Շաբաթ օրը Նյու Դելիի կենտրոնում այսպես կոչված «Ուտիճների կուսակցության» հարյուրավոր կողմնակիցներ հավաքվել են շարժման առաջին մասշտաբային ակցիային։ Ընդամենը մի քանի շաբաթվա ընթացքում այս նախաձեռնությունը համացանցային կատակից վերածվել է Հնդկաստանում երիտասարդների դժգոհության տեսանելի խորհրդանիշի, հայտնում է «Associated Press» գործակալությունը։
«Ջանտար-Մանտար» հրապարակում անցկացված հանրահավաքը շարժման համար առաջին լուրջ փորձությունն է եղել սոցիալական ցանցերից դուրս։ Կազմակերպիչները փորձել են պարզել, թե արդյո՞ք առցանց տիրույթի հսկայական լսարանն ունակ է վերածվել իրական քաղաքական ուժի։
Ակցիային մասնակցել են հիմնականում երիտասարդներ, որոնց ձեռքերին եղել են պաստառներ և ուտիճների դիմակներ։ Որոշ մասնակիցներ էլ իրենց հետ բերել եմ ազգային դրոշներ ու գրքեր՝ որպես կրթության իրավունքի և հավասար հնարավորությունների խորհրդանիշ։
Շարժումն առաջացել է Հնդկաստանի Գերագույն դատարանի նախագահ Սուրյա Կանտի սկանդալային հայտարարությունից հետո, ով դատական նիստերից մեկի ժամանակ քննադատներին և գործազուրկ երիտասարդության մի մասին համեմատել էր ուտիճների հետ։
Այս խոսքերը դժգոհության մեծ ալիք են բարձևացևել, իսկ Բոստոնի համալսարանի ուսանող, քաղաքական հաղորդակցության մասնագետ Աբհիջիտ Դիպկեն այդ վիրավորանքը վերածել է սատիրիկ քաղաքական արշավի հիմքի։
Նրա ստեղծած «Ուտիճների կուսակցությունը» կայծակնային արագությամբ հանրաճանաչություն է ձեռք բերել համացանցում։ Ընդամենը մի քանի շաբաթվա ընթացքում շարժման էջերը միլիոնավոր բաժանորդներ են հավաքել, իսկ ուտիճը դարձել է տոկունության և բողոքի խորհրդանիշ։
Շարժման կողմնակիցները հրապարակում են մեմեր, տեսանյութեր և երգիծական մեկնաբանություններ՝ նվիրված գործազրկությանը, կոռուպցիային, կրթական ճգնաժամին և ավանդական քաղաքականությունից հիասթափությանը։
Շաբաթ օրվա ակցիայի անմիջական առիթը եղել է կրթության նախարար Դհարմենդրա Պրադհանի հրաժարականի պահանջը՝ քննությունների անցկացման ժամանակ թույլ տրված խախտումների և սկանդալի ֆոնին։
Այնուամենայնիվ, բողոքի ակցիան արագորեն դուրս է եկել մեկ խնդրի շրջանակից և վերածվել հնդիկ երիտասարդների ավելի լայն դժգոհության արտահայտման (կապված սահմանափակ կարիերայի հնարավորությունների և տնտեսական դժվարությունների հետ)։
Հանրահավաքի մասնակիցները վանկարկել են. «Ուտիճները գալիս են, Դհարմենդրա Պրադհանը՝ հեռանում», և իշխանություններին կոչ են արել ուշադրություն դարձնել երիտասարդության խնդիրներին։