ԱՄՆ պաշտպանության նախարար Փիթ Հեգսեթը հայտարարել է, որ Պենտագոնը երեք ամիս առաջ դադարեցրել է համագործակցությունը Anthropic ընկերության հետ և նրան դուրս է բերել իր շենքից՝ հավելելով, որ այդ որոշումը մնում է ուժի մեջ։
«Երեք ամիս առաջ ԱՄՆ պաշտպանության նախարարությունը Anthropic-ը վտարեց իր շենքից՝ ընդմիշտ։ Ամեն նոր օր ապացուցում է, որ դա ճիշտ որոշում էր», – գրել է նա X սոցիալական ցանցում։
Համագործակցության դադարեցման պաշտոնական մանրամասները չեն բացահայտվում։
Ավելի վաղ Anthropic-ը հայտնվել էր ամերիկյան կարգավորող մարմինների հետ առանձին հակամարտության կենտրոնում այն բանից հետո, երբ ընկերությունը ժամանակավորապես անջատել էր հասանելիությունը իր արհեստական բանականության նոր՝ Fable 5 և Mythos 5 մոդելներին։
NBC News-ի տվյալներով, ընկերությունը ստիպված էր կասեցնել մոդելների աշխատանքը ԱՄՆ կառավարության կարգադրությունը ստանալուց հետո, որը կապված էր ազգային անվտանգության հարցերի հետ։ ԱՄՆ առևտրի նախարարության կողմից ուղարկված փաստաթուղթը պահանջում էր սահմանափակել համակարգերի հասանելիությունը բոլոր օտարերկրյա քաղաքացիների համար, ներառյալ նրանց, ովքեր գտնվում են ԱՄՆ տարածքում, ինչպես նաև հենց ընկերության օտարերկրյա աշխատակիցների համար։
Արդյունքում Anthropic-ը անջատել է մոդելները բոլոր օգտատերերի համար՝ հայտարարելով, որ դա կարգավորողների պահանջները կատարելու միակ միջոցն է։ Ընկերությունում ընդգծել են, որ խոսքը վերաբերում է հնարավոր խոցելիության, որը, իշխանությունների գնահատմամբ, կարող էր թույլ տալ շրջանցել պաշտպանական մեխանիզմները։
Միևնույն ժամանակ Anthropic-ը չի համաձայնվել կառավարության դիրքորոշման հետ՝ հայտարարելով, որ շրջանցման սահմանափակ հնարավոր եղանակը չպետք է հանգեցնի առևտրային հասանելիություն ունեցող մոդելի հետկանչին, որից օգտվում են հարյուր միլիոնավոր մարդիկ։
Ընկերությունը նաև հայտնել է, որ խնդրի վերաբերյալ ստացել է միայն բանավոր ծանուցումներ և ենթադրել, որ նմանատիպ խոցելիություններ կարող են գոյություն ունենալ նաև արհեստական բանականության այլ մշակողների մոտ։ Anthropic-ում հույս են հայտնել որոշման վերանայման և մոդելների հասանելիության հնարավոր վերականգնման վերաբերյալ։