Իսրայելի բանակը (ՑԱՀԱԼ) հայտնել է հարավային Լիբանանում ռազմավարական լեռնային դիրքի գրավման մասին, որի գագաթին գտնվում է Բոֆորի ամրոցը՝ խաչակիրների միջնադարյան բերդը Նաբաթիա քաղաքի մերձակայքում։
ՑԱՀԱԼ-ի տվյալներով, գործողությունը դարձել է մի քանի օր տևած ինտենսիվ մարտերի և հարակից բնակավայրերում ավիահարվածների արդյունքը, որտեղ իսրայելական ստորաբաժանումները լեռնային տեղանքում բախվում էին «Հեզբոլլահի» մարտիկների հետ։
Զինվորականները առաջխաղացումն անվանել են վերջին ավելի քան 25 տարիների ընթացքում Լիբանանի տարածք ամենախոր ներթափանցումներից մեկը։ Նշվում է, որ Բոֆորի ամրոցը նախկինում արդեն անցել էր Իսրայելի վերահսկողության տակ 1982 թվականին և մնացել էր նրա վերահսկողության ներքո մինչև 2000 թվականին զորքերի դուրսբերումը։
Իսրայելի պաշտպանության նախարար Իսրայել Կացը հայտնել է, որ իսրայելական ուժերը երկրի դրոշը բարձրացրել են ամրոցի վրա։ Բանակը հայտարարում է, որ գործողությունն ուղղված է «Հեզբոլլահի» ենթակառուցվածքների ոչնչացմանը և իսրայելցի քաղաքացիների համար սպառնալիքի վերացմանը։
Ռազմական հրամանատարության տվյալներով, հարձակումը սկսվել է մի քանի օր առաջ Բոֆորի լեռնաշղթայի և Սուլուկի հովտի շրջանում։ Իսրայելի բանակը հայտարարել է անհրաժեշտության դեպքում գործողությունն ընդլայնելու պատրաստակամության մասին։
Հաղորդվում է նաև, որ իսրայելական ուժերը հատել են Լիտանի գետը, որը նախկինում փաստացի ծառայում էր որպես պայմանական սահմանազատման գիծ, և առաջ են շարժվել դեպի հարավային Լիբանանի խորքը։ Նաբաթիայի շրջակայքը և Տյուրոս քաղաքը ներառյալ մի շարք շրջանների բնակիչներին տարհանվելու կոչեր են ուղարկվել։
Հարձակման ֆոնին «Հեզբոլլահը» հայտարարում է սահմանամերձ շրջաններում իսրայելական ուժերի և զրահամեքենաների վրա հարձակումների մասին, այդ թվում՝ անօդաչու թռչող սարքերի կիրառմամբ։ Իսրայելում նշում են դժվար հայտնաբերվող դրոնների կողմից սպառնալիքի աճը։
Իսրայելի և «Հեզբոլլահի» միջև հակամարտությունը կտրուկ սրվել է մարտի սկզբին և ուղեկցվում է փոխադարձ հարվածներով, ցամաքային գործողություններով և երկու կողմերի զգալի կորուստներով։
Հաղորդագրություններում բերված տվյալների համաձայն, Լիբանանում զոհվել է ավելի քան 3 հազար մարդ, իսկ ավելի քան մեկ միլիոնը ստիպված է եղել լքել իր տունը։