Վաշինգտոնի և Թեհրանի միջև փոխըմբռնման հուշագրի նախագիծը նախատեսում է, որ Իրանը կհաստատի իր հանձնառությունը Միջուկային զենքի չտարածման մասին պայմանագրին (ՄԶՉՊ), հայտնում է Mehr գործակալությունը։
Գործակալության տվյալներով՝ նախագիծը ներառում է բանակցությունների 60-օրյա շրջան՝ միջուկային խնդրի վերաբերյալ վերջնական համաձայնության հասնելու և ԱՄՆ-ի առաջնային ու երկրորդային պատժամիջոցների, ՄԱԿ-ի Անվտանգության խորհրդի բանաձևերի և ԱՏԷՄԳ-ի Կառավարիչների խորհրդի բանաձևերի ամբողջական վերացման համար։
Հաղորդագրության համաձայն՝ նախագիծը նաև նախատեսում է Իրանի՝ ՄԶՉՊ-ին հանձնառության հաստատում և միջուկային զենք չարտադրելու պարտավորություն։
Փաստաթուղթը նաև նախատեսում է պատերազմի վերջնական և անհապաղ դադարեցում բոլոր ճակատներում, ներառյալ Լիբանանը։ Միևնույն ժամանակ նշվում է, որ բանակցային ժամանակահատվածում ԱՄՆ-ը պարտավորվում է չավելացնել զորքերի թվաքանակը Մերձավոր Արևելքում և չսահմանել նոր պատժամիջոցներ։ Նախագիծը ներառում է ռազմածովային շրջափակման ամբողջական վերացման և Հորմուզի նեղուցի աշխատանքի վերականգնման մասին դրույթներ 30 օրվա ընթացքում, ինչպես նաև Իրանի շուրջ գտնվող շրջաններից զորքերը դուրս բերելու վերաբերյալ ԱՄՆ-ի պարտավորությունները։
Բացի այդ, փաստաթղթում ներառված են ԱՄՆ-ի պարտավորությունները՝ չմիջամտել Իրանի ներքին գործերին և հարգել նրա ինքնիշխանությունը, կասեցնել նրա նավթի և նավթաքիմիական արտադրանքի նկատմամբ սահմանված պատժամիջոցները, ինչպես նաև ապահովել Իրանի լիարժեք հասանելիությունը նրա սառեցված հաշիվներին։
Մասնավորապես, ենթադրվում է, որ վերջնական բանակցությունների 60-օրյա ժամանակահատվածում կապաշրջափակվելու է 24 միլիարդ դոլարի չափով սառեցված իրանական ակտիվ, իսկ այդ գումարի կեսը պետք է տրամադրվի Իրանին մինչև դրանց մեկնարկը։
Փաստաթղթում նշվում է, որ ԱՄՆ-ը և նրա դաշնակիցները պետք է նաև Իրանին տրամադրեն երկրի տնտեսության վերականգնման նախագիծ՝ առնվազն 300 միլիարդ դոլարի չափով։
Իրանի և ԱՄՆ-ի միջև վերջնական համաձայնությունը պետք է հաստատվի ՄԱԿ-ի Անվտանգության խորհրդի բանաձևով, նշում է գործակալությունը՝ հղում անելով փաստաթղթի նախագծին։
Իրանի արտաքին գործերի նախարարի տեղակալ Քազեմ Ղարիբաբադին հայտնել է, որ փոխըմբռնման հուշագրի տեքստը լրամշակվել է, և դրա պաշտոնական ստորագրումը տեղի կունենա ուրբաթ Շվեյցարիայում։
«Շաբաթ օրը Կատարից պատվիրակությունը մեկնեց Թեհրան՝ բանակցություններն ավարտին հասցնելու համար, և ընդհանուր առմամբ տեղի ունեցան ավելի քան 15 ժամ բանակցություններ և խորհրդակցություններ, որոնց արդյունքում Իրանի Իսլամական Հանրապետության ցանկալի փոփոխությունները ներառվեցին տեքստում և ընդունվեցին մյուս կողմի կողմից»,- նշել է նա։
Միևնույն ժամանակ Tasnim գործակալությունը, հղում անելով իրազեկ աղբյուրին, նույնպես բացահայտել է բանակցությունների վերաբերյալ մի շարք մանրամասներ։
«Նախագծի 14-րդ հոդվածի համաձայն՝ ԱՄՆ-ի և Իրանի միջև վերջնական խաղաղության համաձայնագրի շուրջ բանակցությունները կսկսվեն հուշագրի ստորագրումից և ծովային շրջափակման վերացմանը, Հորմուզի նեղուցի բացման գործընթացի մեկնարկին, իրանական ակտիվների մի մասի ազատմանը և նավթի ու նավթաքիմիական արտադրանքի վաճառքի ոլորտում Իրանի նկատմամբ պատժամիջոցների վերացմանը վերաբերող դրույթների կատարման ստուգումից հետո»,- ասվում է գործակալության հաղորդագրության մեջ։