2026թ․ սեպտեմբերի 11-ին Երևանում տեղի ունեցավ Innovate Armenia-ի կողմից կազմակերպված «Շրջակա միջավայրի ազդեցությունը մարդու առողջության վրա» խորագրով համաժողովը։
Միջոցառումը համախմբել էր շրջակա միջավայրի պահպանության և առողջապահության ոլորտների մասնագետների՝ ընդգծելով շրջակա միջավայրի և մարդու առողջության միջև անմիջական կապը։
Միջոցառմանը ներկա էին ՀՀ շրջակա միջավայրի և առողջապահության նախարարությունների, քաղաքացիական հասարակության ներկայացուցիչներ։
Համաժողովի ընթացքում բանախոսները ներկայացրեցին իրենց մասնագիտական փորձն ու դիտարկումները՝ անդրադառնալով օդի և ջրի որակին, շրջակա միջավայրի գործոններով պայմանավորված առողջապահական ռիսկերին, հանրային և թվային առողջությանը, վերականգնվող էներգիային և մարդու բարեկեցության վրա դրանց ազդեցությանը։
Համաժողովին բանախոսություններով հանդես եկան Vickino-ի հիմնադիր և գործադիր տնօրեն, Հայաստանի թվային առողջապահության ասոցիացիայի (AADH) նախագահ դոկտոր Վիկեն Օհաննեսյանը, Շրջակա միջավայրի նախարարի նախկին տեղակալ, շրջակա միջավայրի փորձագետ Գայանե Գաբրիելյանը, Ավստրիայի շրջակա միջավայրի գործակալության «Մակերևութային ջրեր» փորձագիտական թիմի ղեկավարի տեղակալ Ֆիլիպ Հոհենբլումը, Volta-ի հիմնադիր և գործադիր տնօրեն, Ucar Motors-ի հիմնադիր Նորայր Դումոյանը, թերապևտ, սրտաբան, բժշկական գիտությունների դոկտոր (MD) Լամարա Մանուկյանը և կենսաբազմազանության, շրջակա միջավայրի քաղաքականության և կառավարման փորձագետ Ալլա Ալեքսանյանը։
Վերջինս ներկայացրեց «Կենսաբազմազանություն և առողջություն» թեման՝ ընդգծելով, որ այն, որպես միջոլորտային խնդիր, գլոբալ մակարդակում գնալով ավելի մեծ կարևորություն է ձեռք բերում և միաժամանակ պահանջում է առավել մեծ ուշադրություն ու կոնկրետ գործողություններ ազգային մակարդակում։
Սեպտեմբեր 14, 2026 at 11:51