Իրանի հետախուզության նախարարությունը հայտարարել է «Մոսադի» հետ կապ ունեցող երկու ահաբեկչական խմբավորումների վնասազերծման մասին։ Գործողությունն իրականացվել է Արևմտյան Ադրբեջան, Քերման և Ալբորզ նահանգներում, հայտնում է Mehr գործակալությունը։
Նախարարության փոխանցմամբ՝ գործողության ընթացքում սպանվել է մեկ գործակալ, առգրավվել է մեծ քանակությամբ զենք, անօդաչու թռչող սարքեր և Starlink համակարգի սարքավորումներ։
Եվս մեկ ձերբակալություն էլ իրականացվել է հյուսիսային սահմանին։ Անձը կասկածվում է ռազմական տվյալների լրտեսությամբ զբաղվելու մեջ։
Կիրակի օրը հրապարակված հայտարարության համաձայն՝ խմբավորումը ծրագրել էր «ահաբեկչական գործողություններ իրականացնել կարևորագույն կենտրոնների դեմ», ինչպես նաև մահափորձի կոնկրետ սցենար էր նախապատրաստել Թեհրանում։
Գործակալներից մեկը սպանվել է անվտանգության ուժերի հետ փոխհրաձգության ժամանակ, իսկ խմբի մյուս անդամները վնասազերծվել ու ձերբակալվել են։
Քերման և Ալբորզ նահանգներում իրականացված հետախուզական գործողությունները թույլ են տվել բացահայտել նաև երկրորդ օպերատիվ խմբին։ Պաշտոնական հայտարարության համաձայն՝ ուժայինները հետևել են խմբավորման տեղաշարժին և վնասազերծել անդամներին՝ նախքան նրանց կողմից որևէ թշնամական գործողության իրականացումը։