Իրանի իշխանությունները Յազդ նահանգում ձերբակալել են մի տղամարդու, որը պնդում է, որ ինքը Հիսուս Քրիստոսն է․ գրում է Fars գործակալությունը՝ հղում անելով դատախազությանը։
Յազդի գլխավոր դատախազը նշել է, որ հետախուզական գործողությունների արդյունքում հայտնաբերվել և վերացվել է «քրիստոնեական աղանդի հետ կապված ցանց»։
Դատախազի խոսքով՝ կասկածյալը պնդել է, որ իրեն ընտրել է Աստված, ապա ասել է, որ ինքը Հիսուս Քրիստոսն է։
Նշվում է, որ աղանդավորական ցանցը ստեղծել է «տնային եկեղեցի» և զգալի թվով ընտանիքի անդամների ու ծանոթների է ներգրավել։ Դատախազությունը ցանցը բնութագրել է որպես «սիոնիստական քրիստոնեական» աղանդ՝ նշելով, որ այն կապեր ունի արտերկրում գտնվող և Իսրայելի հետ կապված քրիստոնյա երկու միսիոներների հետ։
Ըստ դատախազության՝ աղանդի որոշ հետևորդներ պատռել և այրել են Ղուրանը, անարգել կրոնական սրբավայրերը, ինչպես նաև աղոթել Իսրայելի ռազմական հաղթանակի համար։