Ռուսաստանի քննչական կոմիտեի տվյալներով՝ «Արբատ» գումարտակի հիմնադիր Արմեն Սարգսյանի սպանությանը մասնակցել են ուկրաինական հատուկ ծառայությունների՝ Անվտանգության ծառայության և Պաշտպանության նախարարության հետախուզության գլխավոր վարչության դեռևս չպարզված աշխատակիցներ։ Այս մասին հայտնում է «ՌԻԱ Նովոստի» գործակալությունը։
Քննությունը կարծում է, որ Մոսկվայում ահաբեկչություն իրականացնելու ծրագիրը մշակվել է ոչ ուշ, քան 2024 թվականի մարտին։ Որպես թիրախ ընտրվել է Սարգսյանը, որը հայտնի էր 2014-ի փետրվարին Ուկրաինայում տեղի ունեցած իրադարձությունների քննադատությամբ։ Սարգսյանն այդ գործողությունները որակել է որպես պետական հեղաշրջում։
Հանցագործությունն իրագործելու համար ստեղծվել է խումբ, որի կազմում ընդգրկված են եղել Վարաժ Մանուկյանն ու Պարույր Մաթևոսյանը։ Խմբի անդամները հետևել են հասարակական գործչին, ֆիքսել նրա ամենօրյա երթուղիներն ու թիկնազորի քանակը, ինչպես նաև տեսանկարահանումներ իրականացրել։ Մանուկյանը պատասխանատու է եղել ինքնաշեն պայթուցիկ սարքի տեղափոխման և պահման համար։ Պայթուցիկ սարքի հիմքում եղել է МОН-50 տեսակի ականը։
Դեպքը տեղի է ունեցել 2025 թվականի փետրվարի 3-ի առավոտյան՝ Ավիացիոն փողոցում գտնվող «Ալիյե պարուսա» բնակելի համալիրում։ Վերելակների սրահում տեղադրված պայթուցիկ սարքը գործարկվել է հեռակառավարմամբ։ Պայթյունի հետևանքով հենց ինքը՝ Մաթևոսյանը, և Արմեն Սարգսյանը տեղում մահացել են։ Եվս երկու հոգի ստացել են կյանքի համար վտանգ ներկայացնող ծանր վնասվածքներ։
Սկզբնական շրջանում հաղորդվել է մեկ զոհի և չորս ծանր վիրավորի մասին, որոնցից մեկն ավելի ուշ մահացել էր հիվանդանոցում։ Պարզվել է, որ նա Արմեն Սարգսյանն է։ Քննարկվել է նաև մահապարտ-ահաբեկչի վարկածը։ Դեպքի առթիվ հարուցվել է քրեական գործ՝ հանցագործության նախապատրաստման և փորձի, սպանության, ինչպես նաև պայթուցիկ նյութերի ապօրինի շրջանառության հոդվածներով։