Եգիպտոսի արտգործնախարար Բադր Աբդել-Ատտին կոչ է արել Գազայից ամբողջովին դուրս բերել Իսրայելի զորքերը և բացել անկլավը՝ հումանիտար օգնության անխափան մատակարարման համար՝ ԱՄՆ նախագահ Դոնալդ Թրամփի խաղաղության ծրագրին համապատասխան, հաղորդում է Al Jazeera-ն։
Ինչպես հայտնել են Եգիպտոսի ԱԳՆ-ից, Աբդել-Ատտին այդ հարցերը հեռախոսազրույցի ընթացքում քննարկել է Թրամփի կողմից ստեղծված Խաղաղության խորհրդի գլխավոր տնօրեն Նիկոլայ Մլադենովի հետ։
Կողմերը նաև քննարկել են Միջազգային կայունացման ուժերի տեղակայման հարցը, որոնք պետք է իրենց վրա վերցնեն Գազայի հատվածում անվտանգության ապահովումը։
Կահիրեի կոչը հնչել է այն բանից հետո, երբ Իսրայելի վարչապետ Բենիամին Նեթանյահուն կիրակի պաշտոնապես մերժել է Գազայի վերաբերյալ 15 կետից բաղկացած խաղաղության ծրագիրը։