Եթե Թեհրանը ընդունի Վաշինգտոնի շրջանակային առաջարկը, կողմերին սպասվում են 30-օրյա բանակցություններ մանրամասն համաձայնագրի շուրջ, իսկ ամերիկյան կողմի պահանջների թվում են Իրանի հիմնական միջուկային օբյեկտների ապամոնտաժումը և Իսլամական Հանրապետությունում ուրանի հարստացման 20-ամյա մորատորիումը, գրում է The Wall Street Journal-ը։
«ԱՄՆ-ը ձգտում է Իրանում ուրանի հարստացման 20-ամյա մորատորիումի և պահանջում է բոլոր հարստացված միջուկային նյութերի փոխանցումը», – հայտնում է պարբերականը՝ հղում անելով բարձրաստիճան պաշտոնյաներին։
Բացի այդ, հրապարակման համաձայն, ԱՄՆ-ի պահանջների թվում են՝ «Իրանից հաստատում, որ այն չի ձգտում միջուկային զենք ունենալուն, Ֆորդո, Նաթանզ և Իսֆահան օբյեկտների ապամոնտաժում», որոնց վրա 2025 թվականի հունիսին ամերիկացիները հարվածներ են հասցրել։
ԱՄՆ-ը նաև ցանկանում է հասնել ստորգետնյա միջուկային աշխատանքների արգելքին և պահանջով անցկացվող տեսչություններին՝ խախտումների համար պատժամիջոցներով։
Նախկինում Bloomberg-ը հաղորդել էր, որ Վաշինգտոնի և Թեհրանի միջև ներկայացված փոխըմբռնման հուշագիրը վերաբերում է Հորմուզի նեղուցի փուլային բացմանը և Իրանի նավահանգիստների վրա ամերիկյան շրջափակման վերացմանը, մինչդեռ իրանական միջուկային ծրագրի շուրջ բանակցությունները նախատեսվում է վարել ավելի ուշ։ Ըստ գործակալության աղբյուրի՝ «մինչ այժմ ոչինչ համաձայնեցված չէ»։ Սպասվում է, որ Իրանը ԱՄՆ-ի առաջարկի վերաբերյալ իր պատասխանը կփոխանցի պակիստանցի միջնորդների միջոցով երկու օրվա ընթացքում։