ԱՄՆ նախագահ Դոնալդ Թրամփը հայտարարել է, որ իրանական լրատվամիջոցներում հայտնված տեղեկությունները Միացյալ Նահանգների և Իրանի միջև հնարավոր համաձայնագրի պայմանների վերաբերյալ բացարձակապես չեն համապատասխանում իրականությանը և որևէ ընդհանուր բան չունեն կողմերի միջև գրավոր ձևով համաձայնեցված կետերի հետ։
Ամերիկյան առաջնորդը դժգոհություն է հայտնել պաշտոնական Թեհրանի գործելաոճից՝ շեշտելով, որ «Իրանի հետ անհնար է բարեխիղճ բանակցություններ վարել»։
Ի՞նչ էին տարածել իրանական լրատվամիջոցները
Ավելի վաղ իրանական պետական «Mehr» լրատվական գործակալությունը, հղում անելով սեփական աղբյուրներին, հրապարակել էր Վաշինգտոնի և Թեհրանի միջև ենթադրյալ գործարքի նախագիծը։ Ըստ իրանական կողմի պնդումների՝ փաստաթուղթը, իբր, նախատեսում էր.
-
Իրանական նավթի նկատմամբ սահմանված ամերիկյան պատժամիջոցների չեղարկում,
-
ԱՄՆ-ում և արտերկրում արգելափակված իրանական ֆինանսական ակտիվների մի մասի ապասառեցում,
-
Տարածաշրջանային անվտանգության համատեքստում՝ ռազմավարական կարևորություն ունեցող Հորմուզի նեղուցի լիարժեք բացում (որով անցնում է համաշխարհային նավթի մատակարարումների զգալի մասը)։