ԱՄՆ-ի Վաշինգտոն նահանգում ռազմական ինքնաթիռ է կործանվել, ինչի հետևանքով անտառային հրդեհ է բռնկվել, իսկ Ռիմրոք լճի շրջանից տարհանվել են հանգստացողները, հաղորդում է Fox 13-ը։
Միջադեպը տեղի է ունեցել հունիսի 13-ի ցերեկը Յակիմա շրջանում։ Նաչես քաղաքի հրշեջ ծառայության տվյալներով, օդաչուն հասցրել է կատապուլտվել մինչև ինքնաթիռի անկումը և տեղափոխվել է մոտակա հիվանդանոց՝ զննման և բժշկական օգնություն ստանալու համար։
Ինքնաթիռը ընկել է անտառապատ տարածքում՝ Ռիմրոք լճից ոչ հեռու, որը գտնվում է Մաունթ Ռեյնիեր ազգային պարկի և Յակիմա քաղաքի միջև գրեթե մեջտեղում։ Կործանման հետևանքով անտառային հրդեհ է բռնկվել։
Հրշեջ ստորաբաժանումները արագ ժամանել են դեպքի վայր և իրենց ջանքերը կենտրոնացրել մոտակայքում գտնվող շինությունները կրակի տարածումից պաշտպանելու վրա։ Կեսօրից հետո ժամը չորսին նրանք կարողացել են ավարտել «Բեար Քրիք» քոթեջային համալիրի պաշտպանության աշխատանքները։
Հրդեհաշիջման աշխատանքներին ներգրավվել են ինչպես ցամաքային ուժեր, այնպես էլ ավիացիա։ Գործողությանը մասնակցել են նաև Օկանոգան-Ուենատչի ազգային անտառի աշխատակիցները։ Հրշեջ ծառայության ներկայացուցիչների վկայությամբ, հրդեհի հետևանքների վերացման և կրկնակի բռնկումը կանխելու աշխատանքները կշարունակվեն նաև հաջորդ օրը։
Արտակարգ իրավիճակի պատճառով փրկարար ծառայությունները Ռիմրոք լճի շրջանից տարհանել են հանգստացողներին։ Բացի այդ, փակվել են լճի հարավային կողմի ճանապարհները։
Այս պահին իշխանությունները դեռ չեն հայտնել հրդեհի տարածքի և այրված տարածքի չափի վերաբերյալ պաշտոնական տվյալներ։ Առայժմ չի հրապարակվում նաև կործանված ռազմական ինքնաթիռի տեսակը։ Վթարի պատճառները պարզվում են։