Իրանի հետախուզության նախարարությունը հայտարարել է Իլամ նահանգում «ամերիկա-սիոնիստական հակառակորդի փողոցային դիվերսիոն ցանցի» երեք դաշտային հրամանատարների և 14 «վարձկանների» ինքնությունը պարզելու և ձերբակալելու մասին։ Այս մասին հայտնում է Mehr գործակալությունը։
Գերատեսչության՝ շաբաթ օրը հրապարակած հայտարարության մեջ նշվում է, որ հետախուզության աշխատակիցները հայտնաբերել ու ձերբակալել են անկարգությունների երեք ենթադրյալ կազմակերպիչների և ցանցի ևս 14 անդամների, որոնք, ըստ մեղադրանքի, Իլամ նահանգի տարածքում գործել են ի նպաստ ԱՄՆ-ի և Իսրայելի։
Ընդգծվում է, որ գործողությունն իրականացվել է հետախուզական կառույցների ներգրավմամբ և «քաղաքացիներից ստացված հաղորդումների» հիման վրա։ Հայրենիքի դավաճանության կասկածանքով ընդհանուր առմամբ ձերբակալվել է 17 մարդ։
Նախարարության տվյալներով՝ ձերբակալվածներից առգրավվել է երեք տրոտիլային պայթուցիկ, Կալաշնիկովի տեսակի ինքնաձիգ, նռնակ, ինչպես նաև տարբեր սառը զենքեր, այդ թվում՝ մաչետեներ։