Հունգարիան առաջիկա օրերին կարող է բախվել էներգահամակարգի վրա լուրջ ծանրաբեռնվածության՝ երկրի էլեկտրաէներգիայի խոշորագույն աղբյուրի՝ «Պակշ» ատոմային էլեկտրակայանի գրեթե ամբողջական կանգի պատճառով։
Հունգարիայի վարչապետ Պետեր Մադյարը սոցիալական ցանցերում հրապարակված տեսաուղերձում հայտարարել է, որ երկիրը մտնում է բարձր ռիսկերի շրջան՝ Դանուբում ջրի մակարդակի ռեկորդային ցածր լինելու պատճառով, որի ջուրը օգտագործվում է ԱԷԿ-ի ռեակտորների սառեցման համար։
Կառավարության ղեկավարը նշել է, որ կայանի շրջանում ջրի մակարդակը իջել է մինչև մինուս 133 սանտիմետր։ Եթե ցուցանիշը նվազի ևս մեկ սանտիմետրով, ԱԷԿ-ի վերջին գործող էներգաբլոկը կկանգնեցվի։
Մադյարը զգուշացրել է, որ էներգաբլոկների աշխատանքի դադարեցումից հետո երկրի էներգահամակարգը կհայտնվի լրացուցիչ ծանրաբեռնվածության տակ, հատկապես պահպանվող շոգի և էլեկտրաէներգիայի սպառման աճի պայմաններում։
«Մեզ սպասում են ամենածայրահեղ հինգ օրերը», — հայտարարել է երկրի վարչապետը։
Նա ընդգծել է, որ կայանում իրավիճակը մնում է անվտանգ, իսկ մասնագետներն աշխատում են անհրաժեշտ ծավալի սառեցնող ջրի ապահովման ուղղությամբ։ Ըստ նրա, ջրամատակարարման շուրջ 50 մասնագետ կներգրավվեն՝ րոպեում մոտ 100 խորանարդ մետր ջրի մատակարարումը պահպանելու համար մինչև էլեկտրաէներգիայի արտադրության վերականգնումը։
Վարչապետը կոչ է արել երկրի բնակիչներին հնարավորության դեպքում նվազեցնել էներգահամակարգի ծանրաբեռնվածությունը առավելագույն սպառման ժամերին՝ 17:00-ից մինչև 22:00։
Բացակայող հզորությունները մասամբ փոխհատուցելու համար Հունգարիան արդեն վերսկսել է «Դունամենտի» ջերմաէլեկտրակայանի աշխատանքը։
Բացի այդ, Մադյարը հայտնել է պաշտպանության և էներգետիկ անվտանգության հարցերով աշխատանքային խմբի նիստ անցկացնելու ծրագրերի մասին։ Հանդիպմանը կքննարկվի, թե արդյոք անհրաժեշտ կլինի էլեկտրաէներգիայի խոշոր արդյունաբերական սպառողների համար պարտադիր սահմանափակումներ մտցնել։
Էներգետիկայի ընթացիկ իրավիճակի մասին վարչապետը մտադիր է օգոստոսի 3-ին տեղեկացնել Հունգարիայի ժամանակավոր նախագահ Ագնեշ Ֆորսթհոֆֆերին և խորհրդարանական խմբակցությունների ղեկավարներին։
«Պակշ» ԱԷԿ-ի աշխատանքի հետ կապված խնդիրներն առաջացել են Դանուբում ջրի մակարդակի կտրուկ անկման ֆոնին, ինչը նաև բարդացրել է նավարկությունն ու տարածաշրջանի այլ երկրների էներգետիկ օբյեկտների աշխատանքը։ Ավելի վաղ Ռումինիայի և Սերբիայի իշխանությունները հայտնել էին գետի սակավաջրության պատճառով հիդրոէլեկտրակայանների արտադրության նվազման մասին։ Հունգարիան դարձել է տարածաշրջանի առաջին երկիրը, որտեղ Դանուբի ծայրահեղ ցածր մակարդակը վտանգի տակ է դրել ատոմային գեներացիայի աշխատանքը։