Ֆինլանդիայի նախագահ Ալեքսանդր Ստուբը հայտարարել է, որ հավանական չի համարում Ռուսաստանի հարձակումը ՆԱՏՕ-ի վրա՝ չնայած ՌԴ-ի հետ ավելի քան 1300 կմ երկարությամբ ընդհանուր սահմանին։ Bild-ին տված հարցազրույցում նա եվրոպական երկրներին կոչ է արել հանգիստ արձագանքել Մոսկվայի հիբրիդային հարձակումներին և չտրվել վախ սերմանելու փորձերին։
Մեկնաբանելով Գերմանիայի պաշտպանության նախարարության և Բունդեսվերի ներկայացուցիչների նախազգուշացումները, թե Ռուսաստանը կարող է պատրաստ լինել ՆԱՏՕ-ի տարածքի վրա հարձակման մինչև 2029 թվականը, Ստուբն ասել է. «Եթե ինչ-որ մեկն ունի այդպիսի բյուրեղյա գունդ՝ հրաշալի է։ Բայց ես պարզապես դրա ոչ ապացույցներ եմ տեսնում, ոչ էլ փաստեր»։
«Ես չեմ հավատում, որ Ռուսաստանը երբևէ կցանկանա հարձակվել աշխարհի ամենահզոր ռազմական դաշինքի՝ ՆԱՏՕ-ի վրա», — ասել է Ֆինլանդիայի նախագահը։ Միաժամանակ նա ընդգծել է, որ դա չի նշանակում, թե պետք է թուլանալ. «Միշտ պետք է պատրաստվել վատագույնին, որպեսզի այն կանխվի»։
Ըստ Ստուբի, ՆԱՏՕ-ն ունի ավելի ուժեղ զսպման ներուժ, քան աշխարհի ցանկացած այլ ռազմական ուժ։ «Մենք ունենք սովորական զինված ուժեր, հրթիռներ և միջուկային զենք։ Աշխարհում ոչ մի պետության համար իմաստ չունի փորձարկել այս դաշինքի վճռականությունը», — հայտարարել է նա։
Ֆինլանդիայի նախագահը նաև կարծում է, որ հակամարտության հետագա սրման Ռուսաստանի հնարավորությունները սահմանափակ են։ «Այս պահին Ռուսաստանի էսկալացիայի հնարավորությունները բավականին սահմանափակ են։ Միակ բանը, որով Ռուսաստանը դեռ կարող է սրել իրավիճակը, մոբիլիզացիան է», — ասել է Ստուբը։
Նրա կարծիքով, նոր մոբիլիզացիան կարող է լուրջ ներհասարակական քաղաքական հետևանքներ ունենալ ռուսաստանյան իշխանությունների համար։ Ստուբը այն հավանական է համարում արդեն այս աշնանը՝ մատնանշելով Ռուսաստանի նոր օրենքները, որոնք, ըստ նրա, ուղղված են սահմանների փակմանը և քաղաքացիների տեղաշարժի ազատության սահմանափակմանը։
Ֆինլանդիայի նախագահը հայտարարել է, որ ռուսաստանյան բանակն, իր ունեցած տվյալների համաձայն, ամսական կորցնում է 30-ից 35 հազար զինծառայող, մինչդեռ հավաքագրում է մոտ 27 հազար։ «Այսպիսով, նրանց մոտ զինվորների թիվը գնալով պակասում է՝ ավելի ու ավելի բարդ իրավիճակի պայմաններում», — ասել է նա։
Այս պայմաններում Ստուբը Ռուսաստանի հարձակումը ևս մեկ երկրի վրա չափազանց քիչ հավանական է համարում։ «Որ հիմա նրանք հանկարծ կկարողանան ուժեր մոբիլիզացնել երկու ճակատի համար՝ ես պարզապես դա չեմ տեսնում», — հայտարարել է Ֆինլանդիայի նախագահը։
Միևնույն ժամանակ Ստուբը չի ակնկալում, որ տնտեսական խնդիրները կստիպեն Վլադիմիր Պուտինին դադարեցնել հակամարտությունը։ «Ես չեմ կարծում, որ Ռուսաստանը կդադարեցնի այս պատերազմը տնտեսական անկման պատճառով», — ասել է նա՝ ընդգծելով, որ «երբեք պետք չէ թերագնահատել, թե որքան տնտեսական դժվարություններ են ռուսաստանցիներն ի վիճակի տանել»։
