ԿԳՄՍ նախարարի տեղակալի նախկին օգնական Սյուզաննա Բլբուլյանը միաժամանակ ներգրավված է պետական երկու կառույցներում, զբաղեցնում է երկու պատասխանատու պաշտոններ, ինչը հանրային կասկածներ է հարուցում։
Այսպես․ Սյուզաննա Բլբուլյանը միաժամանակ ներկայացված է և՛ Երևանի պետական համալսարանում որպես կենսաքիմիայի, մանրէաբանության և կենսատեխնոլոգիայի ամբիոնի ասիստենտ, և՛ ԿԳՄՍՆ Բարձրագույն կրթության և գիտության կոմիտեում որպես նախագահի օգնական։
Այսինքն՝ նա միաժամանակ աշխատում է միևնույն ոլորտի երկու հիմնարկներում։ Ուշագրավ է, որ նա ԿԳՄՍ նախարարի տեղակալի օգնական է նշանակվել 2021-ին: Նույն թվից սկսել է աշխատել ԵՊՀ-ում, հիշյալ պաշտոնում։ ԿԳՄՍՆ Բարձրագույն կրթության և գիտության կոմիտեի նախագահի օգնական սկսել է աշխատել 2023-ից։ Նույն թվականից ազատվել է ԿԳՄՍ նախարարի տեղակալի օգնականի պաշտոնից։ Այս համընկնումները ևս կասկածների տեղիք են տալիս։
Ստացվում է՝ նույն անձը միաժամանակ ներգրավված է և՛ բարձրագույն կրթական հաստատության գիտակրթական աշխատանքներում, և՛ ԿԳՄՍՆ բարձրագույն կրթական քաղաքականություն մշակող իրականացնող օղակում։
Գուցե այս համատեղությունն օրենսդրությամբ արգելված չէ, սակայն առաջացնում է մի շարք հարցեր. որքանո՞վ են հստակ տարանջատված նրա գործառույթները երկու հիմնարկներում, արդյոք կա՞ ժամանակի և ռեսուրսների իրական բաժանում, և արդյոք բոլոր ֆինանսական հոսքերը թափանցիկ են հանրության համար։
Օրինակ՝ կարո՞ղ է նա, որպես ԿԳՄՍՆ Բարձրագույն կրթության և գիտության կոմիտեի նախագահի օգնական, նպաստել, որ ԵՊՀ հիշյալ ամբիոնը շատ ծրագրեր իրականացնի ու շատ փող ստանա։ ԵՊՀ գնումների և պայմանագրերի տվյալներում Սյուզաննա Բլբուլյանի անունը հանդիպում է մի քանի տարբեր տողերում՝ կապված ծառայությունների և ներգրավվածությունների հետ։ Սա ևս առաջ է բերում հարցեր՝ արդյոք այդ ներգրավվածությունները դասախոսական աշխատա՞նք են, թե՞ առանձին վճարովի պայմանագրեր, արդյոք դրանք կապ ունեն նրա մյուս պաշտոնի հետ, և արդյոք բացառվա՞ծ է շահերի բախման հնարավորությունը։
Օրենքը թույլ է տալիս պետական աշխատողներին միաժամանակ զբաղվել գիտակրթական գործունեությամբ, երբ չկա շահերի բախում։ Այս դեպքում խնդրահարույց է ոչ թե անձի զբաղվածությունը, այլ՝ միաժամանակ բուհերի կառավարման քաղաքականություն իրականացնող կառույցում աշխատելը և ամենամեծ բուհում ներգրավված լինելը։
Սյուզաննա Բլբուլյանի օրինակը ցույց է տալիս մի երևույթ՝ քաղաքականություն մշակողի և ակադեմիական ոլորտի փոխկապակցվածությունը, երբ նույն անձինք միաժամանակ զբաղեցնում են մի քանի պաշտոններ նույն ոլորտի տարբեր կառույցներում։ Այսպիսի փոխկապակցվածությունը ռիսկային չէ՞։
Հասմիկ Մովսիսյան