ԱՄՆ ռազմավարական նավթային պահուստում (SPR) նավթի պաշարները նվազել են 300 միլիոն բարելից ցածր՝ հասնելով ավելի քան 40 տարվա ընթացքում իրենց ամենացածր մակարդակին։ CNBC-ի հաղորդմամբ՝ SPR-ում նավթի պաշարներն անցյալ շաբաթ նվազել են 6.1 միլիոն բարելով՝ հասնելով 298.7 միլիոն բարելի։
Սա ամենացածր մակարդակն է 1983 թվականի հունվարից ի վեր։
Կառույցի տվյալներով՝ 1975 թվականին ստեղծված ռազմավարական նավթային պահուստի ընդհանուր հզորությունը կազմում է 714 միլիոն բարել։ Նշվում է, որ մարտին ԱՄՆ նախագահ Դոնալդ Թրամփը կարգադրել է պահուստից հանել 172 միլիոն բարել նավթ, այն բանից հետո, երբ Իրանը սահմանափակել է նավթի արտահանումը Հորմուզի նեղուցով։
Այս քայլը տեղի է ունեցել հում նավթի մատակարարման պատմության մեջ ամենամեծ խափանման ֆոնին։ SPR պաշարների նվազումը, ըստ տեղեկությունների, հարցեր է առաջացրել այն մասին, թե արդյոք ԱՄՆ ռազմավարական նավթային պահուստը մոտենում է սպառմանը։
ԱՄՆ Էներգետիկայի նախարարության տվյալներով՝ SPR-ի անվտանգ շահագործման համար անհրաժեշտ նավթի նվազագույն ծավալը մոտավորապես 70 միլիոն բարել է։