Եվրոպական ֆոնդային ինդեքսները երեքշաբթի օրվա սակարկություններն ավարտել են դրական գնահատականով

Եվրոպական բորսաներում երեքշաբթի օրն ամփոփվել է ցուցանիշների աճով։ Շուկայի ուշադրության կենտրոնում է մնում Մերձավոր Արևելքի իրավիճակը. ներդրողները վերլուծում են ԱՄՆ-Իրան բանակցությունների ընթացքի վերաբերյալ հակասական հայտարարություններն ու Լիբանանում Իսրայելի գործողությունների մասին լուրերը։

Իրանական լրատվամիջոցները երեքշաբթի հայտնել են, որ Թեհրանն ուսումնասիրում է պատերազմի դադարեցման վերաբերյալ ԱՄՆ-ի առաջարկած համաձայնագիրը, թեև վերջին մի քանի օրերին Վաշինգտոնի հետ կապ չի հաստատել։ Նախօրեին տեղեկություններ էին տարածվել, թե Իրանը որոշել է կասեցնել բոլոր շփումները Միացյալ Նահանգների հետ և բողոքել Լիբանանում Իսրայելի ռազմական գործողությունների ակտիվացման դեմ։ Սակայն ավելի ուշ ԱՄՆ նախագահ Դոնալդ Թրամփը Truth Social սոցիալական հարթակում գրել է, որ Իրանի հետ բանակցություններն ընթանում են բարձր տեմպերով։ Նա նաև հավելել է, որ Իսրայելի և լիբանանյան շիական «Հեզբոլլահ» շարժման միջև հրադադար է հաստատվել։

Տարածաշրջանի խոշորագույն ընկերությունների համախառն Stoxx Europe 600 ինդեքսը երեքշաբթի շուկայի փակման պահին բարձրացել է 0,66%-ով՝ հասնելով 625,34 կետի։

Բրիտանական FTSE 100-ը ավելացել է 0,33%-ով, գերմանական DAX-ը՝ 0,48%-ով, ֆրանսիական CAC 40-ը՝ 0,77%-ով, իտալական FTSE MIB-ը՝ 1,61%-ով, իսպանական IBEX 35-ը՝ 0,48%-ով։

Մերձավոր Արևելքում լարվածությունը նպաստում է նավթի բարձր գների պահպանմանը և գնաճային սպասումների աճին։

Երեքշաբթի հրապարակված վիճակագրական տվյալների համաձայն՝ եվրոգոտում մայիսին գրանցվել է գնաճի տեմպերի արագացում։ Տարեկան կտրվածքով ցուցանիշը ապրիլյան 3%-ից հասել է 3,2%-ի՝ 2023 թվականի սեպտեմբերից ի վեր գրանցելով ամենաբարձր մակարդակը։ Սա տեղի է ունեցել հիմնականում էներգակիրների գների աճի ֆոնին (+10,9%): Բազային գնաճը (որը հաշվի չի առնում սննդամթերքի և էներգակիրների տատանվող գները) նույնպես արագացել է՝ 2,2%-ից հասնելով 2,5%-ի, ինչը մասնավորապես պայմանավորված է ծառայությունների ոլորտում գների աճի տեմպերի ավելացմամբ (3%-ից մինչև 3,5%)։

Ներդրողները կարծում են, որ հունիսյան նիստում Եվրոպական կենտրոնական բանկը (ԵԿԲ) գնաճի այս արագացմանը կարձագանքի հիմնական տոկոսադրույքների բարձրացմամբ։ Ինչպես նշում է Trading Economics-ը, շուկան 95% հավանականությամբ կանխատեսում է, որ հունիսի 11-ին կարգավորող մարմինը դրույքաչափերը կբարձրացնի 25 բազիսային կետով։ Ընդհանուր առմամբ, թրեյդերներն այս տարի եվրոգոտում տոկոսադրույքների երկու կամ երեք կետով բարձրացում են ակնկալում։

Stoxx Europe 600 ինդեքսի կազմում աճի տեմպերով առաջատար են դարձել STMicroelectronics-ի բաժնետոմսերը (+15,1%)։ Դա տեղի է ունեցել այն բանից հետո, երբ ընկերությունը կրկնապատկել է տվյալների մշակման կենտրոններից (դատա-կենտրոններից) 2026 թվականի համար նախատեսվող հասույթի կանխատեսումը։

Առաջատարների թվում են եղել նաև Infineon Technologies-ի (+9,5%), Prosus-ի (+9,4%), Nokia Corp.-ի (+6,8%) արժեթղթերը։

Զգալիորեն թանկացել են նաև շքեղ ապրանքների որոշ արտադրողների բաժնետոմսերը՝ Kering՝ 3,8%-ով, LVMH՝ 1,1%-ով, Brunello Cucinelli՝ 0,8%-ով։

UniCredit-ի արժեթղթերի արժեքն աճել է 1,6%-ով։ Commerzbank-ի բաժնետոմսերի գնման նրա առաջարկն արդեն ընդունել են գերմանական բանկի արժեթղթերի 7,58%-ի սեփականատերերը, ասվում է UniCredit-ի հաղորդագրության մեջ։ Իտալական վարկային կազմակերպությունն ուղղակիորեն տիրապետում է Commerzbank-ի 26,77%-ին։ Այսպիսով, առաջարկի հաշվառմամբ նրա մասնաբաժինը կկազմի առնվազն 34,35%։

Commerzbank-ի կապիտալիզացիան երեքշաբթի աճել է 0,5%-ով։

Համախառն ինդեքսում առևտրի արդյունքներով անկման առաջատարների թվում են եղել Renk Group-ի (-4,5%), Dassault Systemes-ի (-4,1%), Hemnet Group-ի (-4,1%), Hensoldt-ի (-3,9%) բաժնետոմսերը։

Ֆրանսիական կենսադեղագործական Abivax ընկերության արժեթղթերի գինը անկում է գրանցել 43,6%-ով (նրա դեղամիջոցներից մեկի կլինիկական հետազոտությունների անբարենպաստ արդյունքների պատճառով)։