Ճապոնիայի կառավարությունը պահուստային ֆոնդից կհատկացնի 24,2 միլիարդ իեն (մոտ 153 միլիոն ԱՄՆ դոլար) Կումամոտոյի պրեֆեկտուրայում հուլիսի 28-ին տեղի ունեցած հզոր երկրաշարժի հետևանքների վերացման համար։ Որոշման մասին հայտարարել է Ճապոնիայի կաբինետի գլխավոր քարտուղար Մինորու Կիհարան։
«Նախարարների կաբինետը որոշում է ընդունել օգտագործել ընդհանուր առմամբ 24,2 միլիարդ իեն՝ Կումամոտոյի երկրաշարժին արձագանքելու համար»,- ասել է նա։
Միջոցների մեծ մասը կուղղվի տուժած շրջաններում վերականգնողական և վթարային աշխատանքներին, որոնք կներառեն նաև ճանապարհային ենթակառուցվածքներն ու կամուրջները, տուժածներին ժամանակավոր կացարանների տրամադրմանը, ինչպես նաև նյութական օգնությանը՝ տարհանման կենտրոններում սննդի և մահճակալների տեսքով։
Հուլիսի 28-ին տեղի ունեցած 7,1 մագնիտուդով երկրաշարժը դարձավ երկրում վերջին տարիների ամենահզորներից մեկը։ Վերջին տվյալներով՝ զոհվել է 38 մարդ, տասնյակ մարդիկ վիրավորվել են։ Տարբեր շրջաններում գրանցվել են տների ավերածություններ, ճանապարհների և կամուրջների վնասվածքներ։ Երկրաշարժի հետևանքների վերացմանը, բացի փրկարար և պրոֆիլային ծառայություններից, մասնակցում է Ճապոնիայի Ինքնապաշտպանության ուժերի մոտ 4600 զինծառայող։