ԱՄՆ նախագահ Դոնալդ Թրամփը դժգոհություն է հայտնել Իրանի հետ պատերազմի վերաբերյալ իր խորհրդականների և դաշնակիցների շրջանում միասնական ռազմավարության բացակայության կապակցությամբ, հայտնում է NBC News-ը՝ վկայակոչելով իրավիճակին ծանոթ աղբյուրներին։
Հեռուստաալիքի տվյալներով՝ ազգային անվտանգության գծով իր թիմի առանցքային ներկայացուցիչների հետ վերջերս անցկացված հանդիպման ժամանակ Թրամփը կտրուկ է արձագանքել քննարկման մասնակիցների միջև տարաձայնություններին և «ափերից դուրս է եկել»՝ օգտագործելով ոչ ցենզուրային արտահայտություններ։
Նախագահի զայրույթի պատճառ են դարձել վեճերն այն թեմայի մասին, թե որը պետք է լինի ռազմական արշավի վերջնական նպատակը։ Վարչակազմում չեն կարողացել միասնական կարծիքի գալ՝ արդյոք խոսքն Իրանի կողմից միջուկային սպառնալիքի կանխմա՞ն, Հորմուզի նեղուցի նկատմամբ վերահսկողությա՞ն, թե՞ հրթիռների և անօդաչու թռչող սարքերի իրանական ծրագրի ոչնչացման մասին է։
Թրամփի դաշնակիցներից մեկը հայտարարել է, որ նախագահը «հիասթափված է» նրանից, թե որքան բարդ է ստացվել Թեհրանի հետ համաձայնության հասնելը։ Ըստ աղբյուրի՝ թիմը նաև հստակ ծրագիր չի ունեցել հակամարտության տևողության և դրա ավարտի ուղու վերաբերյալ։
ԱՄՆ-ի և Իրանի միջև հակամարտությունը սկսվել է փետրվարի 28-ին, երբ ամերիկյան և իսրայելական ուժերը հարվածներ հասցրին Իրանին։ Ի պատասխան՝ Թեհրանը հարձակվեց Մերձավոր Արևելքում ԱՄՆ-ի և նրա դաշնակիցների հետ առնչություն ունեցող թիրախների վրա։
Նոր սրման պայմաններում Թրամփը հայտարարել է, որ ամերիկյան զինվորականները «կոշտ հարված» կհասցնեն Իրանին Հորդանանում ամերիկյան ռազմակայանների վրա հրթիռային հարձակումից հետո։
Ավելի ուշ Պենտագոնը հայտնել է Իրանի տարածքին ամերիկյան հարվածների հերթական փուլի ավարտի մասին։ Ըստ Վաշինգտոնի հայտարարության՝ գործողությունը տևել է մոտ երկու ժամ և ուղղված է եղել տասնյակ թիրախների։ ԱՄՆ-ն այն անվանել է «հզոր պատասխան» տարածաշրջանում ամերիկյան ուժերին Իրանի հրթիռային հարվածներին։
Ընդ որում, ավելի վաղ Թրամփը բազմիցս հայտարարել էր, որ նախընտրում է հակամարտության դիվանագիտական լուծումը և Թեհրանի հետ համաձայնության ձեռքբերումը։ Սակայն շարունակվող ռազմական լարվածության սրումն ուժեղացրել է տարաձայնությունները նրա վարչակազմի ներսում հետագա ուղեգծի վերաբերյալ։