Երեքշաբթի գիշերը Զապորոժիեի ուղղությամբ հարվածի ժամանակ ռուս զինվորականները, ի թիվս այլ միջոցների, կիրառել են նաեւ հյուսիսկորեական հրթիռներ, հայտարարել է Ուկրաինայի նախագահ Վլադիմիր Զելենսկին։
«Քաղաքին հարվածել են հյուսիսկորեական բալիստիկ հրթիռներով, «Ցիրկոններով» եւ ԿԱԲ-երով։ Դաժան հարձակում էր, որը ծրագրված էր այնպես, որ առավելագույն վնաս հասցվեր հենց քաղաքացիական ենթակառուցվածքներին»,- գրել է Զելենսկին։
Ինչպես ավելի վաղ հայտնել էին Զապորոժիեի մարզի իշխանությունները, երեքշաբթի գիշերը ռուս զինվորականները համակցված հարված են հասցրել Զապորոժիեին, որի հետեւանքով վեց մարդ զոհվել է, եւս 19-ը՝ վիրավորվել։
Ռուսաստանի պաշտպանության նախարարությունը հայտնել է, որ Զապորոժիեում խոցվել է «Զապորոժստալ» մետալուրգիական կոմբինատը, որը «թերթավոր գլանվածքի առաջատար արտադրող է, որն օգտագործվում է պաշտպանական կառույցների, ամրաշինական մոդուլների, ռազմական տեխնիկայի զրահի եւ զրահաբաճկոնների թիթեղների պատրաստման համար»։