ԱՄՆ նախագահ Դոնալդ Թրամփը հայտարարել է, որ ամերիկյան զինված ուժերն ունեն «զինամթերքի հսկայական պաշարներ»՝ մերժելով Իրանի դեմ շարունակվող ռազմական գործողության ֆոնին սպառազինության հնարավոր դեֆիցիտի մասին հաղորդումները։
«ԱՄՆ-ն ունի զինամթերքի հսկայական ծավալներ, հատկապես որոշակի տեսակների։ Բացի այդ, մեծ ծավալներ արտադրվում և ըստ անհրաժեշտության մատակարարվում են ԱՄՆ»,- գրել է Թրամփը Truth Social սոցիալական ցանցում։
Նախագահը հայտարարել է նաև, որ իշխանությունները ձգտելու են երկարատև ազատազրկման ժամկետների այն անձանց համար, որոնց նա անվանել է ամերիկյան սպառազինության պաշարների վիճակի մասին տեղեկության արտահոսքի աղբյուրներ։
«Այդ դավաճանական հայտարարությունների հեղինակները որոնվում են։ Նրանց համար երկարատև ազատազրկման ժամկետներ կպահանջվեն»,- հայտարարել է Թրամփը։
Ավելի վաղ ամերիկյան լրատվամիջոցները հայտնել էին որոշ տեսակի սպառազինության պաշարների հնարավոր կրճատման մասին՝ Իրանի հետ մի քանի ամիս տևած ռազմական գործողություններից հետո։
CBS News-ը, հղում անելով աղբյուրներին, հաղորդել էր, որ ԱՄՆ-ը կարող էր օգտագործած լինել հեռահար բարձր ճշգրտության հրթիռների համաշխարհային պաշարների զգալի մասը։ The Washington Post-ը նույնպես գրել էր, որ Թրամփը, իբր, ԱՄՆ պաշտպանության նախարար Փիթ Հեգսեթի հետ քննարկել է սպառազինության հնարավոր պակասը։
Ինչպես հաղորդում է BBC News-ը, ամերիկյան հրթիռների պաշարների ճշգրիտ տվյալները շարունակում են գաղտնի մնալ։ Միաժամանակ, Ռազմավարական և միջազգային հետազոտությունների կենտրոնը (CSIS), հիմնվելով բաց տեղեկատվության վրա, գնահատել էր, որ հուլիսի վերջի դրությամբ ԱՄՆ-ում կարող էր մնացած լինել 759-827 Patriot հրթիռ՝ հակամարտության սկզբին եղած 2330-ի դիմաց։
CSIS-ի գնահատմամբ՝ ԱՄՆ-ն օգտագործել է նաև THAAD հրթիռային համալիրների պաշարների մոտ 60%-ը, որոնք նախատեսված են բալիստիկ հրթիռների որսման համար։
Վաշինգտոնը զինանոցների վրա լրացուցիչ բեռի է բախվում նաև Ուկրաինային աջակցելու պատճառով։ ԱՄՆ-ը Կիևին փոխանցել է, մասնավորապես, Patriot համակարգերի համար նախատեսված հրթիռներ՝ 2022 թվականին ռուսական ռազմական գործողության մեկնարկից հետո։
Ամերիկյան վարչակազմն ավելի վաղ բազմիցս հայտարարել էր, որ սպառազինության պաշարները բավարար են։ Հեգսեթը դեֆիցիտի մասին հաղորդումներն անվանել էր «արհեստականորեն ստեղծված նարատիվ», սակայն միաժամանակ իշխանությունները հայտարարել էին սպառազինության արտադրությունն արագացնելու ծրագրերի մասին։
Հուլիսին Հեգսեթը Սենատից 87 միլիարդ դոլարի չափով արտակարգ ֆինանսավորում էր խնդրել՝ զինծառայողներին վճարումներ կատարելու և «սարքավորումների ու զինամթերքի արագ համալրման» համար։