Գերմանիայի թվային տեխնոլոգիաների նախարար Կարստեն Վիլդբերգերը հայտնվել է քննադատության կենտրոնում այն հաղորդումներից հետո, թե պաշտոնական տեքստեր և ելույթներ պատրաստելիս նա, թերևս, օգտագործել է արհեստական բանականության գործիքներ։ Ինչպես հայտնում է գերմանական dpa պարբերականը, հանրային դաշտ է դուրս եկել տեղեկություն այն մասին, որ նախարարի մի շարք ելույթներ և նյութեր ստեղծվել են ԱԲ-ի աջակցությամբ։
Գերմանական գործակալության հոդվածում նշվում է, որ նախարարությունում հաստատել են ԱԲ-ի օգտագործումը որպես աշխատանքային գործիք։ Գերատեսչության ներկայացուցիչը հայտարարել է, որ Վիլդբերգերը կիրառում է արհեստական բանականության տեխնոլոգիաներ տեքստեր պատրաստելու համար՝ դա դիտարկելով որպես պետական կառավարման մեջ թվային գործիքների գործնական յուրացման մաս։
«Նախարար Վիլդբերգերն օգտագործում է ԱԲ-ն որպես օժանդակ միջոց, քանի որ կարևոր է համարում, որ Գերմանիան ավելի արագ սովորի արդյունավետ և կշռադատված կերպով աշխատել արհեստական բանականության հետ», — գերատեսչության դիրքորոշումն է փոխանցում պարբերականը։
Հաղորդվում է, որ խոսքը վերաբերում է տեքստերի սևագրերի խմբագրմանն ու պատրաստմանը, ներառյալ ելույթներն ու հոդվածները, ընդ որում վերջնական տարբերակները ստուգվում և հաստատվում են նախարարության մակարդակով։
Այս տեղեկությունը գերմանական մեդիայում քննարկում է առաջացրել պետական հաղորդակցության մեջ գեներատիվ ԱԲ-ի օգտագործման թույլատրելի սահմանների և պաշտոնական նյութերում դրա կիրառման դեպքում թափանցիկության անհրաժեշտության մասին։