Իսպանիայում օրերս սաստիկ շոգեր են սպասվում. առաջիկայում երկրի մեծ մասում ջերմաստիճանը կտրուկ կբարձրանա, իսկ հարավային շրջաններում օդը կտաքանա մինչև 38–40 աստիճան։ Այս մասին գրում է Euronews-ը։
Հանգստյան օրերին Իսպանիայի գրեթե ողջ տարածքում պարզ ու արևոտ եղանակ կլինի։ Կարճատև ու թույլ անձրևներ հնարավոր են միայն հյուսիսային շրջաններում՝ Գալիսիայում և Կանտաբրիայի ափերին, իսկ Պիրենեյներում օրվա երկրորդ կեսին տեղ-տեղ սպասվում է ամպրոպ։
Առաջիկա օրերին շոգն ավելի կսաստկանա. քաղաքների մեծ մասում ջերմաստիճանը կանցնի 30-ը։ Էբրո, Տախո, Գվադիանա և Գվադալկիվիր գետերի հովիտներում սպասվում է նվազագույնը 32 աստիճան, իսկ հարավի ամենատաք վայրերում՝ 34-ից բարձր աստիճան Ցելսիուս։
Շոգն իր գագաթնակետին կհասնի կիրակի օրը։ Կենտրոնական և հարավային նահանգներում օդի ջերմաստիճանը կլինի մոտ 34, իսկ Սևիլյայում ու Կորդովայում՝ մինչև 36 աստիճան։ Հյուսիսում նույնպես նախորդ օրերի համեմատ զգալիորեն կտաքանա։
Հաջորդ շաբաթ եղանակային կտրուկ փոփոխություններ չեն սպասվում. երկրում կպահպանվի չոր ու շոգ եղանակը։ Մադրիդում ցերեկը կլինի 33–34 աստիճան, իսկ գիշերը օդի ջերմաստիճանը չի իջնի 17-ից։ Գվադիանա և Գվադալկիվիր գետերի հովիտների ամենատաք կետերում սպասվում է նույնիսկ 38–40 աստիճան տաքություն։
Միջերկրական ծովի ափամերձ շրջաններում ծովային հոսանքների շնորհիվ շոգն այդքան ուժգին չի լինի. Բարսելոնայում, օրինակ, ցերեկային ժամերին սպասվում է 25–27, իսկ գիշերը՝ մոտ 20 աստիճան։
Կանարյան կղզիներում կպահպանվեն ուժեղ պասատային քամիները, որոնց պոռթկումները կանցնեն 80 կմ/ժ-ը։ Կղզիների հյուսիսային լանջերին հնարավոր է ամպամածություն ու թույլ արևային անձրև, մինչդեռ հարավային հատվածներում կլինի արևոտ ու տաք եղանակ։
Օդերևութաբանների փոխանցմամբ՝ ներկայիս տապը հաջորդում է Իսպանիայի պատմության մեջ ամենաշոգ մայիսին, որն աչքի է ընկել բարձր ջերմաստիճանի հետևանքով մահացության դեպքերի աճով և ափամերձ ջրերի անոմալ տաքացմամբ։