Արաբական Միացյալ Էմիրություններին հաջողվել է իր մի քանի նավթային լցանավերն անցկացնել Հորմուզի նեղուցով՝ հենց Իրանի քթի տակով։ Դրա մասին հայտնում է Reuters-ը՝ վկայակոչելով փորձագետներին և նավագնացության տվյալները:
Ըստ Kpler և SynMax ընկերությունների տվյալների՝ Աբու Դաբիի ազգային նավթային ընկերությանը հաջողվել է ապրիլին առնվազն 6 միլիոն բարել հում նավթ արտահանել չորս լցանավերի միջոցով, որոնք նավարկում են Պարսից ծոցում:
Reuters-ի երեք աղբյուրներ հայտնել են, որ լցանավերը կարող էին կա՛մ իրենց բեռը վերաբեռնել դեպի Հարավարևելյան Ասիա ուղևորվող այլ նավերի վրա, կա՛մ խարիսխ գցել Օմանում, կա՛մ ուղղակիորեն մեկնել Հարավային Կորեայի նավթավերամշակման գործարաններ:
Այս չորս նավերի ճանապարհորդությունը ցույց է տալիս, թե արտադրողներն ու գնորդները ինչպիսի ռիսկերի են պատրաստ գնալ նավթի վաճառքն ավելացնելու համար՝ չնայած Իրանի սպառնալիքներին՝ հարձակվել ցանկացած նավի վրա, որը կհամարձակվի առանց իր թույլտվության հատել Հորմուզի նեղուցը, ընդգծում է գործակալությունը: