Եվրոպական քաղաքներում կտրուկ աճել են հյուրանոցների գները արևի լրիվ խավարման նախօրեին, որը օգոստոսի 12-ին կդառնա այս դարում Եվրոպայի տարածքից տեսանելի առաջին լրիվ խավարումը, գրում է The Guardian։
Զբոսաշրջիկների ձգողության գլխավոր կենտրոններից մեկը դարձել է Ռեյկյավիկը։ Օգոստոսի 12-ի համար հյուրանոցային համարի միջին արժեքը հասել է 793 դոլարի, ինչը 98%-ով բարձր է, քան մեկ տարի առաջ նույն օրը։ Իսլանդիայի մայրաքաղաքը այն եզակի հասանելի վայրերից է, որտեղ խավարման ամբողջական փուլը հնարավոր կլինի դիտել մինչև երեկոյի վրա հասնելը։
Զբոսաշրջիկների մեծ հոսք է սպասվում նաև Իսպանիայում։ Երկրի ֆինանսների նախարարության գնահատմամբ՝ մոտ 460 հազար օտարերկրյա զբոսաշրջիկ կժամանեն հատուկ խավարումը դիտելու համար։
Լա Կորունյա քաղաքում համարի միջին արժեքը մեկ տարվա ընթացքում աճել է 135%-ով և հասել 451 դոլարի։ Մայորկայում գներն աճել են 24%-ով՝ հասնելով մոտ 448 դոլարի։ Սանտյագո դե Կոմպոստելայում և Բիլբաոյում աճը կազմել է համապատասխանաբար 34% և 67%։
Խավարման ուղեգծի երկայնքով գտնվող փոքր քաղաքներն ու գյուղերը, ինչպես նաև դիտման ժամանակավոր հարթակները ամրագրվել էին մի քանի ամիս առաջ։ Ամերիկացի զբոսաշրջիկներից ոմանք նույնիսկ տների փոխանակում են կազմակերպել Կաստիլիա և Լեոնի բնակիչների հետ՝ Իսպանիայի խավարումը դիտելու լավագույն շրջաններից մեկում։
Միաժամանակ, իսպանական իշխանությունները մտավախություն ունեն անտառային հրդեհների ռիսկի կտրուկ աճի կապակցությամբ։ Չորեքշաբթի սպասվում է սովորականից մոտ 1,5 միլիոնով ավելի ավտոմոբիլային ուղևորություն։ Ծայրահեղ չորության պատճառով նույնիսկ աննշան կայծը կարող է հանգեցնել խոշոր հրդեհի, իսկ խիտ երթևեկությունը՝ դժվարացնել արտակարգ ծառայությունների մուտքը։
Անվտանգությունն ապահովելու համար իշխանությունները կներգրավեն մոտ 35 հազար ոստիկան։ Իսպանիայում արգելված են կանգառը ճամփեզրերին և չոր բուսականության մոտ, մանղալների օգտագործումը և հրավառությունների արձակումը։ Վալենսիա շրջանում փակվել են բնական պարկերը, և արգելվել են զբոսանքները գյուղական արահետներով։
Տարվա սկզբից ի վեր Իսպանիայում անտառային հրդեհներն արդեն ոչնչացրել են մոտ 200 հազար հեկտար, ինչը վեց անգամ ավելի է, քան 2025 թվականի նույն ժամանակահատվածի ցուցանիշը։
Նրանց համար, ովքեր չեն կարողանա անձամբ տեսնել խավարումը, NASA-ն Իսպանիայի հյուսիս-արևմուտքում գտնվող Վիլյալիբադո գյուղում տեղադրել է չորս հզոր աստղադիտակ՝ ավելի քան 10 միլիոն դիտողի համար ուղիղ հեռարձակում ապահովելու նպատակով։
Արևի մասնակի խավարումը տեսանելի կլինի նաև Մեծ Բրիտանիայում։ Լոնդոնում առավելագույն փուլը սպասվում է օգոստոսի 12-ին՝ 19:12-ին։