«Մեր ժողովուրդը ոչ մի ձևով, ոչ մեկից չպետք է վախենա, որովհետև այս ընտրությունները մեր երկրի, մեր պետության ճակատագրի մասին են։ Քվեախցիկում քաղաքացին ամենազորն է, որովհետև հենց այդ պահին ամբողջ իշխանությունն իր ձեռքում է», – լրագրողների հետ զրույցում ասաց «Միասնության թևեր» կուսակցության առաջնորդ, ՀՀ նախկին ՄԻՊ Արման Թաթոյանը։
Նրա խոսքով՝ քաղաքացիները պետք է ընտրեն ոչ թե վախի, այլ հույսի և հավատի հիման վրա։
«Այդ պահին, երբ քաղաքացին քվեատուփի մեջ գցում է ծրարը, իրականացնում է իր իշխանությունը։ Իսկ նրանք, ովքեր զբաղվում են ընտրակաշառքով կամ փորձում են վախեցնել մարդկանց, իրականում գողանում են քաղաքացիների ընտրությունը», – նշեց Թաթոյանը։
Անդրադառնալով տարբեր սոցիոլոգիական հարցումների արդյունքներին՝ մասնավորապես ամերիկյան հետազոտական ինստիտուտի հրապարակած տվյալներին, ըստ որոնց ընդդիմադիր ուժերը բարձր վարկանիշներ չեն ստացել, Թաթոյանը կտրուկ քննադատեց այդ ուսումնասիրությունները։
«Դա միանշանակ նիկոլական հարցում է։ Ինձ համար այդ հարցումները որևէ վստահություն չեն ներշնչում։ Սա հատուկ պրոիշխանական հարցում է և որևէ կերպ չի արտահայտում մեր հասարակության ցանկությունները», – ասաց նա։
Թաթոյանի խոսքով՝ տարակուսելի է նաև այն, որ, իր տեղեկություններով, նախորդ ամիսներին նախատեսված որոշ հարցումների արդյունքները չեն հրապարակվել։
«Եթե այդ հարցումները վստահելի են, ապա ինչո՞ւ նախկինում նախատեսված արդյունքները չեն հրապարակվել։ Սա արդեն հարցեր է առաջացնում», – նշեց նա։
Խոսելով «Միասնության թևեր» կուսակցության ընտրական հնարավորությունների մասին՝ Թաթոյանը վստահեցրեց, որ իրենց քաղաքական ուժը հաղթահարում է անցողիկ շեմը։
«Մեր շփումները քաղաքացիների հետ, տարբեր հետազոտություններն ու մեր ունեցած տվյալները ցույց են տալիս, որ այս պահին մենք հաղթահարում ենք շեմը։ Մեզ համար հիմա ամենակարևորը քաղաքացիների հնարավորինս մեծ վստահությունն ստանալն է», – ասաց նա։
Անդրադառնալով գործարար Սամվել Կարապետյանի հայտարարությանը, որտեղ հիշատակվել էր իրենց քաղաքական ուժը, Թաթոյանը նշեց, որ զարմացել է այդ արձագանքից։
«Ինձ համար զարմանալի էր այդ հայտարարությունը։ Հարց է առաջանում՝ ինչո՞ւ պետք է ընդդիմադիր դաշտում նման հայտարարություն արվի հատկապես այն քաղաքական ուժի մասին, որը, մեր գնահատմամբ, արդեն հաղթահարում է անցողիկ շեմը։ Ես միշտ ասել եմ՝ որքան շատ իրական ընդդիմադիր ուժեր անցնեն խորհրդարան, այնքան լավ կլինի պետության համար»,– ընդգծեց նա։
Մանրամասները՝ տեսանյութում։