Ստուբի կարծիքով, ոչ գնաճը, ոչ բանկային ճգնաժամը, ոչ բարձր տոկոսադրույքները, ոչ էլ ռուսաստանյան բանակի զգալի կորուստները ինքնին չեն կանգնեցնի պատերազմը։ Բեկումնային պահ կարող է գալ, եթե Ռուսաստանի ղեկավարությունը սպառնալիք զգա հենց ռեժիմի համար։
«Ռուսաստանը համբերատար է, Ռուսաստանը ունակ է երկար դիմանալ դժվարություններին։ Այդ պատճառով Ռուսաստանը պետք է գա այն եզրակացության, որ այս պատերազմի շարունակությունն այլևս ռեժիմին որևէ առավելություն չի տալիս», — կարծում է Ֆինլանդիայի նախագահը։
Բոլորովին այլ կերպ է Ստուբը գնահատում Ուկրաինայի դրությունը։ «Այսօր Ուկրաինան այս պատերազմի ողջ ընթացքում երբևէ եղածից ավելի ուժեղ և ավելի լավ դիրքում է՝ ռազմական, քաղաքական և ֆինանսական առումներով», — հայտարարել է նա։
«Ուկրաինան առավելություն է ստանում և կհաղթի այս պատերազմում», — ասել է Ֆինլանդիայի նախագահը։ Ըստ նրա, Ուկրաինայի հաղթանակ պետք է համարել անկախության և ինքնիշխանության պահպանումը. «Եթե դու ողջ ես մնացել, եթե մնում ես անկախ, եթե մնում ես ինքնիշխան պետություն՝ դա հաղթանակ է»։
Ստուբը Ուկրաինային աջակցությունը անվանել է ներդրում հենց Եվրոպայի անվտանգության մեջ։ «Մենք պետք է հասկանանք՝ և դուք Գերմանիայում, և մենք Ֆինլանդիայում, — որ Ուկրաինան անվտանգության լավագույն երաշխիքն է, որ մենք ունենք Ռուսաստանի հարցում։ Եթե Ուկրաինան պարտվի, մենք էլ կպարտվենք», — հայտարարել է նա։
Ֆինլանդիայի նախագահը նաև դրական է գնահատել ԿՀՎ տնօրեն Ջոն Ռեթքլիֆի վերջերս Մոսկվա կատարած գաղտնի այցը։ «Կարծում եմ՝ դա լավ է։ Իսկապես։ Ես կարծում եմ, որ երկխոսությունը պետք է շարունակվի», — ասել է Ստուբը։
Նա նշել է, որ ամերիկացիներն ու ռուսները պետք է պահպանեն կապերը «տարբեր ձևաչափերով»՝ հույս հայտնելով, որ երկխոսությունը շարունակվում է նաև երկու երկրների զինվորականների միջև։
Ստուբը նաև եվրոպական պետություններին կոչ է արել վերսկսել քաղաքական շփումները Մոսկվայի հետ։ «Կարծում եմ, որ Եվրոպայում ինչ-որ մեկը պետք է նորից սկսի երկխոսությունը Ռուսաստանի հետ՝ հասկանալու համար, թե այնտեղ ինչ է կատարվում։ Մենք պետք է միմյանց հետ խոսենք քաղաքական մակարդակով», — հայտարարել է նա։
Նրա կարծիքով, շփումների երկարատև բացակայությունը կարող է հանգեցնել վտանգավոր մոլորությունների։ «Ռուսաստանի վերաբերյալ այս ներկայիս լռության առնչությամբ իմ գլխավոր մտահոգությունն այն է, որ այնտեղ պատրանքներ են առաջանում Եվրոպայում տեղի ունեցողի մասին», — ասել է Ֆինլանդիայի նախագահը։
Մեկնաբանելով հնարավոր ռուսաստանյան հիբրիդային հարձակումները, այդ թվում՝ անօդաչու սարքերի հետ կապված միջադեպերը, Ստուբը կոչ է արել «սառը գլխով» վերաբերվել դրան։
Նրա կարծիքով, Գերմանիան և եվրոպական մյուս երկրները պետք է ուղիղ ասեն Մոսկվային, որ իրենց հայտնի են նման հարձակումների կազմակերպիչները, և միաժամանակ համապատասխան ազդակներ փոխանցելու համար օգտագործեն դիվանագիտական ալիքները։