Որպես շարքային քաղաքացի՝ Գեղամ Օհանյանը հայտարարել է անժամկետ, շուրջօրյա նստացույցի մեկնարկի մասին՝ ի աջակցություն կալանավորված Արթուր Օսիպյանի։ Օհանյանի խոսքով՝ դեպքերի սկիզբը կապված է մայիսի 18-ին տեղի ունեցած միջադեպի հետ, երբ Նիկոլ Փաշինյանի նախընտրական քարոզարշավի ընթացքում Արթուր Օսիպյանը հարցեր է ուղղել վարչապետին։
Նրա պնդմամբ՝ զրույցի ընթացքում հնչել է հանրային լայն արձագանք ստացած «ինչո՞ւ չէիր զոհվել» արտահայտությունը, որից հետո Օսիպյանը չի հասցրել պատասխանել, քանի որ տեղում ձերբակալվել է։
«Ավելի ուշ տեղեկացանք, որ նրան երկու ամսով կալանավորել են խուլիգանության հոդվածով։ Այնուհետև նշվեց, որ իր ֆեյսբուքյան էջում գրել էր՝ «ասեք՝ որտեղ է, գնամ բմբուլները քամուն տամ»։ Այդ արտահայտությունը փոխաբերական իմաստ ունի և վերաբերում է բանավեճի միջոցով մրցելուն, ոչ թե ֆիզիկական գործողությանը»,- ասաց Օհանյանը։
Նա պնդեց, որ Օսիպյանի և Փաշինյանի միջև սկսված բանավեճը չի ավարտվել, քանի որ վերջինս ձերբակալվել է, իսկ հետագայում հայտնվել կալանքի տակ։
Օհանյանի խոսքով՝ Օսիպյանը հենց ձերբակալության օրվանից հացադուլ է հայտարարել, և արդեն 14 օր է՝ շարունակում է այն։
«Փաստորեն, միակ գործիքը, որ մնացել էր իր խոսքն արտահայտելու համար, հացադուլն էր։ Այսօր արդեն 14-րդ օրն է, որ Օսիպյանը հացադուլի մեջ է, և մենք սկսում ենք շուրջօրյա նստացույց, որովհետև քաղաքացու կյանքն արդեն վտանգի տակ է»,- լրագրողների հետ զրույցում ասաց նստացույցի կազմակերպիչ Գեղամ Օհանյանը։