Ճապոնիայում ձերբակալվել է ԱՄՆ 2 քաղաքացի՝ կենդանաբանական այգու կապիկների վանդակ մտնելու համար, որտեղ գտնվում է համացանցային աստղ դարձած Փանչ անունով փոքրիկ կապիկը․ գրում է Euronews-ը՝ հղում անելով ոստիկանությանը։
Տղամարդկանցից մեկը, որը ներկայացել էր որպես 24-ամյա ուսանող, կիրակի ձերբակալվել է Տոկիոյի մերձակայքում գտնվող Իչիկավա քաղաքի կենդանաբանական այգում կապիկներին շրջապատող ցանկապատի վրայով անցնելուց հետո:
Մյուս տղամարդը, որը նկարահանել է գործողությունը, ներկայացել է որպես 27-ամյա երգիչ։
Սոցցանցերում տարածված նկարներում երևում է՝ ինչպես է մի մարդ բարձրանում ցանկապատի վրայով․ նա կրում է հատուկ կոստյում, որը ներառում է արևային ակնոցով ժպտացող դեմք հիշեցնող դիմակ։ Տղամարդուն տեսնելով՝ կապիկները ցրվել են։
Ձերբակալությունները տեղի են ունեցել կենդանաբանական այգի այցելող թե՛ տեղացի, թե՛ արտասահմանյան զբոսաշրջիկների կտրուկ աճի ֆոնին, որը պայմանավորված է Փանչի համաշխարհային հայտնիությամբ։
Փոքրիկ կապիկն այս տարի դարձել էր համացանցի աստղ այն բանից հետո, երբ սոցցանցերում տարածվեցին լուսանկարներ, որտեղ նա, մոր կողմից մերժվելուց հետո, գրկել էր իր փափուկ խաղալիք օրանգուտանին։