ԵՐԵՎԱՆ, 7 մայիսի․/ԱՌԿԱ/․ Փոխվարչապետ Տիգրան Խաչատրյանն այսօր ընդունել է Եվրոպական ներդումային բանկի (ԵՆԲ) փոխնախագահ Կարլ Նեհամմերի գլխավորած պատվիրակությանը:
Հանդիպմանը մասնակցում էր նաև Տարածքային կառավարման և ենթակառուցվածքների նախարար Դավիթ Խուդաթյանը, հաղորդում է ՀՀ կառավարության մամուլի ծառայությունը։
Ողջունելով հյուրերին՝ փոխվարչապետը բարձր է գնահատել ԵՆԲ-ի հետ ձևավորված արդյունավետ համագործակցությունը և շնորհակալություն հայտնել Բանկին՝ ՀՀ կառավարության բարեփոխումների օրակարգին համահունչ ծրագրերի իրականացման ուղղությամբ շարունակական աջակցության համար։
Հանդիպման ընթացքում կողմերն անդրադարձ են կատարել երկկողմ համագործակցությանն առնչվող հարցերի լայն շրջանակի, այդ թվում՝ ճանապարհաշինության, ենթակառուցվածքների զարգացման, էներգետիկայի, ջրային ոլորտի և այլ ուղղությունների:
Կողմերը վերահաստատել են իրենց պատրաստակամությունը շարունակելու արդյունավետ համագործակցությունը՝ ուղղված ընթացիկ ծրագրերի իրականացմանը և համագործակցության շրջանակի հետագա ընդլայնմանը։
ՀՀ–ում ԵՆԲ–ի մսին
ԵՆԲ-ն Հայաստանի հետ համագործակցում է 2010 թվականից՝ երկրում գործելով Եվրոպական հարևանության քաղաքականության Արևելյան գործընկերության ծրագրին և ԵՄ-ի հետ այլ երկկողմ համաձայնագրերին համապատասխան։ Բանկը ֆինանսավորել է մի շարք ծրագրեր՝ ենթակառուցվածքներից և փոքր բիզնեսից մինչև ջրամատակարարման և կեղտաջրերի մաքրման ծառայություններ։
ԵՆԲ-ն նաև ֆինանսավորում է անդրսահմանային հաղորդակցությունների շինարարությունը՝ ճանապարհների անվտանգության և կայունության բարձրացման համար։