդակի տարբերությունների մի փոքր ավելի քան 9%-ը։ Հետազոտողների խոսքով՝ սա վկայում է այն մասին, որ ճանաչողական ունակությունները մարդուն օգնում են ոչ միայն հաջողությամբ սովորել դպրոցում կամ աշխատել, այլև ինքնուրույն յուրացնել բարդ մասնագիտացված գիտելիքներ։
Միևնույն ժամանակ առավել նկատելի ազդեցությունը գրանցվել է այն մարդկանց մոտ, որոնք մասնագիտորեն աշխատում են գինու հետ։ Գիտնականների կարծիքով՝ պատճառը առարկայի հետ կանոնավոր շփումն է, գինիները դասակարգելու և հետադարձ կապ ստանալու հնարավորությունը։ Այս դեպքում ինտելեկտն ու կառուցվածքային գործնական փորձը փոխադարձաբար ուժեղացնում են միմյանց ազդեցությունը։
Իսկ գինու նկատմամբ պարզապես հետաքրքրությունն ու խմիչքի հաճախակի օգտագործումը բավարար չեն եղել։ Սիրահարները, որոնք գինին նախընտրում էին այլ խմիչքներից, իսկապես միջինում դրա մասին ավելի շատ գիտեին, սակայն ինքնին խմված կամ համտեսված գինու քանակը չէր ուժեղացնում ինտելեկտի և գիտելիքների մակարդակի միջև կապը։
Հետազոտող Մաքսիմիլիան Կրոլոն կարծում է, որ առանցքային դերը խաղում է հենց ուսուցման կառուցվածքը՝ կրկնությունը, համակարգումը և հետադարձ կապը։ Այդ պատճառով սովորական համտեսները կարող են շատ ավելի արդյունավետ լինել, եթե մասնակիցներին պարզապես մի քանի գինի փորձելու հնարավորություն տալու փոխարեն բացատրում են դրանց առանձնահատկությունները, առաջարկում են համեմատել խմիչքները և ճշգրտում են եզրակացությունները։
Աշխատանքի հեղինակները կարծում են, որ արդյունքները կիրառելի են ոչ միայն գինեգործության ոլորտում։ Դրանք վկայում են այն մասին, որ բարձր ինտելեկտը կարող է հեշտացնել խորը մասնագիտացված գիտելիքների ձևավորումը նույնիսկ այն ոլորտներում, որտեղ մարդուն ոչ ոք չի ստիպում սովորել և ստացված գիտելիքների համար չի պարգևատրում